Ireevi 19

Ebira ayị ka Ohomorihi ọnịrị ọnọhụva ayị na

1Ẹnẹyịmavara ộ kà a yị Imosiisi ka 2#Ire 11.44,45; 1 Ipi 1.16Ọ̀ kà a yị ịragụ Anisirẹrị nịnị ka; Ẹnịnị ẹ̀ sị ẹngụ tụ irenyi, agụvị ka ọnị Ẹnẹyịmavara, Ohomorihi ẹnịnị vị ana sị ẹngụ anị tụ irenyi. 3#Kụra 20.12; Ọda 5.16; Kụra 20.8; Ọda 5.12Ọzọza ọ̀ sị ụbanyị yị ada anị ọnịrị ọnyị anị, dị ẹ̀ sị ụvọ za ịrẹyị ẹkụhị ụhwọtụ anka ọnị mẹ mẹẹ ọda yị wa, ọnị ọ vị Ẹnẹyịmavara, Ohomorihi ẹnịnị nị. 4#Ire 26.1; Kụra 20.23; 34.17; Ọda 17.2-5Ọ kà à sị ẹ và ịrẹma anị naa hẹkẹ ori. À sị ẹ sị enyusẹ mẹ uyi ori nịnị dị waa tana tụra ẹtẹẹ hẹkẹ wa. Ọnị ọ vị Ẹnẹyịmavara, Ohomorihi ẹnịnị nị. 5Ẹnịnị àaa wụ̀ ịsụpa ọ̀ yị mẹ̀ ịsọvọ ẹngwọọrọ hi ọnị Ẹnẹyịmavara, ẹnịnị ẹ̀ saasa ọda ọnị ọnị mẹ yị wa, ka, ọnị vaa dọ ịsọvọ ẹnịnị. 6Ịhị ọnị ẹ mẹ̀ ịsọvọ ọnọọ gẹdẹ-gẹdẹ ẹ̀ vaa rị uye anị nị. Ẹ́ rẹ zụ rị ọ eyinẹhẹ anị; uye ana àa vọ tu ịhyẹgwẹta anị vị ana vaa rị ịra. 7Enyisi ọ́ vị ka à rị uye ọnọọ ịhyẹgwẹta anị nị ọnị ẹ́ yị vaa dọ. 8Ẹnẹyịmavara kà ọza ana àaa rị ọ vaa rị ịvị, agụvị ka ọ́ raa sị eyi oweyi ré ịsa ana a sị tụ irenyi yi ọnị Ẹnẹyịmavara. Ọnị é yi kuku ve rò ọza ọnọọ tụ ịnị aza anị 9#Ire 27.15; Ọda 24.19-22Ọ kà ẹnịnị àaa kụ ịsa ịnị aarẹ ẹnịnị gụ, asị ẹ kụ ọ na ngụ ụtụụtọ aarẹ ẹnịnị. À sị ẹ varẹma vatụra aarẹ na tọ̀ọ ịzaha ana á parahu. 10Ẹ̀ẹ yaa há ẹtụtụ ọchị ịvayịnị ẹnịnị, ẹ̀ vọ tịtẹ. Ana àa hụrẹ hi ẹtẹ, asị ẹ varẹma na tọ̀ ọ yọ. Ọ kà ẹnịnị ẹ̀ naavọ yị oniruwa ẹnịnị anẹkụra ọsa nịnị ene hi ịzọọ, Ọnị ọ vị Ẹnẹyịmavara, Ohomorihi ẹnịnị nị. 11#Kụra 20.15; Ọda 5.19; Kụra 20.16; Ọda 5.20Ọ kà à sị ẹnịnị yi oyi. À sị ẹ mẹ ọza rị; dị à sị é re cheeche yị ẹngụ. 12#Kụra 20.7; Ọda 5.11; Imt 5.33À sị ẹ sị ịrẹha anị hị́ eku tụ ịrẹsụ ịrẹyị ẹnẹ ẹ̀ yị vị ịzẹyịza, dị ẹ̀ va sị mẹ̀ ụhị nyị ịrẹha ọnị Ohomorihi ẹnịnị. Ọnị ọ vị Ẹnẹyịmavara nị. 13#Ọda 24.14,15Ọ kà à sị ẹ mẹ ẹvaya yị ọnọhụva ẹnịnị à vị ka ẹ̀ mẹ akoo yị ọ. Ọza ọnị ẹ̀ẹ dọ ka ọ̀ mẹ̀ ụkọrọ yị ẹnị, à sị ẹ́ za a ku tu eyinẹhẹ anị dị è si ọ ụta. 14#Ọda 27.18À sị ẹnịnị kụ̀ ogutọ ụhụ, dị à sị ẹ́ rẹ sị ịsa ana zụ gụ ọza hyẹdụ jị ogweyi oze; ama ẹnịnị ee hí angwa Ohomorihi: Ọnị ọ vị Ẹnẹyịmavara nị. 15#Kụra 23.6-8; Ọda 16.19Ẹnẹyịmavara kà ẹnịnị ẹ̀ẹ sị ịzẹyịzaa mẹ̀ ọkarẹyị; à sị ẹ nyị ọza remeyi agụvị ka ọọ vị onosiye, dị à sị e re hí angwa ọzọbanyị. 16Ọ kà à sị ẹnịnị yà ịnị akakana anda ẹnịnị dị ee du ọza ịrẹma. À sị a nyị ọza ana na dọ ivenu ireche ana vaa mẹ ka à wụ ọnọhụva anị. 17#Imt 18.15Asị ẹ sị ịrẹyị ọhịmị ọza tụ ịnị ịnẹ, ama ọza ọnị ẹnịrị ọ̀ọ nyị ịrẹyị, ẹnịrị wa ẹ̀ kà a, agụvị à sị ẹ na hụvị ọza mẹ̀ ịvị. 18#Imt 5.43; 19.19; 22.39; Ịmk 12.31; Irk 10.27; Iro 13.9; Iga 5.14; Ije 2.8À sị ẹ na họ̀ oponu ịrẹyị ka ọza ọnyọọnyị na, à vị ka ẹ̀ sị ịrẹyị ọhịmị ọza ọnọọ tụ ịnị ịnẹ; ama ẹnịnị è sì ịrẹyị ọnọhụva anka é me sì ịrẹyị ẹngụ ẹnịnị. Ọnị ọ vị Ẹnẹyịmavara nị. 19#Ọda 22.9-11Ọ kà ẹnịnị ẹ̀ saasa ọda anị. À sị ẹnịnị zẹẹ ka ịsụpa irenyi-irenyi ẹẹva ẹnẹ ẹ́ pa ẹ̀ tụra ẹngụ dị ẹ̀ ma ozi. À sị ẹnịnị chire ịsa oze ẹẹva tụ ịnị aarẹ ọnya. Dị à sị e chire awuru ana a sị achị irenyi-irenyi ẹẹva gẹ. 20Ọnọrụ aa sị ọnyẹnẹẹ ana vị ọrịhị ọnị ọza ẹnẹsa nyị tụ oze, ama dị ọza èee yi si ụta anị varẹma dị à va hụrẹ ẹ ụvọ nị, ẹ vaa rị ụya ama à sị a wụ̀ wa, agụvị ka ọnyẹnẹẹ ọnọọ yị vị ọrịhị. 21Ama ọnọrụ ọnọọ vaa sị ịdẹbaa vẹ enoze ajẹngụ ọnị Ẹnẹyịmavara, dị ọ sị va mẹ̀ ịsọvọ yị ẹngụ anị ka ọnị ọ́ọ rị ịvị. 22Ohirẹsụ irehi Ohomorihi vaa mẹ ịsị a vọrọ ka à mẹ ọyị nyịna ọza dị à sị kụ ịvị ọnọrụ ọnọọ mẹ̀ kwooze, Ohomorihi vaa vagu ọ. 23Ẹnẹyịmavara kà, ẹnịnị ẹ̀ẹ va sị ngụ ẹtẹ Ikanaani, dị é chire ọchị ireyi-ireyi ana aā rị ẹtụtụ anị nị, ẹtụtụ ọchị ẹnẹnị vị ẹnẹ ẹ́ vaa zá ịrịkaa tụ ịnị ịsa ọnị ọza ẹ̀ yị ma rị. Avọọ ẹ́ mẹ vaa mẹ ịrayị ẹẹta ịpaapa ọnị ọchị ẹnẹẹ èe nyima aa tụ́ nị. Ẹnịnị ẹ́ yị vaa rị ẹtụtụ ọchị ẹnẹẹ ịnị ịrayị ẹẹta ịpaapa ẹnẹẹ. 24Ọ kà avaba ẹtụtụ ọnị ọchị ẹnẹẹ ẹ̀ẹ tụ ịnị ịrayị ọhụna, vị ana vaa sịị tụ irenyi ọ̀ yị kụ ọnị Ẹnẹyịmavara kà ọnị ộ mẹẹ o. 25Ama ịnị ịrayị ọhụhị anị, ẹnịnị ẹ́ zụ aa rị ẹtụtụ ọchị ẹnẹẹ, ọ ka ẹnịnị ẹ̀ẹ maanị mẹ avaba ẹsẹnị, ọchị ẹnịnị vaa tụ́ ẹtụtụụ yị wa hu avọọ. Ọnị ọ vị Ẹnẹyịmavara, Ohomorihi ẹnịnị nị. 26#Oyn 9.4; Ire 7.26,27; 17.10-14; Ọda 12.16,23; 15.23; Ọda 18.10Ẹnẹyịmavara kà à sị Anisirẹrị nịnị rị uye o. À sị ẹ na dọ ụkata hụụnị ụvọ ụhwẹ echu di è sii ré ẹtẹẹ yị ọza, dị à sị ẹ rẹ na mẹ ẹbẹ o. 27#Ire 21.5; Ọda 14.1Ọ kà à sị ẹ kụ́ ẹyị ini okura ẹnịnị, dị à sị ẹ rẹ dà hụụnị ịrẹwa ẹnịnị o. 28À sị ẹ zị ẹngụ ọza ene sú nini pooro dị ẹ̀ naa sị ịsaa tọ̀ ẹngụ ẹnịnị ụnava. À sị ẹ́ tụ ẹsa hi ẹngụ nịnị o. 29#Ọda 23.17À sị ẹ́ mẹ̀ ụhị nyị ezi anẹẹ ẹnịnị dị ẹ̀ mẹ ka ẹnịnị ẹ̀ naa mẹ ori. Ẹ̀ẹ vavọọ mẹ, vị́ avaba ẹnịnị kụkụ a vàa ka ori nịnịị na, dị ẹtẹ ẹnịnị kuku hi yi ebira odivi-odivi nị. 30#Ire 26.2Ẹnịnị ẹ̀ saasa ọda ẹkụhị ụhwọtụ anị, dị ẹ̀ sị ụbanyị yị aha ana a yaa hẹkẹ ọnị, ọnị ọ vị Ẹnẹyịmavara nị. 31#Ọda 18.11; 1 Ịsa 28.3; 2 Ohi 23.4; Ayị 8.19Ẹnẹyịmavara kà à sị Anisirẹrị nọ ịdị aza anaa họ̀ oku nini use ịrẹyị ka ẹ̀ sị ajuwe yị ẹnị, ẹnịnị ẹ̀ẹ vavọọ mẹ, vị́ eyee du ẹngụ ẹnịnị ẹngụ nị. Ọnị ọ vị Ẹnẹyịmavara, Ohomorihi ẹnịnị nị. 32Ọ́ ka ẹnịnị ẹ̀ kwẹẹtẹ jẹ yị azọkụ nịnị, dị ẹ̀ sị ụbanyị yị wa. Ẹnịnị ẹ̀ sị ụbanyị ọnị Ohomorihi ẹnịnị dị ẹẹ saasa ịrẹyị anị; ọnị ọ vị Ẹnẹyịmavara nị. 33#Kụra 22.21; Ọda 24.17,18; 27.19À sị ẹnịnị mẹ ẹvaya yị anẹkụra ọsa ana va ra pe wa ịnị ẹtẹ ẹnịnị. 34Ọ kà anẹkụra ọsa ana va ra pe wa vị ẹnẹ vaa sị eyi ozi ẹtẹẹ re. Ẹnịnị ẹ̀ sì ịrẹyị anẹkụra ọsa ẹnẹẹ anka e me sì ịrẹyị ẹngụ ẹnịnị; agụvị ka azọga ẹnị rẹ vịdị vị tụ ẹtẹ Ijipiti nị. Ọnị ọ vị Ẹnẹyịmavara, Ohomorihi ẹnịnị nị. 35#Ọda 25.13-16; Ụhị 20.10; Ezk 45.10À sị ẹ mẹ ọza ọnyọọnyị rị dị ẹ̀ sị ịsa ẹnẹ ẹ̀ yị vị ịzẹyịza mọ ịsa yị ọ, ọ̀ọ vị ụgọdọ ịsa, ọ̀ọ vị ịsa mẹmẹ rata, ọ̀ọ va vị ịsa mẹmẹ rụrụ. 36Ẹnẹyịmavara kà Anisirẹrị nịnị ẹẹ sị ịzẹyịzaa mọ ịsa, dị ẹ rẹẹ sị ịzẹyịza ngọ ịsaa yị aza. Avaba ịsị ẹẹ yaa sị mọ ịsa ọ̀ vị ịzẹyịza. Ọnị ọ vị Ẹnẹyịmavara Ohomorihi ẹnịnị ana kụ wa tụ ẹhẹ hụrị ẹtẹ Ijipiti nị. 37Ẹnịnị ẹẹ mẹ avaba ịsa ọnị ka yị wa, dị ẹ saasa avaba ọda anị. Ọnị ọ vị Ẹnẹyịmavara nị.

Currently Selected:

Ireevi 19: EBTP

Highlight

Copy