Ọyịkụra 34

E re tenyi ịrẹta ọsa bẹ ka à chẹrẹ ọda tụ

(Ọda 10.1-5)

1Ẹnẹyịmavara ộ hị́ Imosiisi dị ọ ka, “Sị ịrẹta ẹẹva dụ wa bẹ wa anka ịpaapa ẹnẹẹ. Ịsa ọnị mị chẹrẹ tụ́ ịnị ịrẹta ịpaapa ọnị ụ chaka avọọ, mi ree tenyi ọ chẹrẹẹ tụ́ ịnị ịrẹta ọnị mị ka wa bẹ aanị. 2Tenyi ẹngụ awụ dị ụ wa kwẹẹtẹ ẹnẹnẹ dị ụ wa vẹ ịrẹsụ ataba Ịsịnayị ve tù mi. 3Asị a nyị ọza ana dụ wụ vẹ. Asị a hyakụ nyị ọzọnyị-ọzọnyị ēni e re ọgụrị ataba ịzọọ. Asị ụ zẹẹ ka ịsụpa ẹ̀ na rị iruvo ataba ịzọọ.” 4Ịzẹyịza dị Imosiisi kụ́ ịrẹta ẹẹva dị ọ bẹ wa anka ịpaapa nị. Ẹnẹnẹ viri-viri dị ọ kwẹẹtẹ dị ọ kụ́ ịrẹta ẹnẹẹ rị ụvọ dị aa hịrẹ nọ ịnị ataba Ịsịnayị anka Ẹnẹyịmavara mẹ̀ kà a yọ nị. 5Dị Ẹnẹyịmavara ngụ eguhi chi vẹ, dị ọ va jẹẹ pe Imosiisi ịrẹsụ ataba ịzọọ nị. Dị ọ hị́ ẹngụ anị ịrẹha ka Ẹnẹyịmavara nị. 6#Kụra 20.5,6; Ịrị 14.18; Ọda 5.9,10; 7.9,10Ọ mẹ̀ zị ọvịdị Imosiisi aa parahu, dị aa hị́ ẹngụ anị ịrẹha dị ọ ka ọnị Ẹnẹyịmavara ana vị Ohomorihi anaā vayị ọza ẹtẹẹtẹrẹ. Ọ kà ọnị ọ mā hụra kụ́ ayị, ama ọnịị̄ sì ịrẹyị ọza dị ọnị rẹ nyị ịzẹyịza nị. 7Ọ kà onii sì ịrẹyị otomiroku aza. Ọ kà ẹ̀ẹ mẹ̀ ebira odivi, dị ẹ daka kwẹẹtẹ tù ọnị nị, ọnịị̄ vagu wa ịnị ịsa odivi ẹnẹ ẹ̀ẹ vavọọ mẹ. Ọ kà ama ọza ọ̀ọ rị ịvị, ẹ yị zụ nyị ka ọnị ọ yị sị ụya rị ọ. Ọ kà ọza ọ̀ọ mẹ ịvị ezi ọza ọnọọ ịrẹma-ịrẹma vị ana aa rị ụya anị. 8Di Imosiisi wụsẹ tana tụra ẹtẹ dị ọ kụ́ Ohomorihi nị. 9Dị ọ ka, “Ananyị mị, aarịhịnị wèe nyị mi iyi navọ wa saasa yị na. Ịzẹyịza aza ẹnẹnị vị anakamawụ, ama navọ wa vagu yị ịnị avaba ebira odivi ọnị yaa mẹ̀ aanị. Navọ wa sị yị mẹ aza awụ.”

Oto ene e tenyi mẹ

(Kụra 23.14-19; Ọda 7.1-5; 16.1-17)

10Dị Ẹnẹyịmavara va ka, “Ẹmịrị ẹwụ nịnị aa kà ịrẹyị ọnyaa tịtẹ. Mị vaa mẹ ịrẹyị ẹbanyị-ẹbanyị ini eyi anda awụ nịnị. Ẹngụ ịrẹyị ẹnẹẹ, ọza ộ yị vịdị mẹ̀ ẹ da ịnị ẹkụra ọnyọọnyị ịnị ẹhẹ. Aza ẹnị ẹwụrịị ra nịnị vee re ẹngụ ịrẹyị ẹbanyị ẹnị ẹmị Ẹnẹyịmavara vaa mẹẹ wụ nịnị; 11avọọ sị ụvọ za ịrẹyị ọnị maa kà a wụ ajịnị aanị. Anẹkụra ẹnẹnị vị ọnị mị vaa dụụ kwooze wụ nịnị. Anamọrị, Anikenaani, Anihiti, Aniperizi, Anihivi ọnịrị Anijebusi. 12Sị eyi pe ẹngụ awụ nịnị, o. Asị ụ na zẹẹ ka ẹwụrị anẹkụra ọnị ụ waa nọ nịnị aanị ọ̀ na rị vabẹ. Ẹwụrị wa ọ̀ọ na rị vabẹ, vi eyee vene wuu ngụ ụvọ nị. 13#Ọda 16.21Wèe tù ịzọọ ụ chaka ụta ịzị ẹ yàa mẹ̀ ịsọvọ, rẹ za avaba ịrẹta ẹnị ẹ sị mẹ ori dị wa chaka wa. Â nyị ọchị ẹnị ẹ bẹ yị ori ẹnịnị ẹnị ẹẹ̄ hị́ Acherimi. Ọchị ọnọọ vi oni u wee che nịnị. 14Asị a nyị ori ọnyọọnyị ọnị ụ na hẹkẹ nịnị. Wâ yẹ nịnị ka ẹmị Ẹnẹyịmavara vị anaā kụ́ ụhị. Mẹ mā dọ ka ọza ò pe mi zune ịsa.” 15Nyayịnẹ sị eyi pe ẹngụ awụ nịnị. Asị a nyị ịsị ẹwụrị aza ẹnẹẹ ana ra ịnị ẹtẹ ọnọọ na kà tịtẹ nịnị. Ẹwụrị wa ọ̀ọ vavọọ na rị, Ịjị èe si hu aa na hẹkẹ ori ẹnịnị dị ẹ mẹ ịsọvọọ yọ nị, dị ẹ va hị́ wụ nịnị dị ụ naa rị ịsa ịsọvọ ẹnịnị. 16Waa na nyị ozi ẹnịnị va yị ozi ewu nịnị, Ịjị ozi ẹnịnị aa hẹkẹ ori anị, vị ẹ yaa kụ́ ezi ewu nịnị za nị. 17#Kụra 20.4; Ire 19.4; Ọda 5.8; 27.15Wẹ yị nyayịnẹ na sị enyusẹ bẹ ịsa ọnyọọnyị dị waa hị́ ọ ori nịnị. 18#Kụra 12.14-20; Ire 23.6-8; Ịrị 28.16-25Waā rị eche ọnị ọza ọ̀ yị mā sị owu tụ́ ịnị ịsọyịrị anị. Pooro ịnị ẹkụhị ịhịmba asị ụ rị ịsa ana a sị òwù tụ́ anka m mẹ̀ vịdị mẹ ọda anịị wụ. Ụmẹ aanị ọ̀ọ rẹ maanị sị tù ịnị ụhwẹ Abibi, re ka wâ mẹ ido ọnọnị. Ịnị ụhwẹ ọnọọ ụ sị jịnẹ hụrẹ Ijipiti nị. 19#Kụra 13.2Ọza ọ̀ọ ma ozi ịpaapa, ịsụpa ọ̀ọ ma ozi ịpaapa dị ọ vị ọnọrụ nị, ẹma nyị nị. Ozi ịpaapa ịsụpa ọ̀ọ vị ịkẹrịkẹtẹ dị ụ sị imaaru dọ ọ ịrẹsụ. 20#Kụra 13.13Wàa ka wẹ yị sị ịsa dọ ọ ịrẹsụ, dị ụ wụ̀ ọ. Avaba ezi ịpaapa ana vị ọnọrụ vị ọnị ụ vaa sị ịsaa dọ ịrẹsụ. Asị a nyị ọza ana jị avọ osusu vẹ ịda amị. 21#Kụra 20.9,10; 23.12; 31.15; 35.2; Ire 23.3; Ọda 5.13,14Mẹ avaba ụkọrọ ọnị ụ wàa mẹ ịnị akakana ẹkụhị ịhịnọnyị. Ịhị ẹ tụ́ ọ ẹkụhị ịhịmba dị ụ tụ́ ụhwọ. Òo zee e eyi ọ̀ vị ụmẹ ana a sịị̄ jị ịrịkụ òo zee e eyi ọ̀ vị ụmẹ ana a sịị̄ tọ̀ọ́ ịsa ọyịna â nyị ka wa tụ́ ụhwọ ịnị ẹkụhị ụhwọtụ.

22 # Ire 23.15-21; Ịrị 28.26-31; Ire 23.39-43 Wàa mẹ̀ ịsa ịnị aarẹ awụ ana vịdị hụrẹ, ẹhụụ akụ avọọ, re ka waa rị eche anị. Wàa raa kụ́ ịsaa hi ịnị ụhwọ ịrayị ọ̀ọ maanị sị gẹ, rẹ tamayị dị wa rị eche anị. 23Ụpẹ ẹẹta ịnị ịrayị ọnọrụ awụ nịnị vaa vẹ va hẹkẹ ẹmị ana nyị wụ nịnị ana vị ohinọyị nị. Ẹmị ọnọọ ọ vị Ohomorihi Anisirẹrị nị. 24Mị vaa dụ anẹkụraa hụrẹ oze wụ nịnị. Mị rẹ vaa mẹ ka ẹtẹ awụ nịnị ọ̀ gana eyi. Wàa vavọọ aa vaa hẹkẹ mị nịnị ụpẹ ẹẹta ịnị ịrayị, ẹ yị nyị ọza ana zụ vẹ dị ọ̀ va dọ ẹtẹ awụ nịnị. 25#Kụra 12.10Wàa sị ịsụpa vaa mẹ̀ ịsọvọ mị nịnị, asị ụ zẹẹ ka ịsa ọnị waa mẹẹ tụ́ ọ ọ̀ nyị òwù. Asị ụ zẹẹ ka ịsa ịsọvọ ana a mẹ ịnị eche ọyịparahu ọ̀ vọ tịtẹ nọ ẹhẹ. 26#Ọda 26.2; Ọda 14.21Ịsa ịpaapa ọnị ụ wàa sị hụụnị ịnị aarẹ awụ, sị ọ ve ini eehi ẹmị Ẹnẹyịmavara ana vị Ohomorihi awụ. “Wàa chịnẹ ozi ẹvụ asị ụ sị inono ọnyị anị tụ́ ọ chịnẹ.” 27Dị Ẹnẹyịmavara rẹ kà a yi Imosiisi dị ọ ka ọ̀ chẹrẹ ịrẹyị ẹnẹẹ tịtẹ nị. Ọ kà ịrẹyị ẹnẹẹ ọ vị ịrẹyị ọnị ọnịrị Anisirẹrị ne beri Imosiisi kà tịtẹ nị. 28Imosiisi ọnịrị Ẹnẹyịmavara ê hi ịrẹsụ ataba ịzọọ ọọdụ ọnịrị ịrahụ pooro mẹ ẹkụhị ẹbẹẹva. Imosiisi ọ yị rị ịsa, o yi hú enyi. Dị ọ sị ọparị ẹnẹẹ ana a sị ịrẹta bẹ, dị ọ chẹrẹ ịrẹyị oni Ohomorihi ọnịrị Anisirẹrị ka tịtẹ tụ́ ọ nị. Ịrẹyị ẹnẹẹ ọ vị ọda ẹẹwụ oni Ohomorihi mẹ yị wa nị.

Eyirẹsụ Imosiisi ộ za nyanga-nyanga

29 # 2 Ịkọ 3.7-16 Imosiisi ô chi hụụnị ataba Ịsịnayị vẹ. Dị ọ kụ́ ịrẹta ẹẹva ẹnẹẹ ọnị ọ chẹrẹ ọda ẹẹwụ ẹnẹẹ tụ́ rị ụvọ nị. Imosiisi ọ yị yẹ ka eyi anị vị ana kụkụ aa za nyanga-nyanga agụvị ka ô pe Ẹnẹyịmavara kà ịrẹyị. 30Ịjị Eerọnị ọnịrị Anisirẹrị ana vọ re Imosiisi, ê re ka eyirẹsụ anị aa za ẹtẹ. Angwa ee hi wa, ẹ yị kụkụ nyayịnẹ kà pe Imosiisi. 31Di Imosiisi va hị́ wa nị. Ọ mẹ̀ hị́ wa di Eerọnị ọnịrị azọkụ Anisirẹrị tere pe Imosiisi, di Imosiisi kà ịrẹyị yị wa nị. 32Dị avaba aza ẹnẹẹ ve tere pè Imosiisi, dị ọ va kà a yị wa avaba ọda ẹnị Ẹnẹyịmavara mẹ yị wa ịrẹsụ ataba Ịsịnayị. 33Ịjị Imosiisi sị ịrẹyị kà yị wa, dị ọ sị ubobo kú eyirẹsụ anị nị. 34Ama àa ngụ nee tù Ẹnẹyịmavara, dị ọ hụ ịsa hụụnị eyi anị pooro dị ọ̀ va jịnẹ vẹ. Ọ̀ọ jịnẹ vẹ dị ọ va kà a yị Anisirẹrị ịsa oni Ohomorihi kà yọ nị, 35dị ẹnịnị re ka eyirẹsụ anị aa za. Di Imosiisi rẹ và ubobo anị kú eyi pooro dị ọ̀ va varẹma ne pe Ẹnẹyịmavara kà ịrẹyị.

Currently Selected:

Ọyịkụra 34: EBTP

Highlight

Copy