Ụhịrẹyị 10

Ụhịrẹyị ọnị Isoromọnị che

1Ẹsẹnị ẹ vị ụhịrẹyị ọnị Isoromọnị che nị: Ezi ana yẹ ịrẹyị vị anaā mẹ ayị ada ẹnịnị hine ama ọnụra vi eneē du ọnyị ẹnịnị ayị 2Ogu ọnị ọza sị ebira odivi si ọ mā nyị ịrẹma ama ịzẹyịza vị ana sị ọza ku orubo. 3Ẹnẹyịmavara ọ yị vaa zẹ ka ụngwẹ ọ kụ aza ọyịza, ama ọ yị vaa zẹ ka ọza ọhịmị ọ re ịsị e yee si. 4Uworo vị ana a sị ọza re osiye ama ọza ana aa sị ụvọ anị mẹ vị ana aā nyị rị ụvọ. 5Ọnịrẹyọyẹ vi ana a kụ ịsa ọyịna ịnị ụmẹ anị, ama ụhị vị ana nyị ọza ana kara ụvọ chire agada. 6Ọza ọyịza vị ọnị o zee yị, ama ọza odivi vị ana jị avị ku udivi anị. 7Ịrẹkụkụ ọza ọyịza ọ mē vu ama ọza odivi ẹ yị nyị ọyịza ana aa sị tamayị anị. 8Ọnịrẹyọyẹ vị ana a wụ́ ịrẹyị ọza ama ọnụra ana ka kẹnẹ-kẹnẹ vị ana kụ ịrẹyị tu ẹngụ anị 9Ẹ yị nyị ịsị ee chire ọza ana aā mẹ ịrẹyị ana vọrọ angwa ama ụvọ vee ku ọza ana a mẹ asuvu. 10Ọza ana a jị ọza eyi tụ ịrẹyị vị ene du ẹtẹ ama ọza ana a ka ịzẹyịza yị ọza o si ẹngwọọrọ yọ nị. 11Ịrẹyị irenu ọnịzẹyịza vị ana rọ ọza ẹngụ, ama ọza odivi vị ana a sị ịrẹyị ẹnyị tụ ịnị ịnẹ ka ọsa. 12#Ije 5.20; 1 Ipi 4.8Ayamụkụ vị ana tụ ịrẹyị ụka ama oyisì vị ana sị ọza eyi hụụnị ịrẹyị. 13Ọnịrẹyọyẹ vị ana a ka ịrẹyọyẹ ama inori ẹ yị tara ọnụra. 14Ọyẹrẹyị vị ana kọ ịrẹyọyẹ pooro ama ịrẹyị irenu ọnụra aa wụ̀ ọ nị. 15Ẹkẹhị ọọ̄ dọ ọnyẹkẹhịị tụ nị ama iruwa ọọ̄ wụ̀ onosiye nị. 16Ebira ọyịza ọ sị ọza na orubo nị, ama ọza odivi vị ana sị ẹhẹ anị mẹ odivi. 17Oō zee yị ọza ana wụ́ ịrẹyị ọza nị ama irezi ene vu ọ mā wụ eesi. 18Anapẹ ọ sị ẹnyị tụ ịnị ịnẹ ka ọsa nị, ọnụra oō du ọza nị. 19Ireche ọ mā tara ọza ẹnẹ ẹ yị ma sị irenu anị kwoku, ama ọza ana yẹ ịrẹyị vị ana sị ụvọ za irenu anị. 20Ịrẹyị irenu ọnịzẹyịza o hụụnị ẹkẹhị, ama ịrẹyị kẹnẹ-kẹnẹ ọnụraa ro nị. 21Aza ọrụrụ-ọrụrụ aa rị aha ịrẹyị ọza ọyịza nị, ama ụra ọnụra ọọ wụ ọ nị. 22Ẹnẹyịmavara ọ ga ize tu ọza, ọ mā nyị ayodu. 23Ebira odivi vị ene hine ọnụra ama ebira ịrẹyọyẹ vị ene hine ọnịrẹyọyẹ ayị. 24Ịsa ọnị ọza odivi e hí angwa anị oo tụ́ ọ nị, ama Ẹnẹyịmavara vị ana a mẹ̀ ịsa ọnị ọnịzẹyịza e si. 25Ịzị ẹngụkata yaa vu ọza ọhịmị ẹtẹ ọnịzẹyịza vị anaa jẹẹ geri-geri ịzọọ. 26Ayodu ọza ana tụ onuworo ụtụ re nị. Vị ọ mẹ ẹgọ ka ọza eyi, dị ọza ọnọọ ẹ yị nyị irenu ha nị. 27Ọza ene hí angwa Ẹnẹyịmavara vị ene ku orubo ama ẹhẹ aza ọhịmị vị ana vaa da ẹjịjị. 28Ayị ọza ọyịza vị ene hine tụra ịsa ana a tụra eyi ama ọza ọhịmị ọ yị vee re ịsa ene zi eyi anị. 29Ẹnẹyịmavara e sere ọza ana a mẹ ịzẹyịza ama aza ọhịmị vi ene vee vú ẹtẹ. 30Ọza ọyịza vị ana vaa ha, ama ọza ọhịmị ẹ yị vaa ra. 31Ọza ọyịza vị anaa kà ịrẹyọyẹ ama irenu anaa kà ọhịmị vị ene vee vú ẹtẹ. 32Ọnịzẹyịza ọ yẹ ịrẹyị ana vọrọ ka ọ kà ama aza ọhịmị vị ana a kà odivi.

Currently Selected:

Ụhịrẹyị 10: EBTP

Highlight

Copy

Compare