Ijoovu 6

Ijoovu o va ohi yị Erihwazi

Ijoovu

1Ijoovu ka, 2A zụ sị ịngọ ngọ ẹngụkata ene tu ọnị, 3ọ rata hụụnị àarẹ ịnị òkū. Ịsị ẹ mẹ ka ọnị ọ ka ọyịkụ yị. 4Ohomorihi Ochẹtẹẹngụ o reè che ọnị ọpa na za ọzị. Ẹchịpa anị ọ raà ha hịrẹ ọnị ẹngụ. Ohomorihi o reè tenyi ẹngụ ka ọnị ọ ka ọnị enyi ụya. Ayị vị ana nyayịnẹ aa hụrẹ ọnị ịnẹ. 5Ọnị ọ yị nyị irenu ọ́karẹyị anka uye ọnịrị ịsụpa eneē re avị dị ọ yị kụkụ na owu ụngwẹ avọọ. 6Ama ẹnẹ zụ rị ịsa tahị ẹnẹ ẹ yị nyị anọ? Sị ẹ vị uhine ana ya ịnị ịrẹma ajẹ. 7Ẹngụ ịsọyịrị ọnọọ e yi ze ọnị eyi. Ịsọyịrị vị enee gu ọnị ahẹrẹ.

8Ohomorihi ọ navọ ọ wụ́ aduwa anị dị ọ sị ịsị ọnị aa pa ẹ yị ọnị. 9Ọka, Aa yẹ Ohomorihi ọnị ụvọta anị ọ dọ ọnị ụhwẹ. 10Usu ọọ daka zị ọza, ọ yaanị vavọọ rọ ọnị ẹngụ. Ọnị ọ yẹ ka Ohomorihi vị ọza ọnịnị, dị ọnị saasa avaba ọda anị nị. 11Sị ẹ vị ụkata ọnị ọnị kụkụ nyị ọyị ra ẹhẹ? Sị ọnị aa tụra eyi anị ọnị ọnị e zi? 12Ịrẹta ọnị wáá vị nị, avị ụpẹngụ anị vị enyusẹ nị? 13Ọnị ọ sị tụ ọkụmị, ọnị e yi re ọza gụ ọnị ụvọ.

14A vọrọ ka ọza ọ nyị ayamva yị ọta anị ana yị ịnị akanya, ọ daka sị ha hụrẹ oze Ohomorihi Ochẹtẹẹngụ. 15Ijoovu ka ọta ẹnịnị ẹ yị wụra sị ayị tụra anka orosi ẹnị ẹ mā nyị enyi ọhahị avọọ. 16Eguhi o chire dị ọ sị ịzọọ hunẹnẹ. 17Ama ịjị ẹtẹ ọ ngụra kẹnẹ dị ịzọọ sẹ wụ korowu. 18Anusoze ẹẹ ha ka ẹnị e hú enyi anị, ama ẹnịnị e yi re enyi hu, di onyi aa kụ wa. 19Avaba osohu Anisẹba ọnịrị Anitema vana sị eyi tụra enyi anị. 20Ama ee ve tu ka enyi anị ọ sị wụ, dị ọ vara ayodu yị wa. 21Ijoovu ka, ọta ẹnẹnị sị mẹẹ anka enyi ọnọọ nị. Ẹnịnị ê re ẹngụkata anị, dị angwahi ngụ wa ẹngụ nị. 22Dị Ijoovu kà a, áá nyị ịsa ọnị ọnị ka ẹ sị yị ọnị nị? Ọnị wáá da ịpẹ yị wa ka e chire ọza irenu agụvị anị nị? 23Ọnị wáá hị́ wa ka ẹ dọ ọnị ha hụụnị ụvọ ọnịvị anị a vị aza anaa mẹ ẹvaya yị ọnị nị?

24Ijoovu ka ọnị ẹ yị vaa sị irenu kwoku ẹẹ vị ẹ kà a ịsị ẹ vị akụvị ọnị ọnị mẹ. 25Ịzẹyịza vị anaā nyị ịrẹyị, ama ohuvọ ẹnịnị ẹ yị nyị ịsa o tenyi. 26Ẹnịnị ẹ yị hị́ ịrẹyị anị ịrẹyị, asị e ro ka ẹnị ẹ zụ tụ́ ọnị ohuvọ. 27Ọrịhị ọnịrị ọta ẹnịnị vị ẹnị ẹ yaa sịị sẹ ohu nyị ẹkẹhị.

28Ijoovu ka e re ọnị deere, ọnị wa zụ ya eyi ẹnịnị ee cheeche ku wa nị. 29Ọnị ẹ yị rị ịvị asị ẹ jị ịvị yị ọnị. 30Asị e ro ka ọnị e cheeche nị a vị ka ọnị ẹ yị yẹ ọyịza hi odivi nị.

Currently Selected:

Ijoovu 6: EBTP

Highlight

Copy

Compare