Ireevi 20

Ụya anaā sịị rị ọza ana mẹ̀ ebira odivi

1Ẹnẹyịmavara ộ kà a yị Imosiisi ka 2Ọ̀ kà a yị Anisirẹrị nịnị ka, àa nyị ọza ịnị ẹngụ ẹnịnị, ọ̀ọ vị anẹkụra ọsa ana ra ịnị akakana ẹnịnị ana sị ozi anị ọnyọọnyị mẹ ori ana aā hị́ Imorẹkị ẹyịza, avaba Anisirẹrị ẹ̀ sị ịrẹta-ịrẹta wụ̀ ọ. 3Ọnị nyẹmba vaa và eyi ịrazịị ka ọza ọnọọ dị ọnị é yi kuku rò o vaka aza anị, agụvị ka ộ sị ọnya ịnị ezi anị mẹ Imorẹkị ẹyịza. Ịsị ọnị ọ́ mẹ avọọ vị ọnị ọ sị du aha ana aā yaa hẹkẹ ọnị ẹngụ, dị ẹ rẹ sị mẹ̀ ụhị nyị ịrẹha ọnịnị anị nị. 4Anisirẹrị nịnị ẹ̀ẹ si eyi hụụnị ịrẹyị ọza ọnọọ ka ộ sị ọnya ịnị ezi anị mẹ Imorẹkị ẹyịza, dị ẹnịnị ẹ̀ yị wụ̀ ọ nị, 5Ọnị ụvọta vaa và eyi ịrazịị ka ọza ọnọọ ọnịrị avaba anineehi anị, ọnị ọnịrị dudu naa mẹ ori ana aā hị́ Imorẹkị, dị ẹnịnị ẹ̀ yị mẹ ịzẹyịza hi ọnị, ọnị ẹ́ yi kụkụ vaa za wa ịrịka beri aza nị. 6Ọza àa nọ ịdị aza ana aā họ̀ ụhwẹ aza ene sú usirẹyị, dị ahịka ẹnị ẹ kụkụ aa sị ajuwee yị ọ nị, ọnị Ẹnẹyịmavara vaa và eyirazịị ka ọza ọnọọ, dị ọnị ẹ́ yị kụkụ za a ịrịka beri aza anị. 7Ọ kà ẹnịnị ẹ̀ sị ẹngụ ẹnịnị tụ irenyi, agụvị ka ọnị ọ vị Ẹnẹyịmavara, Ohomorihi ẹnịnị nị. 8Ẹnịnị ẹ̀ sị ụvọ za ọda anị, dị ẹẹ saasa a, agụvị ka ọnị ọ vị Ẹnẹyịmavara ana nyị wa tụ irenyi nị. 9#Kụra 21.17; Imt 15.4; Ịmk 7.10Ẹnẹyịmavara ộ mẹ̀ ẹ ọda ka, ọza tụra ọza anaa kụ́ ada anị à vị ọnyị anịị ụhụ, à wụ̀ ọ. Ọza ọnọọ o si ẹngụ anị isu nị. À sị a nyị ọza ana á tụ ohuvọ. 10#Kụra 20.14; Ire 18.20; Ọda 5.18Ọza ọ̀ọ sị ose ọnọhụva anị, à wụ ọnọrụ ọnọọ ọnịrị ọnyẹnẹẹ ọnọọ. 11#Ire 18.8; Ọda 22.30; 27.20Ọza ọ̀ọ sị ose ada anị, ọ sị ụhị mẹ nyị ada anị. Ọza ọnọọ ọnịrị ose ada anị ọnọọ vị ana vaa wụ̀. Ẹnị ẹyịva e sị ẹngụ ẹnịnị isu nị. À sị a nyị ọza ana á tụ ohuvọ. 12#Ire 18.15Ọza ọ̀ọ sị ose ozi anị, ụnọ ẹ́ mẹ avọọ nị. Ẹnị ẹyịva a vaa wụ̀ nị. Ẹnị e si ẹngụ ẹnịnị isu nị. À sị a nyị ọza ana á tụ ohuvọ. 13#Ire 18.22Ọnọrụ òo pe ọnọrụ ọhụva anị mẹ anka ọza ọ̀ọ sị ọnẹẹ avọọ; ẹnịnị ẹ sị ụnọ mẹ. À wụ ẹnị ẹyịva. Ẹnị e sì ẹngụ ẹnịnị isu nị. À sị a nyị ọza ana á tụ ohuvọ. 14#Ire 18.17; Ọda 27.23Ọza ọ̀ọ nyị ọnyị rị ozi, ịrẹyị odivi hangụ-hangụ ọ vị ọnọọ nị. Ọnọrụ ọnọọ vị ana a vaa rị ịra a beri ọnyị rị ozi ẹnẹẹ, agụvị a sị aza kụkụ mẹ ẹngụ ebira odivi ọnọọ ịnị akakana ẹnịnị. 15#Kụra 22.19; Ire 18.23; Ọda 27.21Ọza ọnịrị ịsụpa ọ̀ọ sụ anka ọnọrụ mẹẹ sị ọnyẹnẹẹ, ọza ọnọọ vị ana a vaa wụ̀ beri ịsụpa ọnọọ. 16Ọnyẹnẹẹ ọnịrị ịsụpa ẹ̀ẹ sụ, à wụ ẹnị ẹyịva. Ẹnị e sị ẹngụ ẹnịnị isu nị. À sị a nyị ọza ana tụ ohuvọ. 17#Ire 18.9; Ọda 27.22Ọnọrụ ọ̀ọ nyị ọyịnyara anị ọnẹẹ à vị adẹnyara anị, dị ọnịrị ọ sụ nị, à mẹ̀ ụhị nyị wa eyi avaba aza, dị à dụ wa hụụnị ẹkụra. Ọnọrụ ọnọọ ó ree ré ahwaahụ ọyịnyara anị ọnẹẹ à vị adẹnyara anị, agụvị avọọ, áa nyị ka ọ̀ rị ụya anị. 18#Ire 18.19Ọnọrụ ọ̀ọ sị ọnyẹnẹẹ enee ré ịsị ụhwẹ anị, à dụ ẹnị ẹyịva hụụnị ẹkụra, agụvị ka ẹnịnị ẹ́ raà sị ahụ jịnẹ ọda ịrẹyị anaa mẹ ka à sị ọza nị. 19#Ire 18.12-14Ọza ọ̀ọ sị ọyịnyara ada anị ọnẹẹ, à vị ọyịnyara ọnyị anị ọnẹẹ, ụnọ ẹ́ mẹ avọọ nị; ẹnị ẹyịva vaa rị ụya ụnọ ẹnịnị. 20Ọza ọ̀ọ sị ose ọyịnyara ada anị à vị ose ọyịnyara ọnyị anị, vị ọ́ mẹ̀ ụhị nyị ọyịnyara ada anị à vị ọyịnyara ọnyị anị ọnọọ avọọ nị. Ẹnị ẹyịva vaa rị ụya ebira odivi ẹnẹ mẹ̀. Ẹ́ yị nyị ọza ana vaa ma ozi ịnị ẹnị ẹyịva. Ẹnịnị ẹ̀ẹ vịdị ma ozi, ozi ọnọọ vị enee sú. 21#Ire 18.16Ọza ọ̀ọ sị ose ọyịnyara anị, ịdọtị ọ vị ọnọọ nị, ọ sị ahwaahụ ọyịnyara anị ré, agụvị avọọ, ẹnị ẹyịva ẹ́ yị vaa ma ozi pooro di è sú. Ẹnẹ ẹ̀ẹ vịdị ma vị enee sú. 22Ẹnẹyịmavara kà agụvị avọọ, Anisirẹrị nịnị ẹ̀ sị ụvọ za ịrẹyị anị ọnịrị avaba ọda anị, dị ẹnịnị ẹẹ saasa wa; agụvị à sị ẹtẹ ọnị ọnị kụ wa aa vẹ ịnị anị va dụ wa va hi ẹhẹ anka ọza mẹẹ hẹ̀rẹ ịsọyịrị avọọ. 23Ọ kà à sị ẹnịnị na mẹ ẹngụ ebira ọnị anẹkụra ọnị ọnị aa dụụ kwooze yị wa aanị aa mẹ o; agụvị ka avaba ebira ẹnẹnị ẹ́ mẹ ana mẹ ka ẹnịnị ẹẹ nyị ọnị ịhyẹrẹ nị. 24Ama ọnị ọ sị kà yị Anisirẹrị nịnị ka, ẹnị ẹ vanaa nyị ẹtẹ anẹkụra ẹnẹẹ nị. Ọnị vaa sị mẹ oguu yị wa. Ẹtẹ ọnọọ vị ẹtẹ ịzị Imiriiki ọnịrị ẹhụ gwẹtẹ kẹnẹ. Ọnị ọ vị Ẹnẹyịmavara Ohomorihi ẹnịnị ana nyị wa tụ irenyi yị aza ana vọ nị. 25Ẹnẹyịmavara kà ẹnịnị è ré ka ẹnị ẹẹ sị uye ana wụra rị tụ irenyi yị uye ẹnẹ ẹ̀ yị wụra rị, dị ẹ̀ rẹ sị inomi ẹnẹ ẹ̀ yị wụra rị tụ irenyi yị ana wụra rị. À sị ẹnịnị na rị uye à vị inomi ọnị ọnị raa kà a ka é yi zoza di è ve si du ẹngụ ẹnịnị ẹngụ. 26Ọ kà ẹnịnị ẹ̀ sị ẹngụ ẹnịnị tu irenyi yị ọnị, agụvị ka ọnị Ẹnẹyịmavara vị ana sị ẹngụ anị tụ irenyi. Ọnị ọ sị wa nyị tụ irenyi yị aza ana vọ, ka ẹnịnị ẹ̀ vị aanị. 27Ọnọrụ ọnyọọnyị à vị ọnyẹnẹẹ ana àaa na họ̀ usirẹyị hụụnị ụvọ ụhwẹ aza ene sú, vị ana vaa sị ịrẹta-ịrẹta wụ. Ọza ana àa mẹ ẹngụ ịsa ọnọnị o sì ẹngụ anị isu nị. À sị a nyị ọza ana tụ ohuvọ.

Currently Selected:

Ireevi 20: EBTP

Highlight

Copy