Ijoovu 22

Ụpọhụta ọnị Erihwazi pe Ijoovu kà ịrẹyị

Ịrẹyị Erihwazi ọhụta

1 # Ijov 35.6-8 Dị Erihwazi ana vị Anitema tụ Ijoovu ohi ịrẹyị dị ọ ka: 2Arihwanị sị ẹyị ọza daka zụ mẹ yị Ohomorihi kẹ? Sị ẹ vị ọyịza ọnị ọza ana yẹ ịrẹyị huu kere-kere zụ mẹ yọ? 3Ọgụ sị ọ vị yị Ohomorihi Ochẹtẹẹngụ ka yaa mẹ̀ ebira ana vọrọ? Ọgụvọ sị ebira ozoza ayị zụ mẹ yọ? 4Ọ́ọ́ tụ́ wụ ohuvọ ka waa hẹkẹ ọnị nị? 5A vị agụvị ebira odivi awụ nịnị ana hịrẹ ụna pooro kẹnẹ. 6Wa zụ dọ aza ana rị wụ ụta ẹkẹhị, waa sị ụkata kụ achị ẹnịnị dị ụ tụ wa ahwaahụ nị. 7Wee yi ka waa si enyi ọnịrị ịsọyịrị yị aza ẹnẹ ụngwẹ ọnịrị onyi aa kụ. 8Waa sị ụkata dọ avaba ẹtẹ mẹ awụ. 9Wẹ yị zẹ ka waa mẹ ọgụvọ yị osoku nịnị ana pa wụ ịsa, dị ụ raa sị ako dọ ezi-oku ịsa, dị waa sị ụya rị wa nị. 10Avọọ aa va ịrẹpa kara wụ, dị angwa ee hi wu, 11dị etohozi mẹ ka asị u re ẹtẹ, dị ọhaara enyi mụnẹ wụ nị.

12Ohomorihi ana yara ya ẹbẹẹba kere-kere, dị ọ ve eyi chi ee re ụzọmị ene hi akẹtẹ anị nị. 13Ama dị ụ ka ẹ yị zụ yẹ ịsa anaa na, dị ọ̀ vaa mẹ̀ ọkarẹyị anị agụvị ka eguhi gu ọ hi tụ ẹbẹẹba nị. 14Úú wee ro ka eguhi banyị pooro dị ọ sị gu ọ hi ka asị o re ẹtẹ ee chire ẹtẹ ahụ ịzị ẹbẹẹba ọnịrị ẹtẹ na gẹ nị?

15Ẹwụ wa ka wa saasa oze ọnị aza ediviī zị nị. 16Ohomorihi ọ̀ yị ka wa ọnọ dị hụ wa kwooze. 17Ệ ka Ohomorihi Ochẹtẹẹngụ ọ navọ ẹnị, ka ẹ yị nyị ịsa ọnị ọ zụ mẹ ẹnịnị. 18Ama Ohomorihi ọ̀ mẹ avaba ịsa ọnị ẹ nyị yị wa nị. Erihwazi ka ọza ẹ yị yẹ ayị aza edivi. 19Aza ọyịza òo re ụya ọnị Ohomorihi sị rị aza ọhịmị, dị ẹ yaa jẹẹ. 20Dị ẹ ka e re vu ọnịvị ẹnịnị ẹtẹ, ẹnya ẹnịnị ẹ kụ rị ịra.

21Erihwazi ka Ijoovu ọ dọ beri Ohomorihi dị ọ nyị ẹngwọọrọ, di o zee yọ. 22Ijoovu ọ wụ́ ịrẹyị ọnị Ohomorihi, dị ọ sị ọ tụ ịnị ayị anị. 23Òo ro ịnẹ, dị ọ vaka Ohomorihi na, ee zee yọ nị. 24Ọ sị ayị hụrẹ ịnị ịrẹyị Igooru dị o re e ka ẹ yị nyị ịsị ọ vị anka edudu avọọ. 25Ohomorihi Ochẹtẹẹngụ ọ vị Igooru ọnịrị isiriva anị. 26Ọ̀ọ vavọọ mẹ̀, ọ vaa hẹkẹ Ohomorihi ini ayohine nị. 27Ọ̀ọ mẹ̀ aduwa, Ohomorihi vaa sị ohi yị wụ, ụ vaa zụ́ sị ụvọ za avaba ịsa ọnị ụ wo oto anị. 28Ọ vaa mẹ̀ ịsa tụra ịsa ọnị wèe họ̀ use anị, dị oze ẹhẹ awụ ee hweyi. 29Àa mẹ̀ ụhị nyị aza, dị ụ mẹ̀ aduwa nị, dị Ohomorihi dọ wa ha. 30Ọ vaa dọ aza ana rị ịvị há agụvị ka ụvọ awụ ọ̀ nị.

Currently Selected:

Ijoovu 22: EBTP

Highlight

Copy

Compare