Ireevi 22
22
Ịsọvọ ọnị Ohomorihiī dọ.
1Ẹnẹyịmavara ộ kà a yị Imosiisi ka, 2Ọ̀ kà a yị Eerọnị ọnịrị ezi anọrụ anị ka ẹnịnị ẹ̀ sị ụbanyị yị ịsa ọnị Anisirẹrị nịnị sị tụ irenyi ka à sị yị ọnị, agụvị à sị ẹnịnị na sị ụvọ ịyẹyẹ za ịrẹha ọnịnị anị. Ọnị ọ vị Ẹnẹyịmavara nị. 3Ọ kà Imosiisi ọ̀ kà a yị wa ka, àa nyị ọza ọnyọọnyị ịnị ẹnị evere Eerọnị ana na kanyị ịsa ana Anisirẹrị nịnị sị tụ irenyi ka à sị yị ọnị, dị ọnị ụvọta ẹ̀ yị nị nị, ọza ọnọọ ẹ́ yị ma vana kụkụ vẹ ịnị ụta ịsọvọ anị va mẹ̀ ụkọrọ pooro, ọnị ọ vị Ẹnẹyịmavara nị. 4À sị a nyị evere Eerọnị ana nyị ụkụ ọbanyị à vị ọnị enyi ẹngụ ọnọrụ anị aa và ana rị ịsa a sị tụ irenyi yị ọnị, ẹ̀ yị vị ịhị ọza ọnọọ sị nị, ohirẹsụ irehi Ohomorihi ọnyọọnyị ẹ́ yị kụkụ nị àa vị ka ka ọ́ọ kanyị oku, à vị ka ọ́ọ và enyi ẹngụ ọnọrụ anị hi ẹngụ. 5Ohirẹsụ irehi Ohomorihi ọnọọ ẹ́ yị kụkụ nị ọ̀ọ rẹ kanyị uye à vị ọza ẹnẹ ẹ̀ yị nị. 6Ọza ana àa kanyị ẹngụ ịsa ẹnẹẹ ọnyọọnyị ẹ́ yị kụkụ nị pooro dị oruva ò tu ịhị ọnọọ. Ọza ọnọọ ẹ́ yị vaa rị ịnị ịsa a sị tu irenyi yị Ohomorihi ẹ̀ yi vị ọ́ sị enyi hụ. 7Ịjị ọyị ọ̀ọ sị ngụ ẹtẹ, ọza ọnọọ vaa nị; ị́rẹma anị, ọ kụkụ zụ rị ịnị ịsa ọnịnị ọnọnị, agụvị ka ịsọyịrị anị ẹ́ vị nị. 8Ohirẹsụ irehi Ohomorihi ẹ́ yị vaa nyayịnẹẹ rị uye ịsụpa ene sú yị ẹngụ anị, a vị ka uye ọnị uye ịnị avị ọsa wụ. Ọ̀ọ rị ọ vị́ ee sị du ẹngụ anị ẹngụ nị. Ọnị ọ vị Ẹnẹyịmavara nị. 9Ẹnẹyịmavara kà, avaba ohirẹsụ irehi Ohomorihi ẹẹ saasa ọda ọnị ọnị sị yị wa. Ẹ̀ yị vị avọọ, ẹnịnị va mẹ̀ ịvị, di e su agụvị ka ẹnịnị ee sị ahụ jịnẹ ọda ọnị Ohomorihi, Ẹnẹyịmavara ana nyị wa tụ irenyi yị ẹngụ anị nị. 10Ọza ọnị ẹ̀ yị vị aza ohirẹsụ irehi Ohomorihi ẹ́ yị vaa rị ịnị ịsị a sị va yị Ohomorihi irenyi, ọzọga ene ve heyi ohirẹsụ ịrẹsụ Ohomorihi à vị ọza ana á dọ ka ọọ mẹ̀ ụkọrọ ịdị anị ẹ́ yị vaa nyayịnẹẹ rị ịnị ịsa ọnịnị ọnọnị. 11Ama ọrịhị ọnị ohirẹsụ irehi Ohomorihi ọ̀ọ sị ẹkẹhị anị hị́, à vị ẹnị ana a ma ịnị eehi anị ẹ zụ rị ịnị ịsị ọyịrị ana a sị yị ọ. 12Ozi ọnẹẹ ohirẹsụ irehi Ohomorihi ọ̀ọ na vá ọnọrụ ẹnẹ ẹ̀ yị vị ohirẹsụ irehi Ohomorihi, ẹ́ yị kụkụ zụ rị ịnị ịsị ọnịnị ẹnẹnị. 13Ama ana àa vị osoku à vị ka vị́ ó yi ọnọrụ ama dị ẹ̀ yị nyị ozi, dị ọ vavẹ va ra ịnị eehi ada anị anka ịjị ọnị ọ vị ozweyi nị, ọ nyẹngụ rị ịsọyịrị ana a sị va yị ada anị agụvị ka ọ́ọ vị ohirẹsụ irehi Ohomorihi. Aza ohirẹsụ irehi Ohomorihi kẹnẹ ẹ zụ rị ịnị ịsa ọnọọ nị. 14Ọza ẹnẹ ẹ̀ yị vị aza ohirẹsụ irehi Ohomorihi, òo nyeeyi na rị ịsa ọnịnị ọnọnị, ọza ọnọọ vee sị ohirẹsụ irehi Ohomorihi ụta ịsa ọnọọ ọpa ọnị ọ vị gẹdẹ-gẹdẹ, dị ọ varẹma sị achehi ẹẹhị anị vaka ẹ yị ọ. 15À sị ohirẹsụ irehi Ohomorihi sị eyi ịyẹyẹ ré ịsa ọnịnị ana Anisirẹrị nịnị sị va yị Ẹnẹyịmavara, 16dị ẹ zẹẹ ka ọza ọnị ẹ yị sị oze yi ka ẹ̀ rị ọ, ẹ̀ va rị wa, ọnọnị vị ana vaa mẹ ka ọza ọnọọ ọ̀ rị ịvị, dị ọ rị ụya anị. Ọnị ọ vị Ẹnẹyịmavara ana vara ịsa ẹnẹẹ ọnịnị nị. 17Ẹnẹyịmavara ộ kà a yị Imosiisi ka 18Ọ̀ kà a yị Eerọnị ọnịrị ezi anị beri avaba Anisirẹrị nịnị ana vọ ka: ịhị ọza ọnyọọnyị ịnị Anisirẹrị nịnị à vị anẹkụra ọsa ana va ra ịnị ẹtẹ Isirẹrị ọ̀ọ sị ịsị ịsọvọ ana aā rị ịra vẹ, àa vị ọ́ sị ve si ụta eku ọnị ọ́ hị́ nị, à vị ka vị́ ọ sị va mẹ ẹyịza kẹnẹ nị, a sị ọ vị ịsụpa ana zị oze ọnyọọnyị tụ ọkụmị. 19Àa ka Ohomorihi ọ̀ dọ ịsọvọ ọnọọ, ịsụpa ọnọọ ọ̀ vị araka ẹnẹ ẹ̀ yị tụ ọkụmị vụrụ-vụrụ, ọ̀ọ vị ụnọ, ọ̀ọ vị atẹmẹ, ọ̀ọ va vị ẹvụ. 20#Ọda 17.1Ọ kà a sị ẹ sị ịsụpa ọnị ịsa aa zịị va mẹ̀ ịsọvọ, agụvị ka Ohomorihi ẹ́ yị vaa dọ. 21Ọza ọnyọọnyị àaa vaa mẹ̀ ịsọvọ ẹngwọọrọ hi Ẹnẹyịmavara hụụnị imaaru à vị atẹmẹ ọnị ọ́ pa, àa vị ọ ka ọnị ọ̀ sị vee si ụta eku ọnị ọ́ hị́ nị, avịka vị́ ọ sị va mẹ ẹyịza kẹnẹ nị, ọ̀ vị ịsụpa ẹnẹ ẹ̀ yị tụ ọkụmị vụrụ-vụrụ àa ka Ẹnẹyịmavara ọ̀ dọ. 22Asị ẹ sị ịsụpa ene gu eyi, à vị ene che ahụ, a vị ana jị avụ va mẹ̀ ịsọvọ hi Ẹnẹyịmavara; asị ẹ sị ịsụpa ana nyị ịtahụ enee tú, a vị ọnị ịpankụrụ zá va yị Ẹnẹyịmavara o. Asị ẹnịnị sị ẹngụ ịsụpa ọnọọ ọnyọọnyị va mẹ̀ ịsọvọ ịrẹsụ ụta anka ịsọyịrị yị Ẹnẹyịmavara. 23Ẹnẹyịmavara kà Anisirẹrị nịnị ẹ́ zụ sị ịsụpa ọnị ahụ anị ẹnyị gọdọ, a vị weyi huna ọsa va mẹ̀ ịsọvọ kẹnẹ, ama àa vị aa sị vee si ụta eku ọnị ọ́ hị́ nị, Ohomorihi ẹ́ yị vaa dọ. 24Ọ kà à sị ẹnịnị sị ịsụpa ana a tọ̀ ụnava ịnị ihimpa à vị ana a nị va mẹ̀ ịsọvọ hi Ẹnẹyịmavara. Ọnị ẹ́ yị zẹẹ ka maanị mẹ ịnị ẹtẹ ẹnịnị 25À sị Anisirẹrị nịnị sị ịsụpa ẹnẹ ẹ́ dọ hụụnị ụvọ anẹkụra ọsa va mẹ̀ ịsọvọ ịsọyịrị yị Ohomorihi. Ẹngụ ịsụpa ẹnẹẹ vị ọnị Ohomorihi ee ré ka ọkụmị ẹ vị nị; Ẹ́ yị vaa dọ ọ. 26Dị Ẹnẹyịmavara kà a yị Imosiisi ka, 27Imaaru à vị atẹmẹ, à vị ẹvụ ẹ̀ẹ ma ozi, a sị á dọ ọnyị anị pooro dị ọ̀ mẹ ẹkụhị ịhịmba; hụrị ịhị ẹ tụ ọ ẹkụhị ịhịnta, Ohomorihi ọ́ọ dọ ka a sị va mẹ̀ ịsọvọ ịsọyịrị yị ọnị. 28Ọ kà, à sị ẹ́ wụ imaaru ọnịrị ozi anị; a sị ẹ rẹ wụ atẹmẹ ọnịrị ozi anị à vị ẹvụ ọnịrị ozi ịnị ẹkụhị ọnya o. 29Ẹnịnị àa mẹ̀ ịsọvọ ọ̀ yị kụ Ẹnẹyịmavara avọọ, ẹnịnị ẹ̀ saasa ọda anị ụvị ọ̀ dọ rị. 30Ọ kà ẹnịnị ẹ̀ rị ịsa ịsọvọ ọnọọ ịhị ẹnẹ ẹ mẹẹ gẹdẹ-gẹdẹ. A sị ẹ zẹẹ ka ọ̀ vọ tu eyinẹhẹ anị. Ọnị ọ vị Ẹnẹyịmavara nị. 31Avọọ, ẹnịnị ẹ̀ sị ụvọ za ọda anị, dị ẹẹ saasa wa. Ọnị ọ vị Ẹnẹyịmavara nị. 32À sị ẹ sị ụvọ ịyẹyẹ za ịrẹha ọnịnị anị; ama avaba Anisirẹrị nịnị ẹ̀ sị ụbanyị ọnị. Ọnị ọ vị Ẹnẹyịmavara ana nyị wa tu irenyi yị ẹngụ anị nị. 33Ọnị ọ kụ wa hụrị ẹtẹ Ijipiti ka ọnị ọ̀ vị Ohomorihi ẹnịnị nị. Ọnị ọ vị Ẹnẹyịmavara nị.
Currently Selected:
Ireevi 22: EBTP
Highlight
Share
Compare
Copy
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
