Ụhịrẹyị 24

Ịrẹyị ana tụ ọ ẹwụrịhịịna

1Asị ụ va ụva ebira aza edivi, dị asị u re beri wa zị ògù 2Ẹ mẹmẹ vaa kụ ẹngụkata hi ẹtẹ kẹnẹ e yee ro nị. Irenu ẹnịnị ọ mā ka ọyịza.

Ịrẹyị ana tụ ọ oohu

3Ịrẹyọyẹ ọzaa sị tenyi irehi anị dị ọ jẹẹ nị. 4Ịrẹyọyẹ ọzaa sị kụ ogu ọkatarihi ozoza-ozoza hi ini eehi anị nị. Ịrẹyị ana tụ ọ ohurọnya.

Ịrẹyị ana tụ ọ ohurọnya

5Ọyẹrẹyọyẹ ọ nyị ụkata huna ọnụkata nị. Ịrẹyọyẹ o huna ụkata ọchẹngụ nị. 6Eto ịrẹyọyẹ ọza sịị nọ ịrẹkụ nị. Anajuwe ọrụrụ ọọ sị ọza rị ịrẹkụ.

Ịrẹyị ana tụ ọ ohurẹẹva

7Ọnụra ẹ yị yẹ ẹhahi ịrẹyị ịrẹyọyẹ. Ẹ yị nyayịnẹ há irenu ịzị àa kà ịrẹyị obooro.

Ịrẹyị ana tụ ọ ohurẹẹta

8Ọza anaā mẹ̀ aro ka ọnị ọ mẹ̀ odivi vị ana a vaa hị́ ọmọzakụyẹ. 9Avaba eto ọnị ọnụra aa mẹ̀ vị ọhịmị. Aza vị anaā nyị ịhyẹrẹ ọza anaa sị ọzaa mẹ enyinyi.

Ịrẹyị ana tụ ọ ohurẹẹna

10Wàa và ẹngụ hi ẹtẹ ịnị ụmẹ ẹngụkata, ọkụmị ụ vị avọọ nị.

Ịrẹyị ana tụ ọ ohurẹẹhị

11Asị ụ kana eyi ịrẹma dị waa dọ ọza ana a ka a sị irikiti wụ̀ tịtẹ. 12Asị ụ kà a ka ẹ yị nyị awụ rị ịnị anị agụvị ka Ohomorihi ọ yẹ ayị́ ọzọza, di e re ọzọza nị. O vee sí ọzọza atọ ịsị ọnị ọ̀ mẹ̀.

Ịrẹyị ana tụ ọ ohurịhịnọnyị

13Ozi emi, rèé ẹhụ ka o zoza, enyi anị anaā wọ̀rọ́ hụụnị ụpaha anị o hine ẹtẹẹtẹrẹ. 14Avọọ ịrẹyọyẹ mẹẹ̄ hine nị. Re ka waa nyị ịrẹyọyẹ agụvị ụhwọọ awụ o zoza, dị asị ụ sụ́ ụmayịyẹ.

Ịrẹyị ana tụ ọ ohurịhịmba

15Asị ụ hama ọza ọhịmị ene e ne zi ọnịzẹyịza, dị ọ sị àkó dọ ọ avaba ịsa ọnị ọ nyị. 16Ọnịzẹyịza ọ̀ọ hyẹdụ pooro, ọ vaa kwẹẹtẹ ama akanya vi ene vee vu ọza ọhịmị ẹtẹ.

Ịrẹyị ana tụ ọ ohurịhịnta

17Asị ụ jẹ ka ịrẹyị odivi o tu ọnịvị awụ. Asị ayị awụ hine ka ọ tụ́ ahụ. 18Wàa jẹ ka odivi ó tu ọnịvị awụ, ayị Ẹnẹyịmavara vi ene du, dị ọ va ị́rẹma awụ, dị ọ yị kụkụ sị ụya rị ọnịvị awụ ẹnẹẹ.

Ịrẹyị ana tụ ọ ohurịhịịna

19Asị ịrẹyị aza ọhịmị kata wụ ẹngụ. Asị ụ kụ ịhị ebira odivi ẹnịnị. 20Aza ọhịmị ẹ yị nyị ẹhẹ ịrẹma. Ẹ yị jẹẹ dị ịra ẹnịnị ọ mi.

Ịrẹyị ana tụ ọ ohurẹẹwụ

21Ozi emi, nyị angwahi Ẹnẹyịmavara ọnịrị ohinọyị. Asị ụ zị ògù aza anaa mẹ̀ akamawụ hị́ wa. 22Asigiri ọ zụ tu wa obonobono. Ẹnẹ yẹ ẹngụ asigiri ọnị Ohomorihi a vị ohinọyị vaa kụ́ tu wa.

Ịrẹyị Ịrẹyọyẹ ana vọ

23Ọyẹrẹyị ộ kà ịrẹyị ẹnẹnị nị: Ẹ yị zoza ka ọza ọọ̄ mẹ̀ ọkarẹyị irikiti. 24Ọza anaa jị ịhị yị ọza odivi vị ọnị aza vee chi hi, dị avaba aza nyị ịhyẹrẹ anị. 25Ama o vee zee yị ọmọkarẹyị nịnị anaā jị ịvị yị ọza ana mẹ̀ odivi nị. Ẹ yaa rị aha ebira ọyịza ẹnịnị. 26Ọza ana sị ịzẹyịza tụ ohi ịrẹyị vị ana aa sị zụ ka ọta obooro ọnị vị nị. 27Tenyi ẹtẹ tịtẹ daa, di we vee chire ịsa tụ ọ, dị wa vaa da irehi. 28Asị ụ da ku ọza ọnị ẹ yị nyị ịsị ọ mẹ̀. Asị ụ rẹẹ̄ kà ịrẹyị ọnị eyi awụ e yi tu. 29Asị ụ kà a ka wee si atọ ịsị ọza mẹ wụ; Ịsa ọza ọ̀ọ sị mẹ wụ, ẹwụ raa sị mẹ̀ ẹ nị. 30Maa para aarẹ ọnịrị ụbazị ịvayịnị onuworo ẹnẹ ẹ yẹ ịrẹyị hu. 31Avị ọnịrị igegenechi vị ana za avaba ịsa ịnị aarẹ anị rị. Ọvọ ịrẹta ọnị ọ jị kara ụbazị anị e ku wu va hi ẹtẹ. 32Mmi mê re e, di mi ro o, dị mị kọsẹ ịrẹyọyẹ hụụnị anị nị. 33#Ụhị 6.10,11Onuworo ọọ sụ aara chee, dị ọọ hiine aara chee, dị ọ sị ụmẹ ana vọ jị ụvọ za ẹngụ. 34Osiye vị ana vaa ngụ tu ọ anka anako mẹẹ̄ ngụ tu ọza, dị avaba ịsa ọnị ọ nyị ta avọọ.

Currently Selected:

Ụhịrẹyị 24: EBTP

Highlight

Copy

Compare