Ijoovu 21
21
Ijoovu ô va ohi yi Izohwa
Ijoovu kà
1Ijoovu ka: 2Ọta e batọ dị ẹ wụ́ ịrẹyị anị ana vaa sị wa ayị nẹtẹ. 3E si oze yị ọnị vị ọnị ọ ka ịrẹyị dị ẹ vaa mẹ̀ ọnị isiya.
4Ọnịrị ọzarẹyịrẹsụ ẹ yị nyị ịrẹyị. Sị ẹ vẹ ka ọnị ọ vayị nẹtẹ. 5Ijoovu ka e re ọnị. Aanị ka ọnị ọnị ya ịnị anị aanị ẹ yị hụ ọza sị ụvọ ka irenuu? 6Oni o ro ịsị e tu ọnị aanị, dị ahị za ọnị, dị ẹgahị ngụ ọnị ẹngụ.
7Sị ẹ vị dị Ohomorihi zẹ ka aza edivi ẹ yara, dị ẹhẹ mẹ yị wa, di e ku orubo? 8Dị ọ navọ wa ka ezi ẹnịnị ẹnịrị aazị ẹnịnị ẹ vara ọza eyi ẹnịnị. 9Dị Ohomorihi ẹ yị zẹ ka odivi o tu wa. 10Ụsụpa ẹnịnị bẹẹ vị́ anaa ma tụra-tụra. 11Ezi ẹnịnị vene zwe echi mẹ aahẹ ngụ ọ zịịzị anka ezi atẹmẹ avọọ. 12Dị ẹ yaa nyị ẹzẹ isohu beri okokoro. 13Dị ẹhẹ mẹ yi wa ịnị ẹngwọọrọ, di e su isu hẹẹ.
14Dị ẹ ka yị Ohomorihi ka ọ navọ ẹnị. Ọ sị anị tụ aha anị. 15E ro ka ẹ yị nyị ọgụ ana ya ịnị ka ọza ọ hẹkẹ Ohomorihi, dị ọọ mẹ̀ aduwa bẹẹ. 16Ẹ ka asụvụrị ẹnịnị ẹhẹ sị mẹ yị ẹnị nị. Ọnị ẹ yị dọ beri wa.
17Ẹnịnị e yi re odivi, ịra ẹnịnị e yi mi, dị Ohomorihi ẹ yị kụ ayị dị sị ụya rị wa. 18Ohomorihi ẹ sị ahị kụ wa anka azịịzẹ, a vị anka opomi mẹẹ kụ edudu avọọ. 19Ọ kà Izohwa kà Ohomorihi ọ̀ sị ụya aza edivi tẹ ezi ẹnịnị. Ama dị Ijoovu ka a navọ ẹnị ụvọta ẹ̀ rị ụya ẹnịnị agụvị dị ẹ̀ yẹ. 20Navọ wa ẹnị ụvọta ẹ rị ụya, dị ẹ yẹ Ohomorihi Ochẹtẹẹngụ mẹẹ kụ ayị hi ọza. 21Ẹnịnị ẹ yị tẹsị ịsị e tu ovwoovu ẹnịnị ịrẹma eni e wusu. 22Ẹ́nẹ zụ zụ̀ Ohomorihi ịrẹyọyẹ? Ọnị ọọ̄ mẹ̀ ọkarẹyị aza ohi-ohi nị.
23Aza ẹnyị vị ana ra ẹhẹ ọyịza-ọyịza pooro di e ve su. Ịnị ayohine ọnịrị ẹngwọọrọ e su tụ nị. 24Ọchẹngụ ẹnịnị vị ana ya vọnọ-vọnọ pooro, dị ẹ yaa zị yamị-yamị. 25Aza ẹnyị ẹnịnị vana rị ụya pooro di o su ịrẹsụ ayodu. 26Avaba ẹnịnị vị ene e ne tụ ịnị ẹtẹ, di idegu rị wa.
27Ijoovu ka ọnị ọ yẹ ka ọta nịnị vị ana gẹ eyi ka ẹnị kụ ọ tu ọnị. 28Ẹ yaa họ̀ ka ịzị irehi aza ẹbanyị ana vavọọ mẹ̀ ebira odivi hi? 29Ijoovu ka áánika ọnị ẹ yị kà a yị wa ka ẹ̀ họ̀ aza anaā hụrẹ eehi? Ẹ́ẹ́ vaa dọ ịsị ẹ ka yị wa, 30ka aza edivi ẹ mā rị ụya Ohomorihi aa kụ ayị. 31Ẹ yị nyị ọza anaa ka ebira odivi aza edivi eyi ẹnịnị, a vị di o si wa ụta ebira ẹnịnị. 32Ẹnịnị èe su, aza vene sere ukuta ene ne e tụ, 33dị ọkọnị gụ izoku anị. Èzi vị ana tangwa aa ka tụ ịnị ụsị anị hẹẹ-hẹẹ.
34Ijoovu ka ọta nịnị mẹmẹ nẹngụ sị ịrẹyị kẹnẹ-kẹnẹ sị ayị anị nẹtẹ. Avaba ohi ẹnịnị vị ireche-irechee.
Currently Selected:
Ijoovu 21: EBTP
Highlight
Copy
Compare
Share
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
