Ụhịrẹyị 14

Ịrẹyọyẹ vị ana sị ọza mẹ̀ ebira ozoza

1Ịrẹyọyẹ ọnyẹnẹẹ sị tenyi ovwoovu anị nị, ama ọnụra vị ana sị ụvọta anị gara a. 2Ọza anaā ra a mẹ vọrọ vị eneē hí angwa Ẹnẹyịmavara ama ọza ana ra ẹhẹ akụvị vị anaā si eyi wụ ọ. 3Ịrẹyị irenu ọnụra ọọ̄ ku akanya tụ ọ nị ama ịrẹyị irenu ọyẹrẹyị o sere e nị. 4Ọza anaa da aarẹ ọọ nyị ịsa ọyịna tụ ịnị ụhwọ nị, ama ọza ẹnị ẹ yị da aarẹ vị ọnị ụhwọ anị tụ osusu. 5Onivenu ịzẹyịza o mē cheeche ama onireche vi eneē cheeche. 6Ọza anaa sị avaba ịrẹyị mẹ̀ isiya ọ mā yẹ ịrẹyị ama ọza ana yẹ ịrẹyị ọọ kọsẹ nị. 7Asị ụ gụrị ọnụra agụvị ka a yi nyị ịrẹyọyẹ ọnị ụ zụ kọ hụụnị ụvọ anị. 8Ịrẹyọyẹ ọyẹrẹyịị̄ sịị mẹ̀ ẹhẹ anị nị, ama ọnụra vị anaā sịị ụraa vene ẹngụ anị. 9Ọnụra vị anaā sịị irenu kụ ebira odivi ha ama ayị Ohomorihi vị eneē hine tu aza anaa mẹ̀ ịsa ana vọrọ. 10Ọzọza ọ yẹ enee re nị, ọ vị ọyịza ọ vị odivi ẹ yị nyị ọza anaa gụ ọ ụvọ ẹnya anị. 11Ovwoovu ọza ọhịmị ọ yị vaa nọ orubo ama ovwoovu ọnịzẹyịza vị ọnị o vee zee yị. 12#Ụhị 16.25Ọza ọ nyẹngụ rò ka anị ọ vị nị ama dị ahịka ọ sị ọ ne vu nị. 13Ọza ọ nyẹngụ e nyinyi ịnị ayodu dị ọ vavẹ ịrẹma anị ọ va vị orere. 14Ọza ọhịmị vaa dọ ọgụ ebira odivi anị, ọza ọyịza ọnị rẹ vaa rị aha ebira ọyịza anị. 15Ọnụra vị ana a dọ avaba ịsa hyọọrọ kẹnẹ ama ọza ọnị eyi anị hweyi vi anaā teyi ẹtẹ. 16Ọza ana yẹ ịrẹyị vị ene e zwe yị ịrẹyị ama ọnụra vị ene zwe huuru na gẹrị ọ. 17Ọza anaā kụ ayị baaba vị ana a mẹ̀ ụra ama ọnịrẹyọyẹ vị ana vayị nẹtẹ. 18Ọza ọnị eyi anị ọ yị hweyi vị ana kụ ụra ogu ama ọyẹrẹyị vị ọnị ịrẹyọyẹ vị ahaa yị. 19Aza ọhịmị vị ene vee hi ụvọ zi aza ọyịza. Ẹ vaa ya enoze aza ọyịza pa ịsa nị. 20Onosiye vị ọnị ọzọza nyị ịhyẹrẹ anị ama opisa vị ana nyị ọta tuturutu. 21Ịvị ọ vị ka ọza ọ sị eyi wụ ọnọhụva anị ama ọza ana tẹsị onosiye vị ọnị o vee zee yị. 22Ọza ene tenyi ẹngụ ọyị mẹ̀ odivi vị enee nyeeyi, ama ebira ozoza vị ana sị ụbanyị yị ọza, dị a rẹ sị ayị tụra a. 23Ọza ọ̀ọ mẹ̀ dị ọ nyị ama ọza anaa kụ ịrẹka kẹnẹ vị enee re osiye. 24Ịrẹyọyẹ ọ vị ogu ọnịrẹyọyẹ nị ama ututu a sị yẹ ọnụra nị. 25Onivenu anaā ka ịzẹyịza vị anaā dọ ọza há ama onireche ọ yị wụra sị ayị tura. 26Ọza eneē hí angwa Ẹnẹyịmavara vị ọnị oō sere ọnịrị ovwoovu anị. 27Ẹnẹyịmavara ọọ̄ sị ẹhẹ obooro yị ọza ene hí angwa anị nị agụvị asị usu jị ọ hi. 28Aza ịrẹma ohinọyị ọ vị ụbanyị anị nị, ama ẹ yị nyị aza ịrẹma dị ọ sị hịmị. 29Ọza ana yẹ ịrẹyị ọ yị mā hụra ku ayị ama ọnọyịkụ vị ana a sị ututu anị zụ̀. 30Ayọnẹtẹ vị anaā sịị ẹngwọọrọ yị ọza ama ọza anaā kụ ụhị ẹ mā nyị ẹngwọọrọ. 31Ọza ana aā mẹ̀ ẹvaya yị onosiye vi enee du Ohomorihi ana mẹ̀ ẹ, ama ọza ana sị ụbanyị yị ọ vị anaā vayị onosiye. 32Ebira odivi aza ọhịmị e vu wa ẹtẹ nị ama ebira aza ọyịza ọọ̄ dọ wa tụ nị. 33Ọza ana yẹ ịrẹyị vị eneē ro ịrẹyị ama ọnụra ẹ yị nyị ịrẹyọyẹ. 34Ịzẹyịza vị anaā sịị ẹkụra kà a tụ ọvịdị ama ebira odivi vị anaā mẹ̀ ụhị nyị ẹkụra. 35Ayị ohinọyị vị ene hine tu ọza anaa mẹ ẹtẹẹrẹ, ama vị ọọ sị ụya rị ọza anaa mẹ̀ẹ ụhị nyị ọ nị.

Currently Selected:

Ụhịrẹyị 14: EBTP

Highlight

Copy

Compare