Ọyịkụra 31

Aza oni Ohomorihi nyị ka ẹ̀ jị ajẹngụ anị

(Kụra 35.30—36.1)

1Dị Ẹnẹyịmavara kà a yị Imosiisi dị ọ ka: 2“Ma ra à nyị Ibezareri ana vi ozi Ọọrị. Ada Ọọrị ọnọọ ọ rị Ihuri nị, Anijuda ẹ vị nị. 3Ma raà sị Ụhwẹ amịị yọ ẹtẹẹtẹrẹ ka ọ̀ yẹ eyi ụkọrọ dị ọ̀ rẹ yẹ ịrẹyị dị ọ̀ zụ mẹ avaba ụkọrọ ana nyị ụkẹkẹ. 4Ọ yara si igooru ọnịrị enyusẹ ana a sịị mẹ ẹkẹhị ne beri enyusẹ ana aā hị́ ịkọpa dị ọ sị mẹ ụna irenyi-irenyi. 5Ọ rẹ yara sị ịrẹta ozoza ana katarihi dị ọ sị mẹ̀ ịsa ọvị. Avọọ ọ mẹ̀ rẹ yara sị ọchị mẹ ụna irenyi-irenyi nị. Ọ yara mẹ ụkẹkẹ irenyi-irenyi. 6Ma rẹ ra à nyị Ohoriyabi ana vi ozi Ahisamachị ka ọ̀ gụ ọ ụvọ. Ohoriyabi vị Anịdanị. Avọọ m mẹ̀ sị ịrẹyọyẹ yị avaba ọnụkẹkẹ ẹnẹẹ nị. Ẹnịnị vaa mẹ avaba ụkọrọ ọnọọ anka m mẹ̀ ka wa mẹ̀ ẹ. 7Ịsị ẹnịnị vaa mẹ̀ ụkọrọ ịnị anị yị: Ajẹngụ ịzị aā gẹ ọnịrị apoti oto ne beri òkú anị ọnịrị avaba ẹnya ene vee hi ịnị ajẹngụ ọnọọ. 8Ẹngụ ẹnya ana vee hi ịnị ajẹngụ ẹnẹẹ ẹ vị itevuru ọnịrị ẹnya ene hi ịnị anị, ịzị aā sị ozotupaa tụ́ ana a sị igooru obooro mẹ ọnịrị avaba ẹnya anị ne beri ụta ịzị a yàa rị eturare ịra. 9Ẹnya ọsa ene hi ịnị ajẹngụ ọnọọ ẹ vị ụta ịzị a yàa rị ịsọvọ ana àa mẹ ịra ọnịrị avaba ẹnya anị, ẹhụụ ịchacha ana aā ká enyi hụụnị anị nyịna ẹngụ ọnịrị ịzị aā sị ọ tụ́. 10Ẹnya ana vọ ene hi ịnị ajẹngụ ọnọọ ẹ vị awuru ēni e hi, ẹhụụ awuru ana Eerọnị ana vi ohirẹsụ irehi Ohomorihi aa sịị mẹ̀ ụkọrọ ini eehi Ohomorihi ọnịrị awuru ēni ezi anị ẹnị raa sị mẹ̀ ụkọrọ anka ohirẹsụ irehi Ohomorihi. 11Angwẹ ana a sịị nyị ọzaa tụ́ ịnị ụkọrọ Ohomorihi ọnịrị eturare ana a sịị nọ Aha Ọnịnị re hi ịnị ajẹngụ ọnọọ. Avaba ẹnịnị vị ọnị ụ vaa kà a ka ẹ̀ mẹ anka m mẹ̀ kà a wụ.”

Ọda ana za ẹkụhị ụhwọtụ

12Dị Ẹnẹyịmavara kà a yị Imosiisi dị ọ ka: 13“Re ka waa za ido ẹkụhị ọnị mị sị tụ́ ụhwọ. Ẹkụhị ọnọọ vị ọnị ụ vaa sị tamayị ịzẹzẹ ọnị ụ zẹẹ mị nịnị pooro ịrẹma ụhwọọ. Ọ vaa mẹ ka wa yẹ nịnị ka ẹma vị Ẹnẹyịmavara ana sị wụ nịnị mẹ aza amị nị. 14Waa za ido ẹkụhị ụhwọtụ nịnị dị ụ wa yẹ nịnị ka ẹkụhị amịị yọ nị. Ọza ene èe du ẹkụhị ọnọọ ẹngụ vị a vaa wụ̀ ọ nị. Ọza ana àa mẹ̀ ụkọrọ ọnyọọnyị ịhị ọnọọ à wụ̀ ọ. 15#Kụra 20.8-11; 23.12; 34.21; 35.2; Ire 23.3; Ọda 5.12-14Ụ vaa mẹ̀ ụkọrọ ịnị akakana ẹkụhị ịhịnọnyị. Ịhyẹgwịhịmba vị ẹkụhị ụhwọtụ. Ẹnẹyịmavara ọ nyị ẹkụhị ọnọọ nị. Ọza ana àa mẹ̀ ụkọrọ ịnị ẹkụhị ụhwọtụ à wụ̀ ọ. 16Kà a ka Anisirẹrị ẹ̀ẹ za ido ẹkụhị ụhwọtụ ọnọnị. Ẹ̀ẹ mẹ ido anị pooro ịrẹma ụhwọ dị ẹ̀ sịị tamayị ịzẹzẹ ene e pe mị zẹẹ. 17#Kụra 20.11Ẹkụhị ụhwọtụ ọnọnị ọ vaa vị ịsị ẹ vaa mẹ ka ẹmịrị Anisirẹrị ọ̀ọ tamayị ịzẹzẹ ene e pe mi zẹẹ pooro nị. Wáā yẹ ka ẹkụhị ịhịnọnyị ẹmị Ẹnẹyịmavara sị mẹ ẹbẹẹba ọnịrị ẹhẹ nị. Ịhyẹgwịhịmba dị mị tụ̀ ụvọ hụụnị ụkọrọ, dị mị tụ́ ụhwọ nị.” 18Ịjị Ẹnẹyịmavara raà kà avaba ịrẹyị anị yị Imosiisi ịrẹsụ ataba Ịsịnayị, dị ọ sị ịrẹta ẹẹva ẹnẹẹ ọnị ọ sị ụvọ anị chẹrẹ ọda ẹnẹẹ tụ́, dị ọ sị yị Imosiisi nị.

Currently Selected:

Ọyịkụra 31: EBTP

Highlight

Copy