Ọyịkụra 32

Aza ệ sị ịgooru mẹ Imaaru ẹnẹ ẹ hẹkẹ

(Ọda 9.6-29)

1 # Ụkọ 7.40 Anisirẹrị ệ jẹẹ iruvo ataba zi Imosiisi pooro, ee kii ku Imosiisi o yi chi hụụnị ataba vẹ. Dị ẹ va kụ́ ẹngụ ne tù Eerọnị dị ẹ ka, “Kwẹẹtẹ wa mẹ ori yị vị ẹ̀ kụ́ yị ya na, agụvị ka yẹ yị yẹ ịsị ẹ mẹ Imosiisi ana vịdị kụ́ yị hụrẹ Ijipiti aa vẹ.” 2Dị Eerọnị ka, “Kụ́ ochirụtọ ana a si igooru mẹ oni ose ewu nịnị ọnịrị ezi anọrụ awụ nịnị ne beri ezi anẹẹ awụ nịnị nyị, dị wa kụ́ wa vẹ”. 3Ịzẹyịza dị aza kụ́ ochirụtọ ẹnịnị, dị ẹ kụ́ ọ na yị Eerọnị nị. 4#1 Ohi 12.28; Ụkọ 7.41Di Eerọnị kụ́ ochirụtọ ana a kụ́ naa yọ, dị ọ sị mẹ imaaru, dị ọ sị mẹ ori nị. Dị ẹ ka, “Ẹwụ nịnị Anisirẹrị, ori ana kụ́ wụ nịnị hụrẹ Ijipiti vẹ yọ.” 5Ịjị Eerọnị vavọọ re e, dị ọ jị ụta tụ́ ọvịdị imaaru ọnọọ dị ọ nọ̀ ọ yị avaba aza dị ọ ka, “Ụhwọọ a vaa rị eche dị a sị tamayị Ẹnẹyịmavara o!” 6#1 Ịkọ 10.7Ịzẹyịza eyinẹhẹ anị dị aza ẹnẹẹ jintu kwẹẹtẹ dị ẹ mẹ̀ ịsọvọ ana aā rị ịra ọnịrị ịsọvọ ana aā mẹ dị à gà a rị nị. Ịjị ẹ sị ọnọọ mẹ, di e kuku hi ẹtẹ dị ẹ yaa rị, di eyee hú dị ẹ rẹ yaa nyị ẹzẹ nị. 7Dị Ẹnẹyịmavara va hị́ Imosiisi dị ọ ka, “Wụsẹ we chii na agụvị ka aza awụ ọnị ụ kụ́ hụrẹ Ijipiti aa vẹ ẹ sị ngụ ini ebira odivi aa mị. Ẹnịnị ẹ yị kụkụ yẹ mị. 8Ệ wụsẹ raà sị ayị hụụnị ọda ọnị mị mẹ yị wa. Ẹ na raà si imaaru mẹ ori yị ẹngụ ẹnịnị. E si nyima ee kú ẹtẹẹ kụ́ ọ, ẹ rẹ yaa mẹ ịsọvọọ yọ, ẹ yaa kà a yị Anisirẹrị nịnị ka ori ana kụ́ wa jịnẹ hụrẹ Ijipiti aa vẹ ọ vị ọnọọ nị.” 9Dị Ẹnẹyịmavara rẹ kà a yị Imosiisi dị ọ ka ọnị ọ ra à zama aza ẹnẹẹ re, ọnị ọ sị yẹ ka anakamawụ ẹ vị nị. Dị ọ ka: 10“Navọ mị dị ma nyayịnẹ mẹ ọyịkụ yị aza ẹnẹnị ẹtẹẹtẹrẹ, dị ma wụ̀ wa va ha. Dị ahịka ẹwụ mị kụkụ vara anẹkụra ọbanyị nị”. 11#Ịrị 14.13-19Ama di Imosiisi aa dá ịpẹẹ yị Ẹnẹyịmavara ana vị Ohomorihi anị nị. Dị ọ ka, “Te, Ẹnẹyịmavara, Wâ yẹ ka ụkata-ụkata ụ sị kụ́ aza ẹnẹnị hụrẹ Ijipiti nị. Navọ asị ụ kà ka waa kụ́ ayịị hi wa naa ngụ ịzị ayị kụ́ wụ ne tù. 12Wàa vavọọ mẹ, wáā yẹ ka vị Anijipiti vaa kà a ka ịsa odivi u ro tụ́ ịnị ayị dị ụ kụ́ wa jịnẹ vẹ ka wa va wụ̀ wa hi ịnị ataba ịzẹnị nị. Dị ẹ ka ụ sì ka we vu wa ẹtẹ hụụnị ẹhẹ nị. Aarịhịnị navọ wa nyị isuuru, di u we ro o, dị asị ụ zẹẹ ka ịsa odivi ò tù aza awụ ẹnẹnị. 13#Oyn 22.16,17; 17.8Tamayị ịrẹyị ezi ahụ awụ ẹnẹnị, Abụrahamị, Ayiziiki ọnịrị Ijekọvụ. Tamayị ka wa raà sị ụbanyị ẹngụ awụ hị́ eku ka ụ vaa mẹ ka ezi ẹnịnị ẹ̀ rụrụ anka ụzọmị ene hi ẹbẹẹba. Ụ ka ezi anị ụ vaa sị avaba ẹtẹ ọnọnịị yị nị. Ụ ka wa sị ọ ka ka ẹ yị zụ nyị ka wẹ yị vaa sịị yị wa dị ọ̀ vị ẹẹnịnị pooro na.” 14Ịzẹyịza dị Ẹnẹyịmavara varẹma ro o, dị ọ̀ yị va zẹẹ ka ịrẹyị odivi ò tù aza ẹnẹẹ anka ọ mẹ̀ vịdị yaanị mẹ nị. 15Di Imosiisi chi hụụnị ataba dị ọ varẹma ne tù aza ẹnẹẹ nị. Ịrẹta ẹẹva ana a chẹrẹ ọda ẹnẹẹ hi vị ọnị ọ kụ́ rị ụvọ. Eyi ẹyịva ịrẹta ẹnẹẹ a chẹrẹ ịsa tụ́ nị. 16Ohomorihi ọnị ụvọta ọ mẹ ịrẹta ẹnẹẹ nị. Ọnị ụvọta ọ rẹ chẹrẹ ịsa ẹnẹẹ tụ́ ọ nị. 17Ẹ màa vẹ, di Ijosuwa wụ́ ka aza ee nowu nị. Dị ọ kà a yị Imosiisi dị ọ ka owu ịrẹkụ aa sụ́ udi avọọ nị. 18Di Imosiisi ka, “Owu ọnọnị o yi vene owu aza ana nyị ehuna ịnị ịrẹkụ. O yi re vene owu aza ene e si hu ẹtẹ. Maa wụ́ aza èe rere aa jị ahẹ avọọ.” 19Imosiisi màa kà a gụrị ajẹngụ, di o re imaaru ana a mẹ jẹẹ, dị aza aa nyị ẹzẹ, ayị anị aa dà ọva. Di o ne ịrẹta ọnị ọ sị rị ụvọ aa vẹ nya ẹtẹ iruvo ataba ọnọọ, dị ẹ chaka rugu-rugu nị. 20Dị ọ sị imaaru ẹnị ẹ mẹ dị ọ rị ọ ịra, dị kwọ̀ ọ nẹrẹ-nẹrẹ nị. Dị ọ sị ọ dị ọ và a hi ini enyi, dị ọ ka avaba Anisirẹrị e hú ọ nị. 21Di Imosiisi va hị́ Eerọnị dị ọ ka, “Sị aza ẹnẹnị mẹhị na mẹ wụ dị ụ maanị tụra wa na mẹ̀ ebira odivi ọnọnị?” 22Di Eerọnị ka, “Nda, aarịhịnị asị ụ kụ́ ayị. Wáā yẹ ka aza ẹnẹnị vi ene ee sì ka ẹnị ẹ̀ẹ mẹ̀ ebira odivi. 23Ẹ ka ma mẹ ori yị ẹnị dị ọ̀ kụ ẹnị dị ẹnị ẹ̀ẹ na. Ẹ ka ẹnị ẹ yị yẹ ịsị ẹ mẹ ẹwụ Imosiisi ana vịdị kụ́ ẹnị hụrẹ Ijipiti aa vẹ. 24Dị mị va kà a yị wa ka ọza ana aà nyị ochirụtọ ana a sị igooru mẹ ọ̀ kụ́ ọ vẹ nị. Ịzẹyịza dị ẹ kụ́ igooru ẹnịnị va mị nị. Dị mị kụ́ ọ va hi ịra, dị ahịka imaaru ọnọnị ọ vana jịnẹ vẹ nị.” 25Imosiisi o si re ka ụvọ ọza ọ yị kụkụ kara aza ẹnẹẹ. Eerọnị ọ raà mẹ wa ka asị ẹ kụkụ wụ́ ịrẹyị ọza. Hu avọọ ẹ sị ẹngụ ẹnịnị vara ọnịyẹyẹ eyi ọnịvị ẹnịnị, 26avọọ di Imosiisi na jẹẹ enoze ajẹngụ ọnọọ dị ọ ka aza ana aà vi aza Ẹnẹyịmavara ẹ̀ ká ọnị vẹ nị. Dị avaba Anisirẹrị nịnị zwe ká a na nị. 27Di Imosiisi hị́ wa dị ọ ka ọzọza ọ̀ tụ̀ ụhwọ anị chire avaka. Di ẹ̀ ngụ avaba udi ọnọọ na gẹ ẹtẹ dị ọ̀ wụ ọyịnyara anị, ọta anị ọnịrị anokokooro anị. 28Ịzẹyịza dị Anisirẹrị nịnị mẹ anka Imosiisi mẹ̀ mẹ ọda nị. Ịhị ọnọọ aza ene sú ệ gụ akawụ rị akahị. 29Di Imosiisi ka, “Ajịnị wa raà sị ẹngụ awụ nịnị yị Ẹnẹyịmavara. Ọzọza ọ sị ozi anị ọnịrị ọyịnyara anị wụ, agụvị avọọ Ẹnẹyịmavara ọ raà mẹ ka ò zee wu nịnị ajịnị.” 30Eyinẹhẹ anị di Imosiisi va hị́ aza ẹnẹẹ dị ọ kà a yị wa dị ọ ka, “Wéē re ka ebira odivi ọbanyị ụ mẹ nịnị aanị nị. Ama maa hịrẹẹ nọ ịnị ataba nee tụ̀ Ẹnẹyịmavara. Aà ka ọnịị mẹ mị zụ mẹ ka ọ̀ vagu wu nịnị ịnị ebira odivi ọnị ụ mẹ̀ nịnị aanị.” 31Ịzẹyịza di Imosiisi varẹma hịrẹ ne tù Ẹnẹyịmavara nị. O mè tù ịzọọ dị ọ ka, “Nda, ebira odivi ana aza ẹnẹnị mẹ̀ ọ sị banyị baaba. Ẹ na sị igooru ệ mẹ ori yị ẹngụ ẹnịnị. 32#Ahẹ 69.28; Ẹtẹ 3.5Aarịhịnị kwogwo, navọ wa vagu wa ini ebira odivi ẹnị ẹ maanị mẹ̀ aanị. Wàa ka wẹ yị vagu wa, ẹwa rẹ kụkụ nyee ịrẹha amị hụụnị iwe ọnị ụ chẹrẹ ịrẹha aza awụ hi.” 33Dị Ẹnẹyịmavara tụ́ Imosiisi ohi dị ọ ka, “Ọza ana àa mẹ̀ ebira odivi hi mi, ọnị kẹnẹ mi vee nyee ịrẹha anịị hụụnị iwe ọnị mị chẹrẹ ịrẹha aza amị hi nị. 34Ama we chii na booro aanị dị wa na kụ́ aza ẹnẹẹ dụ wa nọ ịzị mị ka wa kụ́ wa nọ. Mị vaa tụ́ anggẹẹrị amị ka ọ̀ tụ́ ọvịdị awụ nịnị dị waa na nịnị. Ama òo si tù ụmẹ ana vọrọ ka ma sị sị ụya rị wa, mị vaa sị ụyaa rị wa agụvị ebira odivi ẹnị ẹ mẹ̀.” 35Ẹnẹyịmavara ộ mẹ̀ ka ụkụ ọnya aanị ọ̀ za aza ẹnẹẹ agụvị ịsị ẹ kà a ka ori ọnị Eerọnị mẹ avọọ ộ vị yị ẹnị.

Currently Selected:

Ọyịkụra 32: EBTP

Highlight

Copy