Emọsị 6

Aa vaa sị ụya rị Isirẹrị

1Oogwoo Anijerusarẹmị ọnịrị Anịsamarịya nịnị ẹnị e ro ka ẹnị ẹ si ha dị ẹ va ẹngụ ha. Ọdọvịdị ẹkụra ẹnẹnị vị ene ro ka eni e huuna ẹkụra ana vọ agụvị avọọ di ọzọza ọ va ụpa anị nee kú. 2Ẹnẹyịmavara kà ẹnịnị e ne re ịsẹ tu ẹkụra ọzọza ịnị ẹtẹ Ikarine, ọnịrị Ihamati ẹkụra ọbanyị ne beri Anigati ịnị ẹtẹ Ihwirisiti. Ẹnịnị wáá nyị ụkata hụụnị Anẹkụra ẹnẹẹ nị? 3Ayịchama ẹnịnị ẹ yị zẹ ka e tamayị ẹkụhị ọnị Ẹnẹyịmavara vaa sị sị ụya rị wa. 4Aza ẹbanyị ẹnịnị vị ana mẹ ẹhẹ, dị ẹ hụụtụ hị́ ịrẹsụ ịvẹẹdị ana sị anyị ọdọba mẹ̀ ochị anị. Ẹnịnị vị ana a rị uye atẹmẹ ọnịrị uye ẹvụ ne beri uye imaaru. 5Dị ẹ yaa hama Idevidi jị ahẹ irenyi-irenyi nị. Dị ẹnị re mẹ̀ isohu ẹnịnị anka Idevidi nị. 6Ẹnịnị vị ene hu eche ahaahara, dị ẹ va eturare ọkatarihi hị́ ẹngụ. Ama ịrẹyị ẹkụra ene vú ẹtẹ ẹ yị jị wa areyi. 7Avọọ ẹnịnị aa vịdị vaa za ọrịhị nọ ẹkụra ọsa dị ẹngwọọmẹ ẹnịnị za ẹtẹ tụ ịzọọ nị. 8Evere Ijekọvụ ẹnẹẹ e re du Ẹnẹyịmavara ayị. E re ẹngụ ẹnịnị huu ịsa ọsa, avọọ Ẹnẹyịmavara nyị ịhyẹrẹ ịsa ene ro ka ẹ vị ụkata ẹnịnị nị. Ẹnẹyịmavara Ohomorihi ọga isoja ọ raa hị́ eku ka ọnị vaa hụrẹ ẹnịnị ogu ẹnịnị ụvọ yị ọnịvị ẹnịnị. 9Ọ daka vị aza ẹnị ẹẹwụ ẹ tẹ tụ ịnị irehi nị, avaba ẹnịnị vị ene e su. 10A vaa nyị anda ana vẹ ka ọnị ọ vaa rị oku ẹnẹẹ ịra kwooze, ịjị ọ raa kụ́ wa hi ẹhẹ, di o họ̀ use ọza ana vọ ịnị irehi ọnọọ ka, oku ọ́ọ́ vọ? Dị ọ tụ́ ọ ohi ka heyiye. Dị ọ ka pe kẹ, asị a nyị ọza ana ha irenu ta Ẹnẹyịmavara ubo. 11Ịjị Ẹnẹyịmavara ọ́ mẹ ọda, di aa chaka irehi ọbanyị hi oweyi za ẹtẹ rugurugu. 12Umaata ọ yị ma tụ́ ahụ ịrẹsụ ịda, dị ọza ọ yị ma jị ịrụkụ tụ́ ịnị oku nị. Ama ẹnịnị ẹ raa vara ịzẹyịza ẹchịpa ọnyịrẹyị. 13Ẹnịnị e wo oto ka ẹnị ẹ nyị ụkata, dị ẹnị raa rị ẹkụra Iro-Idebari ọnịrị Ikaranịyimi nị. 14Ẹnẹyịmavara Ohomorihi ochetẹẹngụ ka ọnị vaa kụ ịrẹkụ tu Anisirẹrị nịnị. Ọnịvị ẹnịnị va dọ wa ẹtẹ hụrẹ Irebo-Ihama ana ya eyi ẹbẹẹba huu na ngụ ịnị apasị Araba eyi ụvẹtẹ ọnịrị avaba ẹtẹ ene hi ịnị akakana.

Currently Selected:

Emọsị 6: EBTP

Highlight

Copy

Compare