Ihoseya 13

Ẹnẹyịmavara ộ kụ́ ayị hí Anisirẹrị nịnị

1Ịnị ịyẹẹyẹ, Anehwireemi ọ̀ọ ka ịrẹyị kẹnẹ, avaba Anisirẹrị ana vọ eē hí angwa ẹnịnị agụvị ka ẹnịnị vị aza ẹnị ana vọ sị eyi tụra. Ama Anehwireemi nịnị a raà mẹ̀ ebira odivi hi Ẹnẹyịmavara. Ẹnịnị aa hẹkẹ ori ana hị́ Ịbaarị, di e yee vú ẹtẹ nị. 2Booro aanị, ẹnịnị vị ana dà ụvọ tụ́ ịnị ụvọ hu avọọ ịnị ebira odivi ẹnịnị. Ẹnị ụvọta e kuku aa sị ụvọta ẹnịnị sị́ enyusẹ isiriva tụ́ ọnyọọnọkụmị ori ẹnịnị nị. Ẹnịnị vị ana aa mẹ̀ ịsọvọ yọ ori ẹnẹẹ, dị ẹ yaa ku ụnọ ene e tụ jẹẹ irenu. 3Avọọ, ẹnịnị vị ene vee vú ẹtẹ anka ọyị mẹẹ̄ wụ́ eguhi ẹnẹnẹ, a vị ewuri avọọ nị. Ẹhẹ ẹnịnị sị mẹ anka azịzẹ ana ahị aa kụ́ para ịzị eē tụ́ ayị avọọ, ọ rẹ sị mẹ anka areyi ọnị ahị aa kụ́ avọọ nị. 4Ẹnẹyịmavara kà ọnị ọ vị Ẹnẹyịmavara Ohomorihi ẹnịnị ana dọ wa ha hụụnị ụvọ Anigipiti ana za wa ọrịhị nị. Asị a nyị ịsa ọnyọọnyị ẹnị ẹ mẹ Ohomorihi ẹnịnị ẹ vị ọnị. Ẹ yị nyị ọdọzaha ọsa. 5#Ọda 8.11-17Ẹnẹyịmavara kà ọnị ô sere wa ịnị ụnọmị ịnị ẹtẹ ọyịwụ ịzị ẹ yị nyị enyi nị. 6Ama ịjị ẹ sị ịsa rị, dị ịnẹ sị wa ha, dị e yee wu, dị ayị anị hi wa nị. 7Avọọ ọnị vaa eyi ịrazị ka wa anka idu avọọ nị. Ộ kà ọnị ee ne kú oze zi wa anka ẹzụ avọọ nị. 8Ọnị vaa nọ wa ịrẹvụ anka ọdụmị ọnị ozi anị vu avọọ nị. Ọnị aa gara wa chẹkẹ-chẹkẹ anka uye ịnị avị, dị ọnị rị wa anka idu avọọ nị. 9Ẹnẹyịmavara kà ọnị vee vu Anisirẹrị nịnị ẹtẹ. Ẹnẹ zụ gụ wa ụvọ? 10#1 Ịsa 8.5,6Ộ họ̀ wa use ka, ịzị ohinọyị ẹnịnị ya booro aanị agụvị dị ọ dọ wa ha? Ẹ ka ene e si ohinọyị ọnịrị ọdọvịdị nịnị. Ịzị ẹnịnị hì? 11#1 Ịsa 10.17-24; 1 Ịsa 15.26Ọ kà ọnị ọ sị ọyịkụ-ọyịkụ sị ohinọyị yị wa, avọọ ọnị mẹ raà sị ayodu dọ wa nị. 12Ebira odivi Anisirẹrị nịnị vị ana chẹrẹ tịtẹ, di e tenyi ọ tẹ̀ ee zi wa. 13Ẹnịnị aa mẹ ụra anka ozi ene yi ka ọnị ẹ yị jịnẹ hụụnị ihi ozi ọnyị anị avọọ nị. 14#1 Ịkọ 15.55Ẹnẹyịmavara kà a ọnị ọ́ọ́ jị wa hụụnị ụkata aneku? Ọnị ọ́ọ́ dọ wa ha hụrị ụvọ usu? 15Anehwireemi ẹ̀ẹ daka nyị ịsa hu ezi ẹyịnyara ada ẹnịnị, Ẹnẹyịmavara kà ọnị vaa tụ́ ahị ịrịra hụrị ịnị ụnọmị eyi ịzị ọyị zị hụrẹ vẹ ka ọ va wụ enyi ini oswe ọnịrị ịkangga ene hi ịzọọ. Avaba ogu ọnị ẹ nyị vị ana va kụ́ hụrẹ wa ẹngụ. 16Anịsamarịya vị ana a vaa sị ụya rị agụvị ka ẹnịnị ệ mẹ akamawụ hi Ẹnẹyịmavara. Eyi ịrẹkụ ẹnịnị vee su nị. Ezinụvọ ẹnịnị vị ana a vaa sẹ ku ẹtẹ, dị a sị ụhwọ ha avaba anẹẹ ẹnịnị ene zyẹẹ ịnẹ.

Currently Selected:

Ihoseya 13: EBTP

Highlight

Copy

Compare