Ụhịrẹyị 15

Ebira ozoza

1Ụmẹnẹ ọyị sị tụ́ ohi ịrẹyị vị ene hunẹnẹ ọza ayị ama ọjanagụ ọyị kà vanaā kụ ọyịkụ kwẹẹtẹ. 2Ọza ana yẹ ịrẹyị vị anaā ka ịrẹyị ịrẹyọyẹ ama ọnụra vị anaā kà ututu. 3Ẹnẹyịmavara e re avaba ịsa ana a ná. Ee re odivi ọnịrị ọyịza ana aza aa mẹ̀. 4Ịrẹyị ana a sị ayị ọza nẹtẹ vị ana a mẹ̀ ẹhẹ rọ ọza ẹngụ ama ireche vi enee du ọza ayị. 5Ọnụra kẹnẹ ọọ sị eyi wụ́ ịrẹyị ada anị nị, ama ọza ana yẹ ịrẹyị vị ana a dọ ịrẹyị ada anị wụ. 6Ọza ọyịza vị anaa nyị ịsa rị ụvọ ama ọza ọhịmị vị ọnị akanya tụ́ avosusu. 7Aza ẹ mā kọ ịrẹyọyẹ hụụnị ụvọ ọnụra, ịnị ụvọ aza ana yẹ ịrẹyị aa kọsẹ ịrẹyọyẹ nị. 8Ẹnẹyịmavara ọ nyị ịhyẹrẹ ịsọvọ ọza ọhịmị ama ọọ̄ wụ́ aduwa ọza ọyịza. 9Ẹnẹyịmavara ọ nyị ịhyẹrẹ ọza ana a mẹ̀ odivi ama o sì ịrẹyị ọza anaa mẹ̀ ịsa ana vọrọ. 10Ẹnẹyịmavara vaa pa ịva yị ọza anaa mẹ̀ ebira odivi, ọza ọnị ẹ mā dọ ịrẹyị ọza wụ vị enee vú ẹtẹ. 11Ẹnẹyịmavara mẹ re avaba ịsa ana na ịda aneku, avọọ o me re ré ayị ọzọza nị. 12Ọza anaā sịị eyi wụ̀ ọza ọ̀ mā dọ ka a tụ ọnị ohuvọ, ọ yị ma rẹ họ̀ use ajuwe hụụnị ụvọ ọza ana yẹ ịrẹyị. 13Ayohine ọọ̄ sị ọza nyinyi nị, ama ayodu vị anaā sịị ọza va ẹngụ hi. 14Ọza ana yẹ ịrẹyị vi ene sì ka ọnị ọ yẹ huu avọọ ama ọnụra vị anaa va ụva ụra. 15Onosiye vị anaa ra ẹhẹ ụyụya, ama ọza ana dọ ka ịsa ọnị ọ nyị ọ̀ hụ ọnị vị ọnị ayị anị hine pooro. 16O vene zoza ka ọza ọ nyị ịsa chee di o hí angwa Ẹnẹyịmavara huuni ka ọza nyị ogu ẹnẹmẹhị tụra ịrẹsụ akanya. 17Ọza ọ rị ụka ịdị ọza ene sì ịrẹyị anị, ọ mẹ hụụnị ka ọ na rị iya ịdị ọza anaa kụ ayị anị nị. 18Ọnọyịkụ vị anaā kụ́ ahankata hi ẹtẹ ama ọza ọnị ayị anị nẹtẹ oo ji ịrazị nị. 19Onuworo vị anaā vị ọnịrị akanya pooro kẹnẹ, ama ọnịzẹyịza vị ọnị ẹhẹ anị zoza yị. 20Ozi ana yẹ ịrẹyị vị ana mẹ̀ ayị ada anị hine ama onututu vị anaa sị eyi wụ ọnyị anị. 21Ọnụra vị ana ayị anị hine tụ ịnị ụra ana aa mẹ̀ ama ọza ana yẹ ịrẹyị vị anaa mẹ̀ ịsa ana vọrọ. 22Ọza ọnị ẹ yị dọ ajuwe ọza vị anaa hyẹdụ, ama ọza anaa dọ ajuwe aza ọ yị me nyee eyi. 23Ọza anaa yẹ ohi ịrẹyị ana vọrọ tụ vị ọnị ayị ọza hine tu. 24Aza ana yẹ́ ịrẹyị vị anaā mẹ̀ ebira anaā sịị ọzaa ku orubo; ẹnịnị ẹ́ mā mẹ̀ ebira anaā sịị ọza naa gẹrị isu. 25Ọza anaā sịị ẹngụ tụ ẹba vị ọnị Ẹnẹyịmavara gara irehi anị, ama ogu osoku vị ọnị oō sere. 26Ịsị eenyisi aro aza edivi vị yị Ẹnẹyịmavara nị, ama ịrẹyị irenu aza ọyịza vị enee hine e ayị. 27Ọza anaa mẹ̀ karakara ka ọnị ọ̀ zị oze asuvu rị ọgụ vị anaā kụ ẹngụkata tu anineehi anị, ama ọza anaā nyị ịhyẹrẹ ochirerenu ọyịdọ vị eneē ku orubo. 28Aza ọyịza vị eneē rò ịrẹyị dị e vee tu ọza ohi ịrẹyị ama aza edivi e mē rò o dị e tụ́ ohi akụvị eyiha-eyiha. 29Ẹnẹyịmavara wụ́ aduwa aza ọyịza, ama aza edivi vị ọnị ọọ̄ sị eyi jịnẹ. 30Eyirẹsụ ọza anaa jẹ ịrajẹ vị anaā sịị ayị ọzaa hine, dị enube ọyịza ọnị ọza wụụ mẹ ka ẹngụ ọza òo hi ahị hu avọọ nị. 31Ọza ana tụ ohuvọ ka ẹhẹ anị ò zoza, dị ọ dọ vị ana vaa yẹ́ ịrẹyị. 32Ọza eneē yi ka ọnị ẹ mā kọsẹ vị anaā mẹ ẹngụ anị ọnya, ama ọza anaā dọ ka àa tụ ọnị ohuvọ vị anaā yẹ́ ịrẹyị hu avọọ. 33Ọza ọ̀ọ hí angwa Ẹnẹyịmavara vị a kọsẹ ịrẹyọyẹ nị. Ọza ana ka ẹngụ anị chi vị ana aā sị ụbanyị yị.

Currently Selected:

Ụhịrẹyị 15: EBTP

Highlight

Copy

Compare