Ụhịrẹyị 26

Ịrẹyị ẹnẹ ẹ yị vọrọ

1Ọza anaa ga ọnụra vị ene nyeeyi anka orihi anaa zụ ịnị ọhahị avọọ. 2Ozirenu ọnị ọza ẹ yị mẹ̀ ịrẹyị anị vị enee che oze parahu anka inomi enee hira zịịzị avọọ. 3Ọnụra vị ene tụ́ dị ọ wụ́ ịrẹyị, anka ịjapa ọnịrị enyusẹ mee mẹ̀ ka umaata ọnịrị ịkẹrịkẹtẹ ọ saasa ịsị aa ka avọọ. 4Asị ụ tụ́ ọnụra ohi ịrẹyị ka ẹwụrị ọ vaa sị vị ọnyọọnya. 5Va ohi ịrẹyị yị ọnụra dị ọ yẹ́ ka ọnị ọ yị yẹ ịrẹyị anka o mẹ rò. 6Ọza anaa tụ́ ọnụra ụtụ sị mẹẹ anka ọjavụ ana hị́ akanya tu ẹngụ anị avọọ nị. 7Ụhịrẹyị ọnị ọnụra e che sị mẹ anka oswahụ ẹnẹ ẹ zụ zị ụsẹ avọọ nị. 8Ọza anaa ga ọnụra sị mẹ anka ọza ana sụ ịrẹta za ọnanta avọọ nị. 9Ọnụra enee che ụhịrẹyị sị mẹ anka ohweche enee si ka ọnị tụ̀ ikeyi ene tura hi ọ ụvọ avọọ nị. 10Ọza anaa dọ ọnụra ọnị o re ụkọrọ vị anaa tọ aza ana vọ ụnava. 11#2 Ipi 2.22Ọnụra anaa vàa tụra ịsa ọnị ọ mẹ sị mẹẹ anka irezi ana varẹma nee rèé ahẹrẹ anị avọọ nị. 12Ọnụra ọ dahi huu ọza ẹnẹẹ yị yẹ ịrẹyị ene ro ka ọnị ọ yẹ ịrẹyị nị. 13Onuworo ọọ̄ kà a ka idu ya oze e zi ọnị nị. 14Onuworo vị anaa vara ịrẹsụ ode anị anka ukere mee jesi ịnị ẹza anị avọọ. 15Onuworo ọọ jị ụvọ ngụ ẹnya, ẹ yị zụ sị ọ nọ irenu. 16Onuworo vi ene ro ka ọnị ọ yẹ ịrẹyị huu aza ana vọ nị. 17Ọza ene ji na ngụ ịrẹyị ọnịrẹyị sị mẹ anka ọza ene ne tụra irezi ọzọga ụtọ avọọ nị. 18Anka ọnụra mẹẹ ne ịsị ịrịra a vị ịsị ụnava hi ọza avọọ. 19Avọọ ọza enee vene ọnọhụva anị ka ọnị ee pe e mẹ̀ aahẹ nị. 20Ẹ yị nyị ọkụ ịra vị ene mi, avọọ ẹ ị mẹ nyị ireche, aza ẹ yị naa zyaazị. 21Aka vị ana sị akịna hịrẹ ọkụ mẹẹ sị ịra za, avọọ ọnịrẹyị mẹẹ kụ ịrazị hi ẹtẹ nị. 22Ireche o hine anka ẹkasị ịsa ozoza ana a va ọza ka ọnị ọ mụnẹ avọọ. 23Ọza anaa sị odivi tụ́ ịnị ịnẹ aa ka ohine-ohine sị mẹẹ anka ọda enee si ku ụnọkọ anaa jị avọọ nị. 24Ọnịvị ọza vị anaā sịị ayamụkụ tụ ịnị ịnẹ dị a kà ọsa. 25Aa ka hworo-hworo, asị ụ dọ ọ wụ agụvị ka ịrẹyị ọhịmị vị enee chi ọ ẹngụ. 26Ọọ daka jị oku ku ayamụkụ anị, ọzọza vee re ebira odivi anị ịjị ụmẹ òo tu. 27Ọza anaā va ịrẹpa zi ọza ọ́ vaa za nị. Ịsa ọnị ọ sị yị ọza o vee re nị. 28Ọza ọnị ọza e yi sì ịrẹyị anị oo cheeche ku ka ọ̀ọ zị ọ nị. Ireche vi ene du ọza.

Currently Selected:

Ụhịrẹyị 26: EBTP

Highlight

Copy

Compare