Ụhịrẹyị 13

Ebira ịrẹyọyẹ

1Ozi ana yẹ ịrẹyị vị anaā wụ́ ịrẹyị ada anị, ama anaamọvị ọ mā dọ ka ọnị o nyeeyi. 2Ọza ọyịza vị ana rị aha irenu anị ama ọza ọhịmị vị ene si oze ọyị chamayị yị ọza. 3Ọza ana sị ụvọ za irenu anị vi ene sere ẹhẹ anị ama ọza anaa kà kẹnẹ-kẹnẹ vị enee vu ẹngụ anị ẹtẹ. 4Ọza anaā nyị uworo o mē zụ re ịsị e si ama ọza anaā mẹ̀ vee re e tụra-tụra. 5Ọnịzẹyịza ọọ nyị ịhyẹrẹ ireche nị ama ọza ọhịmị vị ana mẹ̀ ịrẹyị ụhị. 6Ịzẹyịza ọnịzẹyịza aa dọ ọ tụ nị ama ebira odivi ọza ọhịmị o vee vu ọ ẹtẹ nị. 7Ọza ẹnyị vị ana mẹ̀ eyi ụbanyị ọnị ọ yị nyị ama di ọza ẹnyị aa sị ẹngụ anị tẹ. 8Ọza ọbanyị vị ana sị ẹkẹhị dọ ẹngụ anị ha, ama a yi nyị ịsị ẹ vị angwahi onosiye. 9Ẹhẹ ọza ọyịza sị mẹ anka ịra ana a za avọọ ama ẹhẹ ọza ọhịmị vị ana sị mẹ anka ịra ene e mi avọọ nị. 10Ẹngụ ọ yị sị tụ ẹba vị ana kụ ẹngụkata hị́ ẹtẹ ama ọnịrẹyọyẹ vị ene họ̀ use ajuwe. 11Ẹkẹhị ịrịra o mē ku dị ọ ta ama ututo ẹkẹhị sị gụ nị. 12Ịsa ọnị ọza e si ee tura ẹtẹ ayị anị vaa zị nị, ama ọza ene re ịsị ee si vị ọnị ayị anị hine. 13Ọza ana sị eyi wụ ajuwe obooro vị eneē vu ama ọza ana a saasa a ọ vaa ha nị. 14Ịrẹyị ọnị ọnịrẹyọyẹ ka vi ene e tenyi ẹhẹ ọza. Ịrẹyị ọnọọ vaa dọ ọ ha ịnị ụmẹ ẹngụkata. 15Ebira ozoza vị ana a sị ụbanyị yị ọza ama apẹ ọyị mẹ̀ ẹ yị nyị ịzị o tu. 16Ọza ana yẹ ịrẹyị vị ene e rò dị ọ vaa mẹ̀ ịsa ama ọnụra vị ana da ụra anị zụ. 17Ọnụtụ odivi vị ana a kụ akanya tu ọza ama ọnụtụ ọyịza vị ene e tenyi ẹtẹ. 18Ọza ana ka ọnị ọ mā wụ́ ịrẹyị ọza vi ene e re, dị ụhị a nyị ọ, ama ọza anaā wụ́ ịrẹyị ọza vi ana nyị ụbanyị. 19Ọza o re ịsị e si ayị anị hine nị. Ọnụra kẹnẹ ọ vị enyisi anị ka ọ va hụụnị ebira odivi anị nị. 20Ọza anaā zị ògù ọyẹrẹyị vị ana yẹ ịrẹyị ama ọza ene e pe ọnụra za ọta vị anaā mẹ ẹngụ anị ịrẹyị. 21Odivi oō du ọza ọhịmị echi nị ama ọnịzẹyịza vị eneē re ọyịza. 22Ọza ọyịza vị ana a navọ ogu tịtẹ yị ezi ọnịrị ẹmazị anị. Ama ogu ọza ọhịmị ọnịzẹyịza vaa sị mẹ ẹhẹ nị. 23Ịsa ịnị aarẹ onosiye ọ̀ọ daka mẹ ẹtẹẹrẹ ama amẹrị ẹ yị vaa zẹ ka ò re e rị. 24Ọza ene e mē tu ozi anị e yị sị ịrẹyị anị ama ọza ene sị ịrẹyị ozi anị vị ene tu ọ. 25Ọnịzẹyịzaā nyị ẹhụ ịsa ana hụ ọ rị ama aza ọhịmị vị ọnị ụngwẹ kụ pooro.

Currently Selected:

Ụhịrẹyị 13: EBTP

Highlight

Copy

Compare