Ịrịka 15

Ọda ịsọvọ irenyi-irenyi ọyị mẹ

1Ẹnẹyịmavara ộ kà Imosiisi ka 2ọ ka yị Anisirẹrị nịnị ka ẹnịnị ẹ̀ẹ sị ngụ ịnị ẹtẹ ọnị ọnị vaa sị yị wa, 3di e si ka ẹnị ẹ mẹ̀ ịsọvọ ene vee hine ọnị ayị nị, ẹ sị uye ịsọvọ ọnọọ hụụnị ịsụpa ẹnịnị. Ọ daka vị ịsọvọ tụra ịsọvọ ana aā rị ịra, ọ vị ịzẹzẹ, a vị ịsọvọ ayohine, a vị ịsọvọ ana aā mẹ ịnị eche irenyi-irenyi ana aā rị ịrayị-ịrayị. 4Ọza anaa sị ẹngụ ịsọvọ ẹnẹẹ vaa yị Ẹnẹyịmavara, ọ sị ayị ikirogirami ọnya vahụra angwẹ orivi vẹ. 5Avọọ ọ mẹ rẹ vaa sị eche irita ọnya saasa ịsọvọ ozi atẹmẹ ọnyọọnya ana a vaa ka tụ ịrẹsụ ụta nị. 6A vị ịsọvọ ịdẹba yọ nị, dị aa sị ayị ikirogirami ẹẹva vahụra angwẹ orivi irita ọnya rị ẹjịjị 7ne beri eche irita ọnya rị ẹjịjị ana a và hí ịrẹsụ ụta. Agụ areyi anị o hine Ẹnẹyịmavara ayị. 8Àa sị ụnọ mẹ̀ ịsọvọ anaā rị ịra, a vị ịsọvọ kẹnẹ, a vị ịzẹzẹ, a vị ịsọvọ ẹngwọọrọ, 9ẹ sị ayị ikirogirami ẹẹta vahụra angwẹ orivi irita ẹẹva. 10Dị ẹ sị eche irita ẹẹva ana aa vaa và hí ịrẹsụ ụta agụvị agụ anị o hine Ẹnẹyịmavara ayị. 11Avọọ ọ mẹ vaa vị yị ịsọvọ ụnọ ọnịrị ịdẹba, ne beri ozi atẹmẹ a vị ẹvụ. 12Ụpẹ ịrịka aa sị mẹ̀ ịsọvọ aa sịị vavọọ mẹ nị. 13Ezi ẹtẹ Anisirẹrị nịnị ene e si ka ẹnị mẹ̀ ịsọvọ ọnị agụ anị vee hine Ẹnẹyịmavara vaa saasa avaba ọda ẹnẹnị. 14Àa nyị ọzọga ana ra beri wa ene si ka ọnị ọ mẹ̀ ịsọvọ ene hine Ẹnẹyịmavara ayị, ọ saasa avaba ọda ẹnẹẹ. 15Ezi ẹtẹ Anisirẹrị nịnị ẹnịrị azọga vị ọnyọọnya eyi Ẹnẹyịmavara. Avaba ẹnịnị ọda ẹnẹnị za pooro nị. 16#Ire 24.22Ọda ana za Anisirẹrị nịnị ọ rẹ yị za azọga ana ya ịnị akakana ẹnịnị nị. 17Ẹnẹyịmavara ọ rẹ kà a Imosiisi ka 18ọ ka yị Anisirẹrị nịnị ka ọnị ọ raa sị wa na ngụ ẹtẹ ọnị ọnị sị wa aa nọ aanị, 19ẹ̀ẹẹ ya rị ịsa ẹtẹ, ẹ sị ịsa va yị ọnị. 20Ẹ̀ mẹ apapa hụụnị ayị ịpaapa ẹnịnị va yị ọnị anka a mẹrẹ mẹ akụ ịpaapa ene e tú avọọ nị. 21Avọọ ụnanka ẹnịnị mẹ vaa mẹẹ hí Ẹnẹyịmavara pooro nị. 22Ama aza ẹnyị ịnị ẹngụ ẹnịnị èe nyeeyi sị ahụ jịnẹ ọda ọnị Ẹnẹyịmavara sị yị Imosiisi aanị, 23a vị àa nyị aza ịnị evere ẹnịnị ana sị ahụ jịnẹ ọda ẹnẹnị ụhụhwọọ, 24a vị ka avaba ịragụ o nyeeyi va jịnẹ ọda ẹnyẹẹnyị, dị ịragụ sị ụnọ ọnịrị ayị vaka eche mẹ̀ ịsọvọ ene hine Ẹnẹyịmavara ayị. Anka ọda mẹ kà a, dị a sị ịdẹ mẹ̀ ịsọvọ ịvị. 25Dị ohirẹsụ irehi Ẹnẹyịmavara sị ịsa ịsọvọ ẹnẹnị da ịpẹ ịvị ịragụ Anisirẹrị nịnị, dị Ẹnẹyịmavara ọ vagu wa agụvị ka ẹnịnị ẹ yị yẹ. Dị ọ nị wa agụvị ịsa ịsọvọ ana a rị ịra ọnịrị ịsọvọ ịvị ẹnịnị. 26Àaa vavọọ sị ọ mẹ, dị Ẹnẹyịmavara vagu avaba ịragụ Anisirẹrị ẹnịrị azọga ana ra beri wa agụvị ka avaba ẹnịnị saka-saka ẹ nyị ụvọ tụ ịnị ọnọọ nị. 27#Ire 4.27-31Ọza ịnya ọ̀ọ nyeeyi mẹ ịvị, dị ọ sị ịdẹ ịrayị ọnya na mẹ̀ ịsọvọ ịvị anị. 28Dị ohirẹsụ irehi Ẹnẹyịmavara da ịpẹ ẹvagu ịvị anị ọvịdị Ẹnẹyịmavara, dị ọ vagu ọ. 29Ọda ọnọnị vị ana za ezi ẹtẹ ọnịrị anikinami ene èe nyeeyi mẹ ịvị. 30Ama ozi ẹtẹ ọnịrị anikinami ana aa sị ayị ọvị du Ẹnẹyịmavara vị ana a vaa wụ̀ ọ, 31ka ọ sị eyi wụ́ ịrẹyị Ẹnẹyịmavara, dị ọ yẹ va jịnẹ ọda anị, ọnị ọ kụ usu tu ẹngụ anị nị.

Ụya ana a sị rị ọza ana jịnẹ ọda ẹkụhị ụhwọtụ

32Â nyị ụmẹ ọnya aanị, ịnị ụmẹ ọnọọ Anisirẹrị nịnị hi ịnị ụnọmị. Ẹnịnị e re ọza ana kụ ọkụ gụ ẹkụhị ụhwọtụ. 33Dị a za a ne tu Imosiisi ọnịrị ne beri ịragụ ana vọ nị, 34ka ẹnịnị ẹ yị yẹ ịsị a vọrọ ka a mẹ̀ ẹ, di e gu oze hi ọ nị. 35Dị Ẹnẹyịmavara kà yị Imosiisi ka a vọrọ ka a wụ̀ ọ nị. Avaba anẹkụra ẹ sị ọ nọ ịrẹma ẹkụra, di e tu ọ ịrẹtịrẹta di o su. 36Ịzẹyịza, dị avaba anẹkụra sị ọ nọ ịrẹma ẹkụra ịzị ẹ yaa sị ịrẹta wụ anka Ẹnẹyịmavara mẹ mẹ ọda yị wa.

Ọda ana za ụtụtọ awuru

37Ẹnẹyịmavara ộ kà yị Imosiisi ka, 38#Ọda 22.12ọ ka yị Anisirẹrị ka ẹ gẹ izahu tụ ụtọ achị, dị ẹ sụ́ owu ọdọzeeyirị za ọnyọọnya anị. 39Ẹnịnị e re izahu ẹnịnị, ẹ vaa tama wa ayị ọda Ẹnẹyịmavara, dị ẹ saasa a, Ẹnịnị ẹ yị kụkụ vaa mẹ ịsị ọnị e yee si anka ẹ mẹ vịdị mẹ̀. 40Avọọ ẹnịnị mẹ vaa tamayị avaba ọda anị, di e sị ẹngụ ẹnịnị chire Ohomorihi ụvọ nị. 41Ẹnẹyịmavara kà ọnị ọ vị Ohomorihi ana kụ wa jịnẹ hụrị Ijipiti.

Currently Selected:

Ịrịka 15: EBTP

Highlight

Compare

Copy