Ijoovu 9

Ijoovu kà

1 # Ijov 4.17 Ijoovu ka: 2avaba ịrẹyị ọnị Ibiridadi kà vị ịzẹyịza. Ẹ yị nyị ọzarẹyịrẹsụ ana zụ rị ịhị ọvịdị Ohomorihi. 3Ẹnẹ zụ beri ọ nyị ahankata kẹ? Ọ̀ọ họ̀ use ịrẹyị ụpẹ akahị, ẹnẹ yẹ ohi sị yọ? 4Ohomorihi ọ yẹ ịrẹyị dị ọ rẹ nyị ụkata ẹnẹmẹhị nị. 5Ọ̀ọ kụ ayị, ẹ yị nyị ka ọ ka dị ọ tụ́ ataba ụvọ hi ẹtẹ. 6Ohomorihi ọ̀ ziizi ẹtẹ jigijigi angwa vene hi ataba nịnị. 7Ọnị ọ nyị ụkata ana zụ za ọyị ka asị ọ ha dị asị ụzọmị zẹtẹ ịrahụ nị. 8Nyị ọza ana gụ ọ ụvọ gana ihinẹba ku. Ọnị ọọ̄ za oku ana jị ayị dị aa da ẹgangguu jẹẹ nị. 9#Ijov 38.31; Emọ 5.8Ohomorihi ộ mẹ̀ ụzọmị ọzọza tụ aha anị nị. Aa nyị ụzọmị ọbanyị, ụhwaazị, ọsụgụrẹngụ ụzọmị nyụụwụ ọnịrị ụzọmị ene hi eyi ụvẹtẹ 10Ọza ọ yị zụ yẹ ịsa ẹbanyị-ẹbanyị ọnị ọ mẹ̀. Ọọ mẹ ịvọpa pooro kẹnẹ nị.

11Ọ zụ para ọnị huu dị ọnị ẹyị yẹ vụrụ. 12Ohomorihi ọ̀ọ sị ịsị e zee eyi, ẹnẹ zụ za? Ẹnẹ zụ họ̀ ọ use ka sị ẹ vẹ? 13Àa kụ ayị ọ mā va. Ọnịvị anị ana kụ tu ọ venee vú ẹtẹ. 14Ijoovu ka ọnị ọ yị yẹ ẹngụ ohi ọnị ọnị vaa sị yị Ohomorihi. 15Ọnị ọ daka rị ịhị, ọnị vana yịị da ịpẹ yị ọ ka ọ vayị anị. 16Ohomorihi ọ daka kà a ka ọnị ọ kụ irenu anị, ọ yị vaa dọ ịsị ọnị ọọ ka. 17Ijoovu ka Ohomorihi jị ayị ee wure ọnị kẹnẹ-kẹnẹ aanị nị. 18Aa sị ụya rị ọnị ka asị ẹngụ hi ahị. 19A vị ịnị ụkata yọ nị, ọnị ẹ yị hi ọ ụhwẹ. Ọnị ọ sị ọ nọ ọvịdị ọkarẹyị, ẹnẹ hụ ọ hị́ ọ họ̀ use ịrẹyị. 20Ijoovu ka ọnị ọ daka rị ịhị, ịrẹyị irenu anị vị ana jị ịvị yị ọnị. 21Ịzị ẹhẹ o du ọnị eyi tu aanị, ẹ yị nyị ịzị ịhị ọyị rị kanyị ọnị. 22Ịngọ ọnyọọnya ọ sị ọza ana rị ịhị ọnịrị ọza ana rị ịvị nị. Ohomorihi vene vu avaba ẹnịnị ẹtẹ. 23Ịrẹyị òo tu ọnịrẹyịzẹyịza di o su asigiri Ohomorihi vana sị ọ mẹ enyinyi. 24Ohomorihi ọ́ raa sị ẹhẹ chire aza edivi ụvọ, dị o gu ọmọkarẹyị nịnị eyi ka asị ẹ mẹ ịzẹyịza nị. Ẹ̀ yị vị Ohomorihi ọ vavọọ mẹ̀ ẹ, ẹnị ọ vị ọsa.

25Ijoovu ka ẹhẹ anị ee zwe viri-viri huna ọza ene zwe echi kẹnẹẹ. Dị ọ vavọọ zwe tụ ịnị osusu. 26Ọ kà, vị ẹhẹ anị ee zwè anka ẹpa ene zwè echi sasasa ịrẹsụ enyi avọọ nị. Ọ sị me anka obono o rere ve che usu hụrẹ ẹtẹ avọọ nị. 27Ọnị ọ̀ daka ka a ka ọnị ẹ yị kụkụ kụ ịrẹka agụvị ịsị ene tu ọnị, ọnị aa hụụnị ayodu, dị ọnị oo nyinyi nị. 28Ijoovu ka angwa ụya ọnị ọnị aa rị ee hị́ oni. Ọnị ọ yẹ ka Ohomorihi ẹ yị yaa jị ịhị yị ọnị. 29Agụvị avọọ sị ẹ vẹ dị ọnị aa kụ ka ẹngụ ụhwẹ ịrẹma ọnị ọ vaa yịị jị ịvị yị ọnị. 30Ẹ yị nyị ụkwọ ana nyẹngụ sị nyịna ịvị anị kwooze. 31Ohomorihi vene ne ọnị tụ ịnị ụsị ana nyị ịdọtị, dị achị anị ụvọta hyakụ aa nyị ịhyẹrẹ anị. 32Ohomorihi ọ yị vị ọza anka ọnị, dị ọnị o tụ ọ ohi ịrẹyị anị. 33Ama ẹ yị nyị ọza ana va mẹ̀ ọkarẹyị ịrẹyị ọnịrị Ohomorihi. 34Ọ kà Ohomorihi za ụya ọnị aa rị jẹẹ, dị asị ọnị rẹ kụkụ hị́ angwa. 35Ijoovu ka ọnị e hí angwa, ọnị aa kụ irenu anị nị Ọ kà ọnị ọ ye ayị anị ka ọnị ẹ yị rị ịvị.

Currently Selected:

Ijoovu 9: EBTP

Highlight

Copy

Compare