Arụwẹ 4
4
Arụwẹ Ọhụna
Ọvavịrẹma ọyị hyẹdụ Ijerusarẹmị
Ọnịsẹ kà:
1Kaaa! Ezi Anijerusarẹmị ana vịdị maanị nyị ụbanyị anka igooru ana za ẹtẹ avọọ ẹ maanị mi aanị nị?
Ịrẹta ana sị da irehi Ohomorihi ẹ kụ gara và hí avaba oze ẹkụra.
2Ezwọọmụha Anịzayọnị ệ vịdị nyị ụbanyị anka igooru,
ama ọyaanị, ẹ́ kụkụ sị mẹẹ anka ụnọkọ ana a sị ụmọpa mẹ avọọ nị.
3Irezi ịnị enyi kịị kà ezi anị ịrẹva,
ama aza amị vị ana sị mẹẹ anka inomi ana aā hị́ igonggo ana chamayị yị ezi avọọ.
4Ẹẹ navọ ezinụvọ ẹnịnị ka ụngwẹ ọnịrị onyi ọ̀ọ wụ̀ wa ha;
ezi ẹnịnị aa pa ịsọyịrị zị ama ẹ yị nyị ọza ana sị yị wa.
5Aza anaā vịdịị rị ịsa ene zoza hu kere-kere, ụngwẹ kụkụ aa wụ̀ va hi oze ẹkụra aanị nị.
Aza ana ahịka ẹẹ̀ ịdịị rị vọ ku, ẹ kụkụ aa tọ̀ọ́ ịsa hụụnị itutu rị aanị nị.
6 #
Oyn 19.24
Ụya ana aa sị rị aza amị, óo divi huni ụya ọnị Anisodọmị nịnị rị.
Isodọmị ọ vị ẹkụra ọnị Ohomorihi vú ẹtẹ avaavo nị.
7Ezi anọrụ ayị e yi du ha, ệ nị yakị-yakị.
Dị ẹ yaa yamị-yamị zị ẹnịrị ẹngụ ọnịya, ọchẹngụ ẹnịnị aa tototo anka uweyi ọkatarihi ana aā hị́ ịsahwaya avọọ nị.
8Ama booro aanị ẹnịnị e mine hu ụnọkọ aremi. Ọza ọ̀ọ gẹrị wa oze, ẹ yị yaa yẹ wa.
Ụpa ẹngụ ẹnịnị ọ ta hịnya na za ẹchụkụ. Ẹẹ wụ pooro anka ọkụ ọyịwụ.
9Aza ana a wụ̀ eyi ịrẹkụ e dahi huna aza ene vene sù
ene e yi re ịsa rị, dị ụngwẹ tangwa wụ̀ wa va ha nị.
10 #
Ọda 28.57; Ezk 5.10 Ẹngụkata ana vẹ, vị ana kụ odivi gẹ ẹngụ.
Anyẹnẹẹ ana ahịka ẹẹ ngwayị ezi ẹnịnị ẹtẹẹtẹrẹ, vị ana kụkụ vana sị ezi ẹnịnị mẹ ịsọyịrị, dị ẹ yaa chịnẹ wa rị nị.
11Ịjị ọyịkụ Ẹnẹyịmavara hịrẹ ụna tu wa,
dị ọ rị ẹkụra Ịzayọnị ịra na ka ẹtẹ nị.
12Ẹ yị nyị ohinọyị nịnị, a vị ọza ọnyọọnyị ịnị ẹhẹ
ana dọ vị ịzẹyịza ka ọnịvị Anijerusarẹmị ẹ zụ jịnẹ ẹbanoze oze ana aā zịị ngụ Ijerusarẹmị vụrụ-vụrụ.
13Ama ebira odivi ọnịsẹ nịnị ọnịrị ohirẹsụ irehi Ohomorihi nịnị
ọ mẹ ka aa wụ̀ aza ana aa mẹ ịzẹyịzaa ha nị.
14Ọnịsẹ ọnịrị ohirẹsụ irehi Ohomorihi ẹnịnị vị anaa ngụ ubooro zịịzị anka ogweyi avọọ.
Anya aza ẹnẹ mẹ̀ ka a wụ̀ vị ene che ku wa, dị o du wa ẹngụ. Ẹ yị nyị ọza ana kụkụ dọ ka ọnị ọ hyakụ sị ụvọ kanyị wa awuru.
15Dị aza kuku ee na owu ku wa ka ẹ kana kwooze, asị ẹ sị ụvọ kanyị ẹnị agụvị ka ẹ sị ẹngụ ẹnịnị du ẹngụ nị.
Ẹnẹnị vana kụkụ a vaa chi vaa hịrẹ ngụ ẹkụra zị nị. Dị ọzọza jị obori ẹnịnị nị.
16Ẹnẹyịmavara ọnị ụvọta ọ gara wa hi ozi ni.
Ẹ yị kụkụ hị́ ịrẹyị ẹnịnị ịrẹyị. Ẹnịnị ẹ yị kụkụ nyị ụbanyị vụrụ-vụrụ.
17Eyi ayị ọ sị jị tụ oze i mee sì ọnọgụvọ ọnị ye yi ve re.
Ẹnị ee zi ọgụvọ pooro ne tu ka ẹnị ee zi anẹkụra ẹnị ẹ̀ yị nyị ịsị ẹ zụ mẹ ka, ẹ̀ va gụ ẹnị ụvọ.
18Agụvị ọnịvị ayị enee bè yi ahụ-ahụ, yẹ yị kụkụ nyayịnẹ va tụra oze.
Dị ẹ kà, eyi ayị ọ sị nị ọ, a sị ẹkụhị ayị za ịrịka, ayị ộ ta o.
19Ẹnịnị ẹ rẹ huni ọkasịmẹ, ẹ maa dụ ẹnị chi ataba.
Ệ dụ yị na ngụ ịnị ataba. Ịnị ụnọmị ọnị yị ka ya na tẹ̀ vị ọnị aza anaa dụ aanị na tẹ̀ hí ee zi yị.
20Ẹ raà za ohinọyị ọnị Ẹnẹyịmavara nyị yị yị ka ya sị eyi tụra.
Ọnị ọ vị ọza ọnị ị sị ayị tụra ka ọ vaa dọ yị ha hụnị ụvọ anẹkụra tụra anẹkụra anaa vị eyi ịrazị ka yị nị.
21Ẹwụ nịnị Anedomi ọnịrị Anuzi waa jẹ ịrajẹ, dị waa mẹrị nịnị booro aanị.
Ama yẹ́ ka ụyọrị awụ nịnị aa vẹ ịsọnsọọnị. U vee hu ụya anka eche dị aa mẹrị wụ, dị ụ tụ ẹngụ awụ ahwaahụ.
22Ụyọrị Anịzayọnị vaa ta. Ẹnẹyịmavara ẹ yị kụkụ vaa za ayị ku aha ịzị a za ayị ọrịhị ne hi aanị.
Ama Ẹnẹyịmavara vaa sị ụya ịvị Anedomi rị wa. Ọ vaa kụ wa uruvo hi ẹhẹ dị è re ebira odivi ẹnịnị.
Currently Selected:
Arụwẹ 4: EBTP
Highlight
Copy
Compare
Share
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
