Ọyịkụra 33

Ẹnẹyịmavara ộ mẹ̀ ọda ka Anisirẹrị nịnị ẹ̀ hụrẹ ataba Ịsịnayị

1 # Oyn 12.7; Oyn 26.3; Oyn 28.13 Ẹnẹyịmavara ộ kà a yi Imosiisi dị ọ ka ọ̀ kwẹẹtẹ dị ọ̀ kụ́ aza ọnị ọ kụ́ hụrẹ Ijipiti aa vẹ dị ẹ̀ẹ nọ ịnị ẹtẹ ọnị ọnị kà a ka ọnị hị́ eku ka ọnị vaa sịị yị Abụrahamị, Ayiziiki ọnịrị Ijekọvụ. Ọ kà ọnị ọ sị ọ kà ka ezi anị ịrẹma-ịrẹma ọnị vaa sị ẹtẹ ọnọọ yị nị. 2Ẹnẹyịmavara kà ọnị vaa tụ́ anggẹẹrị anị dị ọ̀ tụ́ ọvịdị ẹnịnị na. Ọ rẹ ka ọnị vaa dụ anẹkụra ẹnẹnị hụụnị ẹtẹ ọnọọ yị wa. Anẹkụra ẹnẹẹ ẹ vị Anikenaani, Anamọrị, Anihiti, Aniperizi, Anihivi ọnịrị Anijebusi. 3Ọ kà ẹ̀ nọ ịnị ẹtẹ ọnọọ ene zoza ẹtẹẹtẹrẹ, dị ọ nyị avị ana vọrọ ka ịsụpa ọ̀ rị dị ọ rẹ zụ mẹ̀ ịsa. Ẹnẹyịmavara kà ọnị ụvọta ọ yị vaa saasa wa agụvị ka ẹ sị vị anakamawụ. Ọ kà ọnị ọ̀ọ saasa wa, ọnị ọ nyayịnẹ wụ̀ wa va ha ózee. 4Ịjị aza ẹnẹẹ maanị wụ́ enube odivi ọnọnị, di e nyima dị eyee du ayị nị. Ẹ yị nyị ọza ẹnẹnị ana kụkụ kụ́ ẹnya ọvị anị hi ẹngụ. 5Aa zị wa ẹngụ ka Ẹnẹyịmavara ộ kà a yị Imosiisi ka ọ̀ kà a yị Anisirẹrị ka anakamawụ ẹ vị nị. Ọ rẹ ka ọnị ọ̀ọ hyakụ saasa wa na mẹ ụmẹ chee, ọnị ọ nyayịnẹ wụ̀ wa va ha. Ẹnẹyịmavara rẹ ka Imosiisi ọ̀ kà a yị wa ka ẹ̀ kụ́ ẹnya ọvị ẹnịnị hi ẹtẹ, dị ọnị ò ve ro o ịsị ọnị vaa mẹ wa. 6Ịzẹyịza dị Anisirẹrị nịnị kụ́ ẹnya ọvị ẹnịnị hi ẹtẹ ịnị ataba Ịhọrẹbị. Ataba Ịhọrẹbị a rẹẹ̄ hị́ ataba Ịsịnayị nị.

Ajẹngụ ọnị Ohomorihi ọnịrị azaā anị naa gẹ

7Ịzị Anisirẹrị nịnị ẹ̀ẹ kụ́ udi tụ́, di Imosiisi sị ajẹngụ dị ọ ka nọ ẹhẹ chee, di o si hi ẹtẹ. Dị ọ ka ịzọọ ọ vị ajẹngụ ịzị aā gẹ nị. Àa nyị ọza ene ee sì ka oni ò pe Ẹnẹyịmavara kà ịrẹyị dị ọ jịnẹ hụrẹ udi dị ọ nọ ịzị ajẹngụ ana aā gẹ yà. 8Imosiisi ọ̀ọ maanị aa nọ ịnị ajẹngụ ọnọọ, dị avaba aza ana vọ kwẹẹtẹ jẹẹ enoze ajẹngụ ẹnịnị, di ẹ sị eyi pe Imosiisi pooro dị ọ̀ ngụ ịnị ajẹngụ ọnọọ. 9Imosiisi ọ̀ọ sị ngụ ịnị ajẹngụ, di eguhi maanị dà anka ọhẹ avọọ dị ọ jẹẹ enoze ajẹngụ ọnọọ. Dị Ẹnẹyịmavara ee pe Imosiisi kà ịrẹyị. 10Ụmẹ tụra ụmẹ ana aza ẹnẹẹ èe re ka eguhi ộ vavọọ dà jẹẹ enoze ajẹngụ ọnọọ, dị ẹ kwẹẹtẹ jẹẹ enoze ajẹngụ ẹnịnị dị ẹ tana tụra ẹtẹ dị ẹ kụ́ Ohomorihi. 11Ẹnẹyịmavara vị anaā kà ịrẹyị yị Imosiisi eyi gẹrị eyi anka ọza ọnịrị ọta anị mẹ̀ẹ kà ịrẹyị avọọ. Di Imosiisi rẹ varẹma nọ udi anị. Ama Ijosuwa ozi Inuni ana vị ozweyi ana aa zị Imosiisi ụtụ ọnị ọ mā hụụnị ajẹngụ ọnọọ.

Ẹnẹyịmavara kà ọnị vaa yaa pe aza anị

12Ẹkụhị ọnya di Imosiisi va kà a yị Ẹnẹyịmavara dị ọ ka, “Ụ ka ma kụ́ aza ẹnẹnị dị yaa na, ama wệ yị va kà a mị ọza ọnị ụ vaa tụ́ ka ò pe mi kụ́ wa na. Ụ rẹ ka wâ yẹ mị ẹtẹẹtẹrẹ, ka ebira amị ô zee wu eyi. 13Wàa maanị nyị mi iyi, navọ dị ụ wa kà a zụ̀ mi isu wee sì ka wa mẹ. Maà sị yẹ dị ma zụụ hẹkẹ wụ dị ma yịị mẹ̀ ebira ene wu eyi. Wáā yẹ ka aza ẹnẹnị vị aza awụ.” 14Dị Ẹnẹyịmavara tụ́ ohi dị ọ ka, “Ẹnị ụvọta vaa saasa wụụ na, mị vaa mẹ ka ayị awụ ọ̀ nẹtẹ.” 15Di Imosiisi ka, “Aarịhịnị ẹwụ ụvọta ọ̀ yị saasa ayị na, asị ụ kà a ka ya hụụ ịzẹnị. 16Wẹ̀ yị saasa ayị na, aza ana vọ ẹ yị vaa yẹ ka we sì ịrẹyị amị ọnịrị aza awụ ana vọ. Sị ẹ kụkụ vaa sị yị vị irenyii yị ẹyịrị aza ana vọ ene hi ịnị ẹhẹ?” 17Dị Ẹnẹyịmavara kà a yị Imosiisi dị ọ ka, “Ịsị wàa ka ma mẹ, mị vaa mẹ̀ ẹ, agụvị ka mâ yẹ wụ ẹtẹẹtẹrẹ, di ebira awụ re zee mi eyi nị.” 18Di Imosiisi va ka Ẹnẹyịmavara ọ̀ navọ ọ̀ sị ụbanyị anị zụ̀ ọnị nị. 19#Iro 9.15Dị Ẹnẹyịmavara kà ọnị vaa zẹẹ ka Imosiisi ò re avaba ịsa ozoza ọnị ọnị mẹ̀ ọnị aa parahu. Dị ọnị rẹ hị́ ịrẹha anị ka Ẹnẹyịmavara éyi Imosiisi. Ọ rẹ ka, “Ọza ọnị màa vaa vayị anị vị ọnị maa vayị anị. Ọza oni mee vee ro o yị vị oni mee ro o yị.” 20Dị Ẹnẹyịmavara rẹ ka, “Ama mẹ yị vaa zẹẹ ka we re eyi ịrẹsụ amị. Ọza o mē re mi dị ọ kụkụ varẹma na ra ẹhẹ.” 21Dị Ẹnẹyịmavara rẹ ka, “Á nyị aha ọnya ana gụrị mị. Ụ va naa jẹẹ ịrẹsụ ịrẹta ọnya ịzọọ. 22Ịjị maa parahu ịnị ụbanyị amị, mị vaa sị wụụ tẹ ịnị anaha ịrẹta ọnọọ, di mi si ụvọ kú wu pooro di ma para hu. 23Màa sị para hu dị ma sị ụvọ amị, di we re ịrẹma amị. Ama mẹ yị zụ zẹẹ ka we re eyi ịrẹsụ amị.”

Currently Selected:

Ọyịkụra 33: EBTP

Highlight

Copy