Ireevi 21
21
Ido Ohirẹsụ irehi Ohomorihi
1Ẹnẹyịmavara ộ kà yị Imosiisi ka ọ jị ido ẹnịnị yị ezi Eerọnị ana ohirẹsụ irehi Ohomorihi. Ộ ka enyisi ọ vị nị ka ọza ẹnyẹnyị ẹnịnị ọ kanyị oku anda ẹnịnị eni ee su. 2Ama ẹ yị nyị ọ mẹ ka, ọza ịnị ẹngụ ọza oo su. Ẹhụ ọza ẹngụ ọza anka ọnyị ọza, ada ọza, ọyịnyara ọza, 3ọ daka vị ozwoorihi ọnị ẹ yị nyị ọnọrụ ana gụrị ọza. 4Vọrọ ka ohirẹsụ irehi Ohomorihi nịnị ẹ kanyị ịsa ene vee du wa ẹngụ anka ọdọvịdị aza. 5#Ire 19.27,28; Ọda 14.1Asị ẹnịnị zị ẹngụ oku pooro dị ẹ kụ́ ịrẹsụ, a vị dị ẹ hara ịrẹsụ, a vị dị ẹ jị ịrẹkụ. 6Ẹnịnị ẹ mẹ̀ ebira aza Ohomorihi, asị ẹ mẹ̀ ụhị nyị ịrẹha anị; ka ẹ yaa sị ịsa ịsọvọ vaa yọ, ẹnịnị ẹ za ido. 7Ohirẹsụ irehi Ohomorihi nịnị vị aza anị. Agụvị avọọ ẹnịnị ẹ yị vaa nyị ọsẹrẹka, a vị ọnyẹnẹẹ anaa sị hụ, a vị ọza ene ree yi ọnọrụ. 8Ẹnịnị ẹ raa ẹhẹ ẹnịnị agụvị ịsa ịsọvọ ọnị ẹ sị yị Ohomorihi, Ẹnẹyịmavara ana nyị wa tụ́ irenyi vị ọza ọnịnị agụvị ẹnịnị ẹ vị aza ọnị ẹhẹ ẹnịnị nị. 9Ozi ohirẹsụ irehi Ohomorihi àa sẹ̀ ịrẹka, aa mẹ̀ ụhị nyị ada nị ọnịrị ẹngụ anị avọọ nị. A rị ọ ịra o su. 10Ohirẹsụ irehi Ohomorihi ọbanyị vị anaa ka angwẹ hi ịrẹsụ ọnị aa sị nyị ọ ka ọ navọ ka ẹyị anị o ta iyere hị́ ọ ịrẹsụ a vị ka ọ zị ẹngụ oku dị ọ ha awuru anị hi ẹngụ. 11Ọ yị vaa gụrị oku ọ daka vị ada anị ọ vị ọnyị anị agụvị asị o du ọ ẹngụ. 12Ohirẹsụ irehi Ohomorihi ọbanyị ọ yị vaa hụụnị ajẹngụ Ohomorihi nọ izoku. Enyisi ọ vị nị ka ọ vavọọ mẹ̀ nị. Ẹnẹyịmavara kà ọnị sị angwẹ nyị ọ ka ọ vị anị nị. 13Abaabo ọ vị ka ohirẹsụ irehi Ohomorihi ọ nyị ozwoorihi ọnị ẹ yị yẹ ọnọrụ nị. 14Ẹngụ ozwoorihi ọnọọ vị ana hụnị ịrẹsụ Anireevi, ọ yị vaa nyị ọsẹrẹka, a vị ozi anaa sị hụ, a vị ọza ene yi ọnọrụ da. 15Ọ yị vaa mẹ̀ ụhị nyị ezi anị ịnị akakana aza anị, agụvị ka Ẹnẹyịmavara ọ raa nyị ọ tụ́ irenyi. 16Ẹnẹyịmavara ộ ka yị Imosiisi 17ka ọ̀ ka yị Eerọnị ka asị a nyị ụmẹ ọnị evere ana vị ọkụmị sị sịị ịsa ịsọvọ va yị ọnị. 18Ọda ọnọọ ọ za ogweyi, oswahụ, ọza ana nyị akanya eyirẹsụ ọnịrị ịnị ọchẹngụ 19Avọọ ọ mẹ za ochahụ a vị ọza ene che ụvọ, 20ọnịka ọnịrị ọza ana jị akụrẹ, ọza ana nyị akanya eyi a vị ụkụ ẹngụhụ neberi ọza ọnị ata anị sị va ha. 21Ẹ yị nyị evere Ireevi ana vị ohirẹsụ irehi Ohomorihi ana nyị ụkụ ọnyọọnyị ana vaa sị̀ ịsa ịsọvọ vẹ ọvịdị Ẹnẹyịmavara vụrụ-vụrụ. 22Ẹngụ ọza ọnọọ ọ yị zụ rị ịsa ịsọvọ Ohomorihi, ịsa ịsọvọ ọnịnị ọnịrị ịsa ịsọvọ ọnịnị keekere. 23Asị ọ ka gụrị ịta ana a sị jị oze a vị ka ọ gụrị ụta ịsọvọ. Asị o du ịsa ọnịnị ẹnẹnị ẹngụ agụvị ka Ẹnẹyịmavara ộ raà mẹ wa ọnịnị. 24Avọọ Imosiisi mmẹ ka yị Eerọnị ọnịrị ezi anị beri avaba Anisirẹrị nịnị nị.
Currently Selected:
Ireevi 21: EBTP
Highlight
Share
Compare
Copy
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
