Ihoseya 14

Ihoseya ọ dà ịpẹ ka Anisirẹrị o ro ịnẹ

1Ihoseya kà Anisirẹrị nịnị ẹ ka Ẹnẹyịmavara Ohomorihi ẹnịnị na agụvị ka ịvị ẹnịnị ọ sị wa vanga nya ẹtẹ. 2Ộ kà ẹnịnị ẹ dà ịpẹ, dị ẹ vaka Ẹnẹyịmavara na. Ẹ dà ịpẹ ẹvagu avaba ebira odivi ịvị ẹnịnị, dị ọ dọ wa agụvị dị ẹnịnị ẹ zụ ga a. 3Anasiriya nịnị ẹ yị zụ dọ ẹnị ha, a vị umaata ịrẹkụ zụ dọ ẹnị ha nị. Ẹnị ẹ yị kụkụ va hẹkẹ ori dọ ịrẹsụ Ohomorihi ẹnịnị nị. Ẹnẹyịmavara vaa vayị ozi oku ẹnẹ ẹ yị nyị ọza na va ẹngụ ya.

Ẹnẹyịmavara ó wo oto ẹhẹ ọwọọwa

4Ẹnẹyịmavara kà ọnị vaa kụ aza anị varẹma ka ẹngụ na. Avaba ayị anị ọnị sị sì ịrẹyị ẹnịnị: Ọnị ẹ yị kụkụ aa kụ ayị hi ẹnịnị. 5Ọnị vaa ya yị Anisirẹrị nịnị anka orihi ini ẹtẹ ọyịwụ avọọ nị. Ẹnịnị vaa ha anka ododo, di e hi ẹpa anka ọchị ini iruku Ịrẹbanọnị avọọ nị.

6Ẹnịnị vaa yara, di e zoza anka ọchị orivi. Ẹnịnị vaa da agụ zoza anka ọchị Isida ini iruku Ịrẹbanọnị. 7Ẹnẹyịmavara kà ọnị re ve sere ẹnịnị. Ẹ vaa kụ akụ tụ ịnị aarẹ, dị ọ mẹ anka ụbazị ịvayịnị avọọ. Ẹ vaa ngụrẹyị anka eche Anirebanoni avọọ. 8Anisirẹrị nịnị vaa hụrẹ ụvọ hụụnị ori nịnị ọyị hẹkẹ. Ẹnẹyịmavara kà ọnị vaa wụ́ aduwa ẹnịnị, dị ọnị sị eyi pe wa; ọnị vaa vị uhuhu yị wa anka ọchị isipirẹsị avọọ nị. Ọnị ọ vaa mẹ ka o ze yị wa oze tụra oze nị.

Ọdịrẹma

9Aza ana àa yẹ ịrẹyị vaa yẹ avaba ịsa ẹnịnị. Aza ene eyi anị hweyi ẹẹ yẹ ẹ. Oze Ẹnẹyịmavara ọ vọrọ ọnị aza ana yẹ ịrẹyị aa sị mẹ ẹhẹ ẹnịnị nị. Ama ọnịvị nịnị vị ana vaa vanga, dị ẹ hyẹdụ agụvị ka ẹ sị eyi wụ̀ ịrẹyị anị.

Currently Selected:

Ihoseya 14: EBTP

Highlight

Copy

Compare