Ijoovu 5

Erihwazi aa yịị kà ịrẹyị naa

1Erihwazi ka Ijoovu oo na owu, ẹyị nyị ọza ene be e atọ. Yere anggẹẹrị ana vaa ba a owu kẹ. 2Ọyịha ọnịrị ụhị ọyịkụ ọ vaa wụ̀ ọnụra nị. 3Erihwazi ka ọ nị ọ yẹ ka ọnụra ọ zụ mẹ ẹhẹ ịjịjọọ, dị Ohomorihi o vee chi hi ọ dị ẹhẹ anị ọ vaa va eyi ku ẹtẹ. 4Ezi anị ẹ yị ha. Ẹnịnị e yi vee re ọza gụ wa ụvọ. 5Azẹnịsa kẹnẹ ọnị ụngwẹ ẹ vaa kụ ogu ọnị ọọ mẹ rị nị. 6Ịrẹyị odivi ọnịrị akanya ọ́ mā chị hụụnị eteesu vẹ. 7Ẹ́ yị nyị ọza ọnị akanya èe mē tù. Ọọ̄ vẹ anka akịna meē che vaa hịrẹ avọọ nị.

8Erihwazi ka ọnị ọ̀ọ vị Ijoovu, ọnị aa ka Ohomorihi na, dị ọnị sị ịrẹyị anị chire Ohomorihi ụvọ nị. 9Ịsa ọbanyị-ọbanyị ọnị ọọ̄ mẹ̀, ọza ẹ yị zụ yẹ ka. Ọza ẹ yị zụ za wa ịrịka. 10Ọnị ọọ̄ zụ orihi dị avaba aha nyị enyi nị. 11Ọnị ọọ̄ sị ọkụmị tụ ẹba dị ọ vara ayodu ọza ayohine nị. 12#1 Ịkọ 3.19Ohomorihi oō du eto aza ana mẹ ọbọ hi wa ụvọ dị asị ẹ zụ mẹ ịsị ọnị e yee si nị. 13Ọnị ọọ̄ za aza ana da ọbọ ene ro ka eyi ẹnịnị e hweyi, dị ọ kụ wa uruvo hi ẹhẹ. 14Ọọdụ vị ana sị mẹ anka ịrahụ yị wa, dị ẹ yaa sị ụvọ si oze anka ogweyi avọọ nị. 15Ohomorihi aa dọ onosiye ha hụụnị ịrẹyị odivi ọnịrị ẹvaya aza edivi nị. 16Avọọ onosiye nịnị nyẹngụ sị ayị tụra a dị aza edivi e yi re oze mẹ wa rị nị.

17 # Ụhị 3.11,12; Ihib 12.5,6 Ọza ọ̀ọ mẹ̀ ebira odivi, asị ọ sị eyi wụ ohuvọ Ohomorihi Ochẹtẹẹngụ. A vọrọ ka o re e ịrẹsụ ọyịza yị ẹngụ anị nị. 18#Iho 6.1Ọ̀ọ nya ọza ịsa, dị ọ za gụrị ẹngụ. Ọ̀ọ tọ ọza ụnava dị ọ rẹ wụ ọ ụnanava. 19Ọ vaa dọ wụ tụ ụpẹtụrụpẹ agụvị asị a nyị ịsa ana mẹ wụ. 20O vee sere wụ dị ụngwẹ ọ yị wụ wụ ini ụmẹ ụngwẹ. O vee sere wụ dị ịrẹkụ ẹ yị rị wụ. 21Ọ vaa dọ wụ ha hụụnị ụvọ aza ene du wụ kẹnẹ-kẹnẹ. Ịrẹyị odivi ọ vẹ we yi vee hí angwa. 22Uye ịnị avị e yi vee chire wu angwa. Ẹwụ vene vee nyinyi ịnị ụmẹ ọnị ọzọza ee hí angwa ụngwẹ ọnịrị ezigi. 23We yi re ẹngụkata ịnị aarẹ awụ, uye ịnị avị ẹ yị vaa du ịsa ịnị aarẹ ha. 24Ụ vaa yẹ ka irehi awụ ọ nyị ẹngwọọrọ. Wèe re ịsụpa awụ, ẹnịnị ẹ yị vaa jị ha. 25Ezi ewu vi ana vaa rụrụ, di evere awụ chaka ku ẹhẹ anka avị. 26U vee ku orubo hyịnya-hyịnya anka akụ mẹẹ vị dị a vaa jị ọ avọọ nị. 27Erihwazi ka Ijoovu ọ raa yẹ ka ịsa ẹnịnị vị ịzẹyịza. Agụvị avọọ ọ dọ ịrẹyị anị tụ ịzọọ.

Currently Selected:

Ijoovu 5: EBTP

Highlight

Copy

Compare