Ụhịrẹyị 9

Ịrẹyọyẹ aa rị eche

1Ịrẹyọyẹ ộ da irehi anị dị ọ jị ohinẹ ịhịmba ka a jẹẹ ka asị o wu. 2Dị ộ wụ̀ uye anaa sị rị eche, dị ộ mẹ̀ echee ozoza, dị ộ mẹ̀ ịsa hi ẹtẹ nị. 3Dị ộ tụ ezi ahụ anị anẹẹ ka ẹ̀ na aha ana nẹba ịnị ẹkụra na nọ ọ yị aza yị ọnị nị. 4Ịrẹyọyẹ vị ana hị́ ọnụra ka ọ ngụ ịnị eehi anị nị. Dị ọ hị́ ẹnị ẹnẹ ẹ yị yẹ ịrẹyị dị ọ ka, 5Ẹ vẹ, dị ẹ va rị ịsa anị, dị e hu eche ozoza ọnị ọ mẹ̀ tịtẹ. 6Ọ kà ọnụra ọ va hụụnị ututu anị di oo hu ahụ ịrẹyọyẹ. 7Ọza ana tụ́ ọza anaā sịị ẹngụ tụ ẹba ohuvọ vaa dọ ụhụ. Avọọ ọza ana tụ́ ọza ọhịmị ohuvọ mẹ re vee re ayodu nị. 8Asị ụ tụ́ ọza anaā sịị ẹngụ tụ ẹba ohuvọ agụvị asị ọ nyị ịhyẹrẹ awụ. Ama waa tụ́ ọnịrẹyọyẹ ohuvọ dị ọ sị ịrẹsụ nẹtẹ yị wụ. 9Wàa sị ịrẹyọyẹ zụ ọnịrẹyọyẹ, dị ọ yẹ ịrẹyị huna avọọ. Wàa zụ ọnịzẹyịza ịsa, dị ọ yẹ ịsa ọnọọ huna avọọ. 10#Ijov 28.28; Ahẹ 111.10; Ụhị 1.7Angwa Ẹnẹyịmavara ọyị nyị ọ vị ahụ ịrẹyọyẹ ịpaapa ọnị ọzaa hu nị. Ọza ọ̀ọ yẹ Ohomorihi ọnịnị eyi anị vị enee hweyi. 11Ịrẹyọyẹ vị anaa sị ọza ku orubo. 12Wàa yẹ ịrẹyị, dị ọ vị aha yị wụ. Wèe yi ọ, dị ọ vị ụya yị wụ.

Ọnụra vị anaa hị́ oneyogu ka ọ va rị eche

13Ọnẹẹ ọnụra vị anaā kụ́ ịrẹka zịị kẹnẹ. Oneyogu ọ vị nị. Ọ yị nyị ụ̄hị vụrụ-vụrụ. 14Ọọ̄ sị ịrẹhụ yaatụ inoze irehi anị, à vị ịzị ẹ nẹba ana va ẹkụra chire, 15dị aa hị́ anọrụ ana va tụra oze aa na ẹngụ ẹnịnị. 16“Ọnụra nịnị va ngụ eehi”. Anọrụ ẹnẹ ẹ yị yẹ ịrẹyị vị ana aa kà a yị ka, 17Enyi ene e yi oō hine huu ni, ịsọyịrị ene wèrè rị oō hine huu nị. 18Ama anọrụ ana ngụ ọ ụvọ ẹ yị yẹ́ ka aza ana vịdị na ịzọọ vị ene su. Aza ana vịdị ngụ irehi anị aa sụ̀ aara ịdị aneku.

Currently Selected:

Ụhịrẹyị 9: EBTP

Highlight

Copy

Compare