Ijoovu 7

Ijoovu aa yịị kà ịrẹyị naa

1Ẹhẹ ọnị ọza vẹ ịnị anị vị ẹhẹ akanya. Ịrẹvụrẹkụ yọ pooro nị. Ọ sị mẹẹ anka ọza anaa dọ ụkọrọ avọọ nị. 2Ọ sị mẹẹ anka ọnụkọrọ ene zi ụmẹ ana na tụ́ ụhwọ́, a vị ụmẹ ana a dọ ẹkẹhị anị avọọ nị. 3Ohomorihi ọ raa mẹ ẹhẹ anị osusu ụhwẹ ẹnyị na ngụ ọsa, dị avaba ịrahụ anị vị ayodu kẹnẹ nị. 4Ọnị ọ na sụ ịrahụ dị eyi ọ yị hụra nị. Dị ahịka ọnị vara suku pooro dị eyi ọ vaa nị nị. 5Avaba ẹngụ anị vị ịtahụtahụ, di e yee tu chava kẹnẹ nị. 6Ẹhẹ anị ọ sị da ẹjịjị tụ ịnị osusu kẹnẹ. Ẹhẹ anị vene e zwe echi anka ụsẹ mẹẹ̄ hụrẹ upechi ịra ịnị achị avọọ.

7Ijoovu ka Ohomorihi ọ tamayị a ka ẹhẹ anị sị mẹẹ anka ụhwẹ ụpọnya ọnị ọza tụ́ avọọ nị. Ẹ yị vaa nyị ọza ọnị ọnị re vụrụ-vụrụ. 8Eyi ene re ọnị booro aanị, o yi me vee ne re ọnị ịjị ọnị o wusu. 9Ahị mẹẹ̄ kụ eguhi ne hu avọọ, avọọ ẹhẹ aza ene su mẹ ta dị ayị ẹnịnị hi nị. 10Ẹnịnị ẹ́ ma vana và vẹ eehi ẹnịnị, anda ẹnịnị é mè vene re wa. 11Agụvị avọọ, mẹ yị vaa sị irenu amii kú oku. Maa kà ịrẹyị agụvị ka ayị amị o si du. Maa kụ́ irenu amị agụvị ka ayị aa kụ mị.

12M máá vị uye odivi ana yà ini òkū nị? Sị ẹ vẹ dị ụ nyị aza ka ee sere mi? 13Mê rò o ka màa hụtụ ayị amị vaa nẹtẹ, ọnịrị ka màa sụ ara ẹngụ amị vaa rọ̀, 14Ama wâ mẹ ka ma ra ụ́ra dị angwa oo hí mi wâ mẹ ka ẹtẹ oni mi re ò chire mị angwa. 15Dị mị kụkụ ka, àa vana sị ụvọ hi mi ọbẹ di mi su nị, ộ dà mi hí huni ka ma maanị rị ụya nị. 16Ẹhẹ amị aa nyị mị ịhyẹrẹ, àa yẹ me vene su. Navọ mị hẹẹ ka ẹhẹ amị aa tupe aanị.

17 # Ahẹ 8.4; 144.3 Sị aza rẹyịrẹsụ vana vị, dị ịrẹyị ẹnịnị maanị jị wụ areyi, dị ụ sị ayị tụ ịnị ịrẹyị ẹnịnị? 18Ẹnẹnẹ-ẹnẹnẹ vị ọnị ụụ̄ kana eyi ẹnịnị, dị ụụ̄ zama waa re ịnị avaba ụmẹ nị. 19Wẹ yi daba sị eyi hụrẹ mị ẹngụ chee? Wẹ yị navọ mị hẹẹ ma daba jị atẹ mụnẹẹ? 20Màa mẹ ịvị, m máá sị zama wụ nị, ẹwụ ana kụ eyi pe aza? Sị ẹ vẹ di u wee bè mi? Sị ẹ vẹ dị mị sị vara ẹnya ọrata yị wụ? 21Sị ẹ vẹ dị ụ wẹ yị vagu ịvị ọnị mẹ yị mị, dị ụ wa sị ebira ọhịmị amị kwooze? Ẹ yị nyị aa jẹẹ aanị dị a sị mị ne chire ẹtẹ; u kuku vee sì mị, ịjị ọnọọ mi si hu.

Currently Selected:

Ijoovu 7: EBTP

Highlight

Copy

Compare