Ọyịkụra 30

Ụta ọyị rị eturare ịra

(Kụra 37.25-28)

1“Rẹ sị ọchị ịchẹkẹnẹ jị ụta ịzị a vaa yàa rị eturare ịra. 2Ụgọdọ ụta ọnọọ ọnịrị ụgana anị vaa vị ẹbẹẹbẹ, dị ahịka ahụ ọnya rị ẹjịjị ẹ vị nị. Dị ụ navọ ọ̀ nẹba tù ahụ ẹẹta. Ọpanyị anị vị ọnị ụ vaa bẹẹ za a. 3Ẹbẹẹba anị ọnịrị avaba akaha anị ne beri ọpanyị anị vị ọnị ụ vaa si igooru obooro kú. Dị ụ rẹ sị igooru kara a ụtọ-ụtọ. 4Dị ụ va sị igooru tụ́ ochirigege ẹẹva dị ụ sị za ụtọ ụta anị eyi ẹyịva. Ochirigege ẹnẹẹ ẹ vaa za ọchị ana a vaa sị sị ụta ọnọọ nị. 5Dị ụ sị ọchị ịchẹkẹnẹ bẹ okutẹ, dị ụ si igooru kú ọ. 6Dị ụ sị ụta ọnọọ dị ụ sị tụ́ ọvịdị ịta ana jị apoti oto hi. Ịzọọ mị vaa vẹ vee tù wu nịnị nị. 7Ẹnẹnẹ-ẹnẹnẹ, Eerọnị ọ̀ọ maanị ee nee tenyi ịra ozotupa ọnọọ, â nyị eturare ana vọrọ ka ọ̀ rị ịra ịrẹsụ ụta ọnọọ. 8Òo ree nee hu ịraa tụ́ ịnị ozotupa oruva-oruva, a rẹ nyị ka ọ̀ rị eturare ịra. Avọọ a mẹ̀ vaa mẹ̀ ẹ pooro ọvịdị ẹmị Ẹnẹyịmavara nị. 9Asị ụ na rị eturare irenyi ịra ịrẹsụ ụta ọnọnị. Asị ụ rẹ na sị ịsa ọsa àa vị akụ avọọ dị wa va rị ọ ịra ịrẹsụ anị. Eche ana àa sị mẹ̀ ịsọvọ ka è hú ọ, asị na ká a tụ́ ịnị anị. 10Ụpẹ ọnya kẹnẹ ịnị ịrayị Eerọnị vaa gụ̀ ọpanyị ụta ọnọọ nị. Anya ịsụpa ana a sị mẹ̀ ịsọvọ ka à zụ vagu aza ini ịvị ẹnịnị ọ vaa sị gụ̀ ọ nị. Avọọ ọ mẹ̀ vaa mẹẹ pooro nị. Ẹmị Ẹnẹyịmavara ọ vaa nyị avaba ụta ọnọọ nị.”

Ẹkẹhị ọyị tụ́ yị Ajẹngụ Ohomorihi

11Dị Ẹnẹyịmavara rẹ kà a yi Imosiisi dị ọ ka: 12“Ịhị wàa za Anisirẹrị ịrịka, ọza ịnya ọza ịnya ọnị ụ wàa za ịrịka vee sú ụta yị ẹmị Ẹnẹyịmavara. Ụta ọnọọ vị ẹnẹ ẹ̀ vaa sị hị́ ẹngụ ẹnịnị. Ẹ̀ vavọọ mẹ agụvị asị a na nyị ịrẹyị odivi ene tù wa àa vavọọ za wa ịrịka. 13#Kụra 38.25,26; Imt 17.24Ọza tụra ọza ana àa za ịrịka vee si ọpa ụta ana a ka è si. Ịsa ana a dọ ka à sịị ngọ ẹkẹhị a vaa sị ngọ ẹkẹhị ọzọza di è re ka ộ gụ nị. Ọzọza ò si ụta ọnọọ agụvị ka ẹmị Ẹnẹyịmavara aa sịị yị nị. 14Avaba aza ana sị gụ ịrayị oohu dà a vaa hịrẹ a vaa za ịrịka nị. Ẹnị ẹnẹẹ ẹ vavọọ vaa sị ẹkẹhịị vaa yị mị nị. 15Opisa nịnị e yi vee si huna ọpa ana a ka è sị, onosiye nịnị ẹnị e yi re vee sii weyii huna ọpa ana a ka è sị. Wàa vavọọ aa sị ẹkẹhị vaa yị ẹmị Ẹnẹyịmavara kà wa sị hị́ ẹngụ awụ nịnị varẹma, ẹbẹẹbẹ u vee si ụta nịnị nị. 16Dị ụ dọ ẹkẹhị ọnọọ ẹnị ẹ sị va hị́ ẹngụ ẹnịnị varẹma dị aa sịị mẹ̀ ụkọrọ ịnị ajẹngụ ịzị aā gẹ. Ẹkẹhị ọnọọ vi ene si si ụta ẹngụ ẹnịnị. Ọ vaa mẹ ka ma tamayị di mee sere wa.”

Ẹnya enyusẹ ịkọpaa ọbanyị

(Kụra 38.8)

17Dị Ẹnẹyịmavara rẹ kà a yi Imosiisi dị ọ ka: 18#Kụra 38.8“Sị enyusẹ ana aā hị́ ịkọpa dị ụ wa sị mẹ̀ ẹnya ọnya ana a vaa sị nyịna ụvọ. Dị ụ rẹ sị ịkọpa mẹ ohyẹtẹ anị ana a vaa sị ọnọọ tụra. Dị ụ sị ọ tụ́ ịnị akakana ajẹngụ ịzị aā gẹ ọnịrị ụ́ta ọnọọ. 19Di Eerọnị ọnịrị ezi anị ẹ̀ẹ ká enyi hụụnị anị dị ẹ̀ sịị nyịna ụvọ ọnịrị ahụ ẹnịnị. 20Ụmẹ tụra ụmẹ ẹnị ẹ yaa ngụ ịnị ajẹngụ ịzị aā gẹ, ẹ̀ vavọọ nyịna ẹngụ ẹnịnị ka à yị vị avọọ e ve sú. Ẹ̀ẹ rẹ yaa nọ ịnị ụta ka ẹnị ẹ̀ na sị ịsọyịrị mẹ ịsọvọọ mị, 21â nyị ka ẹ̀ nyịna ụvọ ọnịrị ahụ ẹnịnị agụvị ka e ve su. Eerọnị ọnịrị ezi anị vaa sị eyii pe ido ọnọnị pooro zịna-zịna.”

Angwẹ anaā sịị nyị ọzaa tụ́ irenyi yị ụkọrọ

(Kụra 37.29)

22 # Kụra 37.29 Dị Ẹnẹyịmavara rẹ kà a yị Imosiisi ka: 23“Ọ sị eturare ohuru-ohuru, dị a sị angwẹ ịmaya ikirogirami ịhịnọnyị, ikinamọnị ana nyi agụ ozoza ikirogirami ẹẹta, Ikane ana nyị agụ ozoza ikirogirami ẹẹta. 24Dị ụ rẹ va sị ọsa ana aā hị́ ịchẹkẹnẹ ẹhụ ikirogirami ịhịnọnyị avọọ. Sị angwẹ orivi irita ẹẹna, dị ụ vavọọ hura wa vabẹ. 25Dị ụ pō wa vabẹ anka eturare, dị ụ wa sị mẹ̀ angwẹ ana a vaa sị nyị ọnụkọrọ amị. 26Waā ká a di weē che e sẹ ajẹngụ ịzị aā gẹ ọnịrị apoti oto 27ne beri itevuru ọnịrị avaba ịsị e hi ịnị anị. Rẹ vavọọ che e sẹ ịzị aā sị ozotupaa tụ́ ọnịrị avaba ẹnya ene hi ịnị anị ọnịrị ụta ịzị yàa rị eturare ịra. 28Avọọ u mè re vee che e sẹ ụta ịzị a yàa rị ịsọvọ ana a mẹ ịra ọnịrị avaba ẹnya ene hi ịnị anị ne beri ịchacha ana a sịị nyịna ụvọ ọnịrị ahụ ọnịrị ịzị a sị ọ tụra. 29Vavọọ kụ́ ẹnya ọnọọ tụ́ irenyi dị à yẹ ka aamị ẹ vị saka-saka nị. Ịsa tụra ịsa ana àa kanyị ọ, ẹma kụkụ nyị ịsa ọnọọ nị. 30Sị angwẹ nyị Eerọnị ọnịrị ezi anị dị ụ wa sị wa mị dị ẹ̀ vị ohirẹsụ irehi amị dị ẹ̀ẹ mẹ ụkọrọọ mị. 31Kà ẹ yị Anisirẹrị nịnị ka angwẹ ana a sịị nyị ọzaa tụ́ ịnị ụkọrọ amị ọ vị ọnọọ nị. Ọnị a vavọọ vaa sị nyị ọza pooro nị. 32Asị ụ na ká a kú ọza ẹngụ kẹnẹ, asị ụ rẹ vavọọ na tọ̀ọ́ ẹnya ọnọọ dụ wa vavọọ sị mẹ angwẹ kẹnẹ. Angwẹ amị ọ vị nị, eyi ọnọọ a vọrọ ka we sii re e nị. 33Ọza ana àa vavọọ na mẹ ẹngụ angwẹ ọnọọ, à vị ka dị ọ̀ na ká a kú ọza ẹnẹ ẹ̀ yị vị ohirẹsụ irehi amị, ọza ọnọọ ọ̀ yẹ ka ẹ yị kụkụ vị ịnị aza amị ọnị yà.”

Eturare ana nyị agụ ozoza

34Dị Ẹnẹyịmavara rẹ kà a yị Imosiisi dị ọ ka, “Na tọ̀ọ́ ẹngụ eturare ọnị maa vaa hị́ aanị vabẹ. Ẹbẹẹbẹ ụ vaa sị ọzọza nị. Eturare ẹnẹẹ yị: inataka, Isehereti, Iherebeni ọnịrị irevinahi ene zoza. 35Di ụ pō wa vabẹ dị ụ wa sị mẹ eturare ene zoza ẹtẹẹtẹrẹ. Sị yị ọza ana a yara mẹ eturare dị ọ̀ mẹ̀ ẹ. Sị anọ tụ́ ọ, ama asị ụ kụ́ ịsa ọsa vahura a. Dị àa sịị mẹ̀ ụkọrọ amị. 36Sị ịnị anị dị ụ wa sị mẹ atiti dị ụ wa sị tụ́ ọvịdị apoti ịrẹyị ana kà tịtẹ ana yà ịnị ajẹngụ ịzị aā gẹ. Mị vavẹ vee tù wu nịnị ịzọọ. Â nyị ka wa yẹ nịnị ka ẹma nyị eturare ọnọọ nị. 37Wẹ yị nyayịnẹ vavọọ na tọ̀ọ́ ẹnya dị wa vavọọ sị mẹ eturare yị ẹngụ nịnị. Yẹ nịnị ka ẹmị Ẹnẹyịmavara ọ nyị nị. 38Ọza ana àa na mẹ ẹngụ eturare ọnọọ yị ẹngụ anị ka ọnị ọ̀ọ sịị tụ́ ẹngụ, ọza ọnọọ ọ̀ yẹ ka ọnị ọ yị kụkụ yà ịnị aza amị.”

Currently Selected:

Ọyịkụra 30: EBTP

Highlight

Copy