Ịrịka 16
16
Ikora ộ kụ́ aza na mẹ akamawụ
1 #
Ijudi 1.11
 nyị Anireevi ọnya aanị ana a hị́ Ikoraana vị ozi Iziha ọnị ada anị rị Ikohati. Ikohati ọnọọ vị ozi Ireevi.  rẹ nyị ẹyịnyara ẹẹva ọsa ana vị ezi Anirubẹnị nị. Ịrẹha ọnya ọ rị Idatanị, dị ọsa rị Abiramị nị. Ada ẹnịnị aa hị́ Eriyabi nị. Ọnọhụna ẹnịnị ọ rị Ọnị ana vị ozi Ịpẹrẹtị. Ọnị rẹ vị Anirubẹnị nịnị. 2Dị ẹnị ẹyịna ẹnẹnị kụ́ aza ana a nyị mẹ ọdọvịdị Anisirẹrị ene eyi yẹ ịrẹka tụra ẹvarẹwụ gụ nị. 3Dị ẹnịnị vabẹ va eyi ka Imosiisi ọnịrị Eerọnị. Dị ẹ ka Imosiisi ọnịrị Eerọnị è ro ka ẹnị hụụnị aza ana vọ nị. Avaba ẹnịnị Anisirẹrị vị aza Ẹnẹyịmavara, dị ọ rẹ ya pe ẹnị nị. Sị ẹ zụ mẹ ka Imosiisi ọnịrị Eerọnị ẹẹ sị eyi wụ̀ aza ana vọ? 4Imosiisi mẹ wụ́ ịrẹyị ọnọnị, di o ku ẹtẹ, dị ọ mẹ̀ aduwa nị. 5Dị ộ ka yị Ikora ọnịrị aza anị ana saasa a ka Ẹnẹyịmavara vaa sị ọza ọnị ọ̀ọ nyị zụ ẹnẹnẹ eyinẹhẹ anị. Ọza ana nị ọnị ọ nyị kẹnẹ ọ̀ vaa zụ gụrị ọ nị. 6Dị Imosiisi kà Ikora ọnịrị aza anị ẹ sị ẹnya ana aā sị rị eturare ịra, 7dị ẹ ka akịna ọnịrị eturare tụ́ ọ ọvịdị Ẹnẹyịmavara. Ọnị ọ vaa nyị ọza ana vị anị nị. Dị Imosiisi ka ẹnịnị Anireevi ẹ sị rẹ jịnẹ ẹngụ ẹnịnị baaba. 8Dị ọ kà a yị Ikora ka Anireevi nịnị e batọ dị ẹ wụ́ ịrẹyị. 9Ẹnịnị wéé ro ka ịsa oweyi ọ vị nị ka Ohomorihi Anisirẹrị ộ nyị wa tụ irenyi hụụnị avaba Anisirẹrị nị? Ộ za wa gụrị ẹngụ ka ẹẹ mẹ̀ ụkọrọ ịnị ajẹngụ anị, dị ẹ mẹ ka Anisirẹrị nịnị ẹ̀ hẹkẹ ọnị. 10Ẹnẹyịmavara ộ navọ ka ẹnịrị ezi Ireevi ana vọ ẹ gụrị ọnị ama ẹnịnị kụkụ ee si ka ẹnị ẹ yaa udi ohirẹsụ irehi Ohomorihi. 11Anikora nịnị ẹ raa kụ aza ku ịrẹma va eyi ịraazị ka Ẹnẹyịmavara. Ẹ yị vị ịrẹyị Eerọnị o tu wa. 12Dị Imosiisi tụ́ hị́ Idatanị ọnịrị Abiramị ana vị ezi Eriyabi nị. Dị ẹnị rẹ tụ́ ụtụ varẹma ve tu Imosiisi ka ẹnị ẹ yị nọ nị. 13Dị ẹ ka aanịka ịrẹyị oweyi ọ vị ka Imosiisi ộ kụ ẹnị hụrị ẹtẹ ozoza na ngụ ịnị ụnọmị ka ẹnị e su va ha nị. Booro aanị, di ee si ka ọnị ọ mẹ ọga tụra ẹnị ịrẹsụ. 14Ệ kà ụkụ eyi ọ vị nị ka Imosiisi ọ yị vaa zụ kụ ẹnị na ngụ ẹtẹ aha, a vị dị ọ sị ẹtẹ ụbazị ịvayịnị yị ẹnị. Ẹnị ẹ yị nee tu Imosiisi agụvị ka Imosiisi è vene ẹnị nị. 15Ịrẹyị ọnọọ ọ kụ Imosiisi ayị, dị ọ mẹ̀ aduwa ka asị Ẹnẹyịmavara dọ ịsọvọ ẹnịnị. Ọ kà a yị nyị ịsị ọnị dọ wa. Ọnị ọ yị dọ wa ịkẹrịkẹtẹ. 16Di Imosiisi kà yị Ikora ka ọ kụ aza anị dị ẹnịrị Eerọnị ẹ vẹ ọvịdị Ẹnẹyịmavara eyinẹhẹ anị. 17Ọzọza ọ sị ẹnya ana aā sị rị eturare ịra rị ụvọ, dị a sị eturare tụ́ ọ, dị ọzọza ọ sị anị vẹ ọvịdị Ẹnẹyịmavara. Avaba ẹnya eturare ẹnẹẹ vị ịrẹka tụra ẹvarẹwụ. 18Ịzẹyịza, dị ọzọza sị ẹnya eturare anị, dị ka akịna tụ ọ, dị ẹ va eturare hi ọ ịrẹsụ, dị ẹ jẹẹ enoze ajẹngụ Ẹnẹyịmavara ịzị ọnịrị Imosiisi vaka Eerọnị nịnị gẹ. 19Dị Ikora kụ avaba Anisirẹrị nịnị gụ enoze ajẹngụ ka ẹ va eyi ka Imosiisi nị. Obooboro ọnọọ, dị Ẹnẹyịmavara sị ẹngụ zụ wa, dị ẹtẹ hweyi kara avaba ịragụ ana gụ nị. 20Dị Ẹnẹyịmavara kà yị Imosiisi ọnịrị Eerọnị ka, 21ẹ kana hụrị ẹngụ ẹnịnị agụvị asị e vú ẹtẹ beri wa ịzịzọọ. 22Ama dị ẹnị ẹyịva ẹnẹẹ ka ịrẹsụ hi, dị ẹ mẹ̀ aduwa kà a, Tee! Ohomorihi anaā sịị ụhwẹ yị aza, sị ẹ vị dị a vaa hụvị ọza ịnya kụ ayị hi avaba ịragụ? 23Dị Ẹnẹyịmavara kà yị Imosiisi ka, 24ọ ka yị ịragụ ka ẹ ka hụrị ẹngụ Ikora ọnịrị Abiramị ne beri Idatanị. 25Avọọ dị Imosiisi ọnịrị ọdọvịdị Anisirẹrị nịnị ne tu Idatanị ọnịrị Abiramị, 26dị Imosiisi kà yị avaba ịragụ ka ọzọza ọ ka hụrị ẹngụ aza edivi. Asị ẹ kanyị ịsa ẹnịnị, ẹ vị ẹ ka ẹnịrị wa e vú ẹtẹ. 27Ịzẹyịza, dị avaba aza kana hụụnị ajẹngụ Ikora, ọnịrị Idatanị, ne beri Abiramị. Dị Idatanị ọnịrị Abiramị vaka ose ẹnịnị ọnịrị ezi jịnẹ va jẹẹ enoze ajẹngụ ẹnịnị nị. 28Dị Imosiisi kà aanị aza vaa zị yẹ ka Ẹnẹyịmavara ọ tụ́ ọnị ka ọnị ọ mẹ avaba ụkọrọ ẹnịnị nị. Ẹ yị vị ụsẹ ẹngụ anị ọnị aa zị. 29Aza ẹnịnị èe su usu ozu ẹnịnị, ẹ yị vị Ẹnẹyịmavara ọ tụ ọnị ụtụ. 30Ama Ẹnẹyịmavara ọ̀ọ mẹ ịvọpa, dị eteesu ha irenu, dị mụnẹ ẹnịrị ẹnya ẹnịnị, dị ẹ ngụ eku ireyi-ireyi nị, aza vaa yẹ ka ẹ sị eyi wụ Ẹnẹyịmavara. 31Ịrẹyị ọnọọ mẹ ta ka kẹnẹ, dị ịzị ẹ jẹẹ ha irenu, 32dị ọ mụnẹ Ikora ọnịrị avaba aza anị ne beri avaba ogu anị. 33Avọọ ẹnịrị ogu ẹnịnị mẹ chi ngụ ẹtẹ ireyi-ireyi dị ẹtẹ rị wa nị. 34Ịjị Anisirẹrị nịnị ana vọ wụ̀ wa owu, di e zwe ka ẹtẹ mụnẹ ẹnị nị. 35Dị ịra chi hụụ ịdị Ẹnẹyịmavara vẹ vaa rị aza ẹnị ịrẹka tụra ẹvarẹwụ anaa rị eturare ịra.
Ẹnya ịra
36Ẹnẹyịmavara ọ kà yị Imosiisi ka, 37ọ ka yị Eriyaza ozi Eerọnị ana vị ohirẹsụ irehi Ohomorihi ka ọ kụ ẹnya ana sị rị eturare ịra ẹnẹẹ hụụnị ịra, dị ọ va akịna anị ha agụvị ẹnya ẹnẹẹ vị ọnịnị. 38Aza ẹnịnị vị ene su agụvị ọnị ẹ mẹ. Ẹnya eturare ẹnịnị vị ọnịnị agụvị ka ẹ̀ kụ wa vẹ ọvịdị Ẹnẹyịmavara. Dị Ẹnẹyịmavara kà Eriyaza ọ kụ wa vabẹ dị a sị ihama tu ọ dị a sị mẹ oku ụta, dị ọ ka aza ana vọ ọnọ. 39Ịzẹyịza, dị Eriyaza ana vị ohirẹsụ irehi Ohomorihi kụ ẹnya eturare ẹnẹẹ dị aa sị ịhama tu ọ oku ana a sị ku ụta ịsọvọ. 40Ịsa ana mẹ aanị vaa ka Anisirẹrị nịnị ọnọ ka ọza kẹnẹ-kẹnẹ ọnị ẹ yị vị evere Eerọnị ẹ yị nyẹngụ nọ ọvịdị Ẹnẹyịmavara na rị eturare ịra ịrẹsụ ụta. Ọza àa vavọọ mẹ vee re ịsị tu Ikora ọnịrị aza ana saasa a. Dị Ẹnẹyịmavara kà yị Imosiisi ka ọ vavọọ mẹ nị.
Eerọnị ộ dọ aza ha
41Eyinẹhẹ anị, dị avaba ịragụ Anisirẹrị va eyi ịra ka Imosiisi ọnịrị Eerọnị ka ẹnị wụ̀ aza Ẹnẹyịmavara ha nị. 42Ịjị ịragụ sị gụ ka ẹnị ẹ va eyi ịrazị ka Imosiisi ọnịrị Eerọnị, dị ẹnị ẹẹva vara eyi ka ajẹngụ Ẹnẹyịmavara ịzị ọnịrị wa gẹ; dị Ẹnẹyịmavara sị ẹngụ zụ nị. Dị eguhi da jẹẹ, dị avaba ẹtẹ vene hweyi nyaa nị. 43Dị Imosiisi ọnịrị Eerọnị kana ọvịdị ajẹngụ ọnọọ nị. 44Dị Ẹnẹyịmavara kà yị Imosiisi ka, 45ọ hụụ ịnị akakana ẹnịnị agụvị dị ọnị ọ wụ ịtapa-ịtapa. Ama dị Imosiisi ọnịrị Eerọnị tana tụra ẹtẹ dị e va eyi ku ẹtẹ nị. 46Dị Imosiisi kà yị Eerọnị ka ọ̀ sị ẹnya anaā rị eturare ịra, dị ọ sị ịra tụ ọ, dị ọ sị eturare tụ ọ, dị ọ̀ sị ọ obobooro ọnọọ nọ ịzị aza hi, dị ọ mẹ̀ ịsọvọ ịvị ẹnịnị agụvị Ẹnẹyịmavara ọ vagu wa. Ẹnẹyịmavara du ayị hi wa ẹtẹẹtẹrẹ, dị aza ee su ha nị. 47Ịzẹyịza, dị Eerọnị mẹ̀ anka Imosiisi mẹ ka yọ nị, dị ộ sị ẹnya eturare zwe echeechi na ngụ ịnị akakana ịzị aza ee su, dị ọ sị da ịpẹ ịvị ẹnịnị nị. 48Dị ọ jẹẹ ịnị akakana aza ana yara ọnịrị aza ene su nị, dị uswọọza za ụvọ jẹẹ nị. 49Ịrẹma aza ene su beri Ikora, aza ọnị ụkụ akwoosu wụ̀ va ha vị aza ẹnị akawụ-akawụ oze ịhịmba tụra akatarẹchẹhị (14,700) 50Ịjị aza ẹ yị kụkụ su, dị Eerọnị varẹma ne tu Imosiisi enoze ajẹngụ Ẹnẹyịmavara nị.
Currently Selected:
Ịrịka 16: EBTP
Highlight
Share
Compare
Copy
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
