Ireevi 23

Eche irenyi-irenyi ana Anisirẹrị nịnịị̄ rị

1Ẹnẹyịmavara ộ kà a yị Imosiisi ka, 2ọ̀ kà a yị Anisirẹrị nịnị ka, eche ẹnẹnị ẹnịnị vaa rị dị avaba ẹnịnị wara gụ ọ̀ yị hẹkẹ ọnị nị.

Ẹkụhị Ụhwọtụ

3 # Kụra 20.8-10; 23.12; 31.15; 34.21; 35.2; Ọda 5.12-14 Ọ kà, ẹkụhị ịhịnọnyị ẹnịnị vaa sị mẹ̀ ụkọrọ nị, ịhị ẹ tụ ọ ẹkụhị ịhịmba vị ẹkụhị ụhwọtụ, vị́ ẹ vaa sị tụ́ ụhwọ́ nị. Ẹnịnị ẹ́ yị vaa mẹ̀ ụkọrọ ọnyọọnyị ịhị ọnọọ, ama ẹnịnị vaa wara a gụ, dị ẹ̀ hẹkẹ ọnị. Aha tụra aha ẹnẹ ẹ̀ẹ ya, Ẹnẹyịmavara ọ nyị ẹkụhị ụhwọtụ ọnọọ nị.

Eche Ọyịparahu ọnịrị Ịbụrẹdị ẹnẹ ẹ yị nyị òwù

(Ịrị 28.16-25)

4Eche ẹnẹnị Ẹnẹyịmavara kà ẹnịnị ẹẹ rị, dị ẹẹ waraa gụụ hẹkẹ ọnị nị. Ụmẹ eche ẹnẹẹ òo si tu, Imosiisi ọ̀ nọ̀ ọ yị wa. 5#Kụra 12.1-13; Ọda 16.1,2Eche ọyị para hu vị ẹnẹ ẹ vaa rị ọyị sị ụbanyị yị Ẹnẹyịmavara ịnị oruva ẹkụhị ẹwụrẹna ịnị ụhwẹ ịpaapa ẹnịnị. 6#Kụra 12.14-20; 23.15; 34.18; Ọda 16.3-8Ịhị ẹ tụ ọ ẹkụhị ẹwụrẹhị ịnị ụhwẹ ọnọọ ọnyọọnya, ẹ́ vaa rị eche ịbụrẹdị ọnị ọza ọ̀ yị sị owu tụ nị. Pooro dị ọ̀ mẹ ẹkụhị ịhịmba, ẹnịnị ẹ́ yị vaa rị ịbụrẹdị ana á sị owu tụ́. 7Ịnị ẹkụhị ịpaapa ọsẹ ana aa rị eche ọnọọ, ẹnịnị vaa waraa gụ dị ẹ̀ hẹkẹ ọnị. Ẹnịnị ẹ́ yị vaa mẹ̀ ụkọrọ ẹnẹ ẹẹ mẹ eyinị-eyinị. 8Ọ kà ẹkụhị ịhịmba ẹnẹ ẹ yaa rị eche ọnọọ vị, vị ẹnẹ ẹ vaa sị ịsọyịrị mẹ̀ ịsọvọ yị Ẹnẹyịmavara. Ịhị ẹ tụ ọ ẹkụhị ịhịmba, ẹnịnị vaa waraa gụ, dị ẹ̀ hẹkẹ ọnị. À sị ẹnịnị mẹ̀ ụkọrọ ọnyọọnyị ẹnẹ ẹẹ mẹ eyinị-eyinị. 9Dị Ẹnẹyịmavara rẹ kà a yị Imosiisi ka, 10ọ kà a yị Anisirẹrị nịnị ka, ịhị ẹnịnị ẹ̀ẹ va sị ngụ ịnị ẹtẹ ọnị ọnị aa sịị yị wa, dị ẹnịnị kụ ịsa ịnị aarẹ ẹnịnị gụ nị, ẹnịnị ẹ̀ sị ọdụ ịsị ịpaapa ẹnẹ ẹ kụ́ gụ vẹ ịdị ohirẹsụ irehi Ohomorihi. 11Ọ vaa sị ọdụ ọnọọ yị Ẹnẹyịmavara, ẹyịza ọtirenyi ọ vị yị Ẹnẹyịmavara nị agụvị ọ̀ dọ wụ nịnị. Eyinẹhẹ ẹkụhị ụhwọtụ ohirẹsụ irehi Ohomorihi vaa sịị sị ọ yị Ẹnẹyịmavara nị. 12Ẹkụhị ọnị ẹ̀ẹ sị ọdụ ọnọọ yị Ẹnẹyịmavara, ẹnịnị ẹ̀ rẹ sị ịdẹba ịrayị ọnya ọnị ẹ̀ yị nyị ịsaa zị mẹ̀ ịsọvọ ana aa rị ịra hi Ẹnẹyịmavara. 13Ọ kà ẹnịnị ẹ̀ sị ayị ọyịkwọ ẹ̀ hụ ikirogirami ẹẹva avọọ, dị a sị angwẹ orivi hùra a, dị ẹ̀ sị mẹ̀ ịsọvọ ịsọyịrị. Agụ ịsa ịsọvọ ọnọnịị hine Ẹnẹyịmavara ẹtẹẹtẹrẹ. Ọ kà ẹnịnị ẹ̀ rẹ sị eche chee aanị vaka ịsa ịsọvọ ẹnịnị ọnọọ. 14Ọ kà a sị ẹnịnị rị ịsa ọwọọwa ọnyọọnyị, ọ̀ọ vị ẹrẹẹrẹ, èe hù ọ, àa va sị mẹ ịbụrẹdị, ẹ̀ yị vị ịjị ẹ́ raa sị ẹyịza Ohomorihi va yị ọ. Ọ kà avaba evere ẹnịnị ẹ vaa saasa ọda ọnọnị pooro nị.

Eche ịsa ọyịna

(Ịrị 28.26-31)

15 # Kụra 23.16; 34.22; Ọda 16.9-12 Ẹnẹyịmavara kà ẹnịnị vaa za ọsẹ ọyịvụrụ-ọyịvụrụ ịhịmba ịrịka hụrị eyinẹhẹ ẹkụhị ụhwọtụ, ẹnẹ ẹ sị aku ọda ọnya na yị Ẹnẹyịmavara avọọ. 16Ịhị ẹ tụ ọ ẹkụhị ẹvarẹwụ ana rẹ vị eyinẹhẹ ẹkụhị ụhwọtụ, ẹnịnị rẹ vaa sị akụ ọwọọwa naa mẹ̀ ịsọvọ yị Ẹnẹyịmavara. 17Ovwoovu ikonya-Ikonya vaa sị ịbụrẹdị ẹvẹẹva vẹ ana a vaa sị mẹ ẹyịza oturenyii yị Ẹnẹyịmavara. Ayị ọyịkwọ ikirogirami ẹvẹẹva a vaa sị mẹ ịbụrẹdị ọnyọọnya nị. A vaa sị owuu tụ ọ. Ụbụrẹdị ẹnẹnị vị ọnị a vaa sị mẹ ẹyịza akụ ịpaapa ana a kụ hụụ ịnị aarẹ yị Ẹnẹyịmavara. 18Anisirẹrị nịnị vaa sị ozi atẹmẹ ịrayị ọnya, ụnọ ọnya, ọnịrị ịdẹba ẹẹva beri ịbụrẹdị ẹnẹẹ vẹ. Asị a nyị ọnị ịsa zị ịnị ịsụpa ẹnẹnị. Ẹnịnị vị ana vaa sị mẹ̀ ịsọvọ ana aa rị ịraa yị Ẹnẹyịmavara, beri akụ ọnịrị eche. Agụ ịsọvọ ọnọnịị vi enee hine Ẹnẹyịmavara. 19Ọ kà ẹnịnị ẹ̀ sị ịdẹ ọnya dị ẹ̀ sị mẹ̀ ịsọvọ ịvị, dị ẹ̀ rẹ sị ịdẹba ịrayị ọnya ẹẹva dị ẹ̀ sị mẹ̀ ịsọvọ ẹngwọọrọ. 20Ohirẹsụ Irehi Ohomorihi vaa sị ịbụrẹdị ọnọọ beri ezi atẹmẹ ẹyịva ẹnẹnịị mẹ̀ ịsọvọ oturenyi yị Ẹnẹyịmavara. Ịsa ọnịnị ẹyịza ẹnẹnị vị̀ yị Ẹnẹyịmavara nị; ohirẹsụ Irehi Ohomorihi nịnị ẹ vaa nyị nị. 21Ọ kà asị ẹnịnị mẹ̀ ụkọrọ ẹnẹ ẹẹ mẹ eyinị-eyinị, ama ẹnịnị ẹ̀ wara gụ dị ẹ̀ hẹkẹ ọnị. Avaba evere ẹnịnị vị ana vaa saasa ọda ọnọnị pooro, aha tụra aha ẹnẹ ẹẹ ra. 22#Ire 19.9,10; Ọda 24.19-22Ẹnẹyịmavara ộ kà a yị Imosiisi ka, ẹnịnị àaa kụ ịsa ịnị aarẹ ẹnịnịị gụ, à sị ẹ́ mẹẹ na ngụ ụtụụtọ aarẹ ẹnịnị. Â sị ẹnịnị rẹ varẹma na tọ̀ọ ịzaha ana a para hu ẹnịnị ẹ̀ naavọ tịtẹ yị oniruwa ẹnịrị anẹkụra ọsa nịnị ene hi ịzọọ.

Eche Ịkakanchị

(Ịrị 29.1-6)

23Ẹnẹyịmavara ộ kà a yị Imosiisi ka 24ọ̀ kà a yị Anisirẹrị nịnị ka, ẹkụhị ịpaapa ịnị ụhwẹ ọhụhịmba, vị ẹkụhị ana avaba ẹnịnị vaa sị tụ́ ụhwọ́. E vee hú ọpanyị ịhị ọnọọ dị avaba ẹnịnị wara gụ dị ẹ hẹkẹ ọnị. 25Ọ kà ẹnịnị ẹ̀ mẹ̀ ịsọvọ ana a rị ịraa hi Ẹnẹyịmavara ịhị ọnọọ, dị à sị ẹ́ mẹ̀ ụkọrọ ẹnẹ ẹẹ mẹ eyinị-eyinị ịhị ọnọọ.

Ẹkụhị ọbanyị ọyị mẹ ẹvagu

(Ịrị 29.7-11)

26 # Ire 16.29-34 Ẹnẹyịmavara ộ kà a yị Imosiisi ka, 27ịhị ẹ tụ ọ ẹkụhị ẹẹwụ ịnị ụhwẹ ọhụhịmba ọnọnị ọ vị ẹkụhị ọbanyị ana aā sịị vagu ịvị yị aza nị. Ẹkụhị ẹnẹ ẹnịnị vaa sị waraa gụụ hẹkẹ ọnị ọ vị nị. Ọ kà ẹkụhị ọnọọ vị ẹnẹ ẹnịnị vaa sị awẹ, dị ẹnịnị va mẹ̀ ịsọvọ ana aa rị ịraa hi Ẹnẹyịmavara. 28A sị ẹnịnị mẹ̀ ụkọrọ ọnyọọnyị ịhị ọnọọ, agụvị ka ẹkụhị ọnọọ vị ana aa sịị mẹ ido ana a vaa sị vagu ịvịị yị aza. 29Ọ kà ọza ana àa rị ịsa ọnyọọnyị ịhị ọnọọ, ọnị Ẹnẹyịmavara ẹ́ yị ma vana za a ịrịka beri aza anị. 30Ọza tụra ọza ana àa na mẹ̀ ụkọrọ ọnyọọnyị ịhị ọnọọ vị ọnị ọnị vaa wụ̀. 31Ẹnẹyịmavara kà avaba evere Anisirẹrị nịnị ọnị mẹ ọda ọnọnịị yị nị, aha tụra aha ẹnẹ ẹẹ ra. 32Hụrị oruva ịhị ẹ tụ ọ ẹkụhị ọhụhịịna ne tu oruva ịhị ẹ tụ ọ ẹkụhị ẹẹwụ ịnị ụhwẹ ọhụhịmba vàa vị ẹkụhị ọtirenyi ọnị ụ vaa sị tụ́ ụhwọ́ nịnị. Ọza ẹ́ yị vaa rị ịsa ọnyọọnyị ụmẹ ọnọnị.

Eche ana aā ya ịnị ajẹngụụ rị

(Ịrị 29.12-40)

33 # Ọda 16.13-15 Ẹnẹyịmavara ộ kà a yị Imosiisi ka 34ọ̀ kà a yị Anisirẹrị nịnị ka, ịhị ẹ tụ ọ ẹkụhị ẹwụrẹhị ịnị ụhwẹ ọhụhịmba ọnọnị, ẹnịị vee nyima eche ana aa ya ịnị ajẹngụụ rị nị. Ẹkụhị ịhịmba ẹ vaa rị ọ vị nị. 35Ọ kà ẹnịnị ẹ̀ wara gụ ịnị ẹkụhị ịpaapa ọnị eche ọnọọ ee nyima, dị ẹ̀ hẹkẹ ọnị. À sị ẹ́ mẹ̀ ụkọrọ ọnyọọnyị ẹnẹ ệ mẹ eyinị-eyinị. 36Eyinị-eyinị ịnị ẹkụhị ịhịmba ana aa rị eche ọnọnịị vị, ẹnịnị vaa sị mẹ̀ ịsọvọ ana a rị ịraa yị Ẹnẹyịmavara nị. Ịhị ẹ tụ ọ ẹkụhị ịhịnta, ẹnịnị rẹ vaa waraa gụ dị ẹ̀ hẹkẹ ọnị. Ẹnịnị rẹ vaa mẹ̀ ịsọvọ ana aā rị ịra yị Ẹnẹyịmavara ịhị ọnọọ, Ẹkụhị ahẹkẹ ọ́ vị nị, a sị ẹ mẹ̀ ụkọrọ ọnyọọnyị ịhị ọnọọ. 37Eche ọnị Ẹnẹyịmavara kà aa rị ọ̀ yị sị ụbanyị yị ọnị yị. Ụmẹ ana Anisirẹrị nịnị vaa sị waraa gụụ hẹkẹ ọnị ẹ́ vị nị; ụmẹ ọnọọ ẹ rẹ vaa sị ịsọvọ ịsọyịrị, ịsọvọ ana aā rị ịra, ịsọvọ akụ, ịsọvọ ana vọ nịnị ọnịrị ịsọvọ eche vaa yị Ẹnẹyịmavara, ịsọvọ ọzọza vị ẹnẹ ẹ vaa mẹ ịnị ẹkụhị anị. 38Eche ẹnẹnị vị ẹnẹ ẹ vaa rịị tụ irenyii yị ẹkụhị ụhwọtụ ẹnịnị obooro. Avaba ịsọvọ ẹnẹnị vị ẹnẹ ẹ rẹ vaa mẹẹ tụ irenyii yị ẹyịza ẹnẹ ẹ vịdị ịị̄ sị vaa yị Ẹnẹyịmavara, ịsọvọ ọ̀yị va mẹ̀ ịsa ọnị e hị́ eku anị, ọnịrị ẹyịza ẹnẹ ẹẹ mẹ kẹnẹ. 39Ẹnẹyịmavara kà ẹnịnị ẹ̀ẹ raa kụ ịsa ịnị aarẹ ẹnịnị gụ, ẹnịnị è nyima hụrị ịhị ẹ tụ ọ ẹkụhị ẹwụrẹhị ịnị ụhwẹ ọhụhịmba, dị ẹ̀ rị eche ọnọnị ẹkụhị ịhịmba. Ẹkụhị ịpaapa eche ọnọọ vaa vị ẹkụhị ọtirenyi ẹnẹ ẹ vaa sị tụ́ ụhwọ́. 40Ọ kà ịhị ọnọọ, ẹnịnị ẹ̀ há ẹtụtụ ene ozoza hu hụụnị ọchị ẹnịnị, dị ẹ̀ jị avụda ọnịrị avọ́ ọchị avị-avị; ẹnịnị ẹ̀ rẹ ká avị ana nyị ododo hụrị ụtọ okuha, dị ẹnịnị ẹ̀ ya ọvịdị Ẹnẹyịmavara ẹkụhị ịhịmba dị ee hine ayị. 41Ọ kà ẹnịnị vị ana vaa rị eche ọnọnị mẹ ẹkụhị ịhịmba ịnị ụhwẹ ọhụhịmba ịnị ịrayị, dị ẹyaa sị ụbanyị yị Ẹnẹyịmavara. Ọda ọnọnị vị ọnị avaba evere Anisirẹrị nịnị vaa saasa pooro. 42Avaba ẹnị Anisirẹrị vị ana vaa ra ịnị ajẹngụ ịnị ẹkụhị ịhịmba ẹnẹẹ, 43evere ẹnịnị anaa vẹ ẹ̀ zụ yẹ ka ọnị Ẹnẹyịmavara ộ mẹ̀ ka Anisirẹrị nịnị ẹ̀ ra hi ịnị ajẹngụ ụmẹ ọnị ọnị kụ wa hụrị ẹtẹ Ijipiti. Ọnị ọ vị Ẹnẹyịmavara, Ohomorihi ẹnịnị nị. 44Aanị Imosiisi mẹmẹ mẹ ẹhahi eche ọnị Ẹnẹyịmavara kà Anisirẹrị nịnị ẹẹ rị yị wa nị.

Currently Selected:

Ireevi 23: EBTP

Highlight

Compare

Copy