Arụwẹ 3
3
Arụwẹ Ọhụta
Ọza ọnị Ohomorihi sị ụya rị ama dị ọyị sị ayị tụra a
Ọnịsẹ ka:
1Ọnị ọ raà yẹ́ Ohomorihi mẹ mẹẹ sị ụyaa rị ọza àa kụ ayị.
2Ộ dụ ọnị na ngụ ịrahụ ruma-ruma ka asị ọnị re ẹtẹ.
3Ộ tana ụvọ za ọnị ẹtẹẹtẹrẹ, dị ee tụ́ ọnị pooro kẹnẹ nị.
4Ohomorihi ọ raà tụ ọnị ụnava, ọ sị ọnị che ẹchụkụ.
5Ọ raa kụ́ ẹngụkata ọnịrị ụya ọngwọọngụ tu ọnị zị oze eyi ẹnyị eyi ọsa.
6Ọ sị ọnị wụ̀ tụ ẹhẹ.
7Ọ sị ọnị jị ẹngwa ka asị ọnị re oze zwe. Dị ọ tụ ọnị ịchẹkẹchẹkẹ tịtẹ nị.
8Ọnị ộ hyakụ jị òrèrè, dị ọnị da ịpẹ ka ọ̀ mẹ ọgụvọ yị ọnị, ama Ohomorihi ô yi ka ọnị ẹ yị wụ́ aduwa anị.
9Ohomorihi ọ raa sị ịrẹta jị ọvọ kara ọnị hi eyi ụvọnị-ụvọnị ka asị ọnị zụ ngụ ịzị ọnị ee sị ka ọnị ọ̀ ngụ.
10Ê zị ọnị anka ọdụmị avọọ nị. Ô ne va za ọnị anka idu ene be ịsa avọọ nị.
11Ohomorihi ộ dụ ọnị hụrị oze, dị ọ na ọnị va hị́ ẹtẹ pẹrẹ-pẹrẹ nị. Ọ sị ọnị tụ avọ osusu.
12Ọ sị ọkịta anị tụra, di ee be ọnị ọyị che ọpa nị.
13Ọ sị ọnị che ọpa na za ọzị.
14Avaba aza ẹngụ anị vị ene kuku è nyi ọnị unyi. Ịrẹyị anị vị ọnị ẹ kụkụ sị tụ irenu aà sịị jị ahẹ.
15Ohomorihi ọ raà dà ụya ana ngụ ajẹ yị ọnị rị, dị ọ sị àyodu mẹ enyi yị ọnị ka ọnị oo hú ọ nị.
16Ộ kụ ọnị sisi ẹtẹ, dị ọ ka ata hi ọnị irenu dị ọ si che ọnị anyị nị.
17Ọnị ẹ yị kụkụ nyị ẹngwọọrọ. Ọnị ẹ yị kụkụ yẹ ịsị aa hị́ ayohine vụrụ-vụrụ.
18Agụvị avọọ ọnị ka, áanị ộ ta, avaba ịsị ọnị aa tụra eyi ịnị ụvọ Ẹnẹyịmavara ộ ta o.
19Ariro ịrẹyị ụya ọnị ọnị aa rị, ọnịrị ọyị vachi vahịrẹ anị, vị ana sị mẹẹ anka ọza o rere hú ẹchịpa avọọ nị.
20Ọnị ô ro ịrẹyị ẹnẹnị pooro dị ẹngụ anị sị và hí ayị anị me du nị.
21Ama ọnị mẹ tamayị ịsa ọnyara ọnọnị, dị ọnị ka ọnị ọ nyị ọyịtureyi nị.
22Ẹnẹyịmavara vị enee sì ịrẹyị ọza pooro, dị ẹ yị zá ụvọ jẹẹ, ayamva anị ẹ mā nyị ẹzẹtẹ.
23Ohomorihi ọ wụra sị ayị tụra. Eyinị-eyinị vị ọnị ọọ̄ vayị ọza.
24Ẹnẹyịmavara ọ vị avaba ịsa ọnị ọnị nyị nị, agụvị avọọ ọnị ọnị vaa tụra eyi.
25Ẹnẹyịmavaraā ngụ ayị aza ana sị ayị ẹnịnị tụra a.
26Óo zoza ka yaa sị ayọnẹtẹ jẹẹ zi Ẹnẹyịmavara kà ọ̀ va dọ yị ha.
27Óo zoza ka ọza ọ̀ vavọọ kọsẹ a mẹẹ nyị usuuru ịjị ọza vị ozweyi.
28Yàa rị ụya, ya yaatụ hẹẹ, dị ya va ayị nẹtẹ.
29Navọ ya wụ̀ chire ịnị ịrẹsụ ọkahi, ka ẹyịyara ẹ vaa nyị ọyịtureyi.
30Àa daka à nyị ayị arụhwọtọ dị aa kụ yị ụhụ nị, ya sị ẹngụ dọ ọ.
31Ananyị yị ọyị vee yi yị tịtẹ pooro.
32Ọ̀ọ daka kụ ayodu tu yị, ọ rẹ vaa vayị anị, agụvị ka oō sì ịrẹyị ọza ẹtẹẹtẹrẹ.
33Ayị Ananyị yị o yi mē hine ka ọnị ọ̀ kụ ayodu tu ọza.
34Ananyị yị ọọ yẹ aza aa mẹ ẹchaka yị yị.
35Ọọ yẹ aza aa dọ yị ịsị ana vọrọ tụra yị ọnị ọ mẹ yị.
36Ananyị yị ẹ mā dọ ka è sima ọkarẹyị mẹ yị aza ịnị ikootu.
37Ẹnẹ nyẹngụ ka ịrẹyị dị ọ sị gẹ ẹ̀ẹ yị vị Ananyị yị sị ụvọ tụ ọ?
38Ohomorihi ene hu kere-kere ọọ̄ mẹ̀ ọda dị ịrẹyị ọyịza ọnịrị odivi ẹ̀ vaa mẹ̀ nị.
39Sị ẹ vẹ dị yaa rị uhuhu agụvị ebira odivi ọnị ị mẹ̀ ana a sị ụya anị rị yị?
40Navọ yaa zama oze ayị re, ị mẹmẹ aa ra ẹhẹ ayị, dị ye ro ịnẹ varẹma và ka Ẹnẹyịmavara vẹ.
41Navọ yaa và ụvọ hịrẹ, dị yaa sị ịzẹyịza mẹ̀ aduwa hi Ohomorihi ana ya ẹbẹẹba ka:
42Ya sị ịvị mẹ̀, ya raa kụ̀ hịrẹ ẹwụ Ẹnẹyịmavara, wee yi ka wẹ yị vagu yị.
43Ẹnẹyịmavara ộ kụ ayị hi yị, dị ọ dụ yị nị. Ẹ yị vayị ayị, ọ sị yị wụ̀ va ha.
44Ọ raa sị eguhi gù ẹngụ anị hi agụvị asị ọnị wụ́ aduwa ayị.
45Ọ sị yị mẹ̀ anka ịsa ịnị ututu avọọ yị avaba anẹhẹ.
46Avaba ọnịvị ayị vị ana kụkụ aa kụ̀ yị ụhụ, dị ẹ yaa mẹ̀ yị isiya.
47Angwahi ọnịrị ayịhụrịnẹ a vaa wụ̀ yị. Ọnịvị ayị ẹ kụ yị wụ̀; e ree vu yị ẹtẹ.
48Ẹgọ vị enee si ịnị eyi amị wuuru agụvị ka a kụ aza amị vú ẹtẹ.
49Mị vaa jị òrèrè pooro di me yi ku irenu.
50Ẹ yị vị ịhị Ẹnẹyịmavara ọ̀ọ kana eyi hụrị ẹbẹẹba chi vẹ dị o re yị.
51Ụmẹ tụra ụmẹ ọnị mèe re avaba ịsị a mẹ̀ avaba anyẹnẹẹ anẹkụra amị, dị ayị amị re si du.
52Ịrẹpa ọnịvị amị ọnị ẹ yị nyị ịsị mị mẹ̀ wa ọ sị mị za anka inomi avọọ.
53Ệ sị mị ireyi-ireyi, dị e ne mị ngụ ụsị, dị e zina ịrẹta gu ụsị ọnọọ irenu nị.
54Enyi maa mụnẹ mị, di mi ro ka isu vẹ aanị nị.
55Ẹnẹyịmavara, hụụnị ịnẹ ụsị mị ya aa ta awụ ubo nị.
56Wâ wụ́ ị maa da ịpẹ ka wa gụ mị ụvọ,
57Wậ kà pe mị, ịjị mị hị́ wụ, dị ụ kà a yị mị ka asị mị hí angwa nị.
58Ananyị yị ộ hụvị ịrẹyị amị kwẹẹtẹ, dị ọ dọ mị ha.
59Ộ yẹ ebira odivi ọnị ọnịvị amị nịnị mẹ̀ hi mi, dị ọ jị ịhị mị nị.
60Ô yẹ ka ẹnịnị ệ nyị ịhyẹrẹ amị, di o re avaba eyi ẹnẹ hụvị anị aa gẹ ka a mẹ̀ mị odivi.
61Ẹnẹyịmavara ộ wụ́ ụhụ ọnị ẹ yaa kụ mị, dị ọ yẹ avaba eyọgẹ odivi ọnị ẹ hụ vị amị aa gẹ nị.
62Pooro kẹnẹ ọnịvị amị nịnị aa kà ịrẹyị amị, dị ẹ rẹ yaa gẹ eyi amị nị.
63Avaba ụmẹ vị ọnị ẹ yaa mẹ mị isiya.
64Ẹnẹyịmavara sị ụya ịsa ẹnẹ ẹ mẹ̀ rị wa
65Chì hi wa dị wa kụ ayodu tù wa.
66Sị ọyịkụ-ọyịkụ dụ wa, di we vu wa ẹtẹ hụụnị ẹhẹ.
Currently Selected:
Arụwẹ 3: EBTP
Highlight
Copy
Compare
Share
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
