Emọsị 7

Etore Akụvarịva

1Ẹnẹyịmavara Ohomorihi ọ sị zụ Emọsị ka ọnị aa tụ́ akụvarịva ka e du ịsa nịnị aarẹ aza anị ha. Akụvarịva ẹnẹẹ vi ana vaa vẹ ịnị ụmẹ ịsa ọyịna ụpọhụva ịrẹma ịsa ọyịna ịpaapa anaa kụ́ na yị ohinọyị 2Ịjị akụvarịva raa rị avaba avị za ọchị avaba aha, dị Emọsị da ịpẹ yị Ẹnẹyịmavara kà ọ vagu Anisirẹrị nị. Dị ọ ka asị ọ vu wa ẹtẹ ka ẹnịnị ẹ yị nyọya. 3Dị Ẹnẹyịmavara kà ẹ yị vavọọ vaa ya. Dị ọ va ahụ vẹ ịrẹma nị.

Etore Ịra

4Ẹnẹyịmavara Ochẹtẹẹngụ ọ rẹ sị etore ọsa zụ Emọsị. O ka ọnị aa sị ịra ọbanyị sị ụya rị aza anị. Ịra ọnọọ vaa wara oku, dị ọ rị avaba ẹtẹ ọnọọ ịra hụyẹ-hụyẹ 5Dị Emosi dá ịpẹ yị Ẹnẹyịmavara ọga isoja ka ọ navọ asị ọ vavọọ mẹ dee. E yị va ahụ vẹ ịrẹma, ẹnaa ha ịnị ẹnị ẹnẹ nyọya aanị. 6Dị Ẹnẹyịmavara va hụ ịnị ịsa ọnị ọ ka ọnị a mẹ wa nị, dị ọ ka ooho nị.

Etore Ịsa ọvọrọ Ịsa

7Ịrẹma ọnọọ Ẹnẹyịmavara sị etore ọsa rẹ zụ Emọsị nị. Emọsị ô re ka Ananyị yi ọ jẹẹ ịrẹsụ ọvọ obo ọnị a sị mọ ugene re ya ịnị ụvọ anị. Dị ô sị mọ ọvọ ọnọọ re nị 8Dị Ẹnẹyịmavara họ̀ Emọsị use ka ịsị o re nị. Dị ọ tụ Ẹnẹyịmavara ohi ka ịngọ yọọ nị. Dị Ẹnẹyịmavara kà avọọ ọnị mẹ va zama ebira ọzọza re nị. Oni ẹ yị kụkụ vaa sị eyi kwooze hụụnị ebira odivi ẹnịnị. 9Ẹnẹyịmavara kà ọnị vee du avaba aha ori ẹnịnị hi ịrẹsụ ataba ọnịrị irehi anị vaaha. Avọọ ọnị mẹ rẹ vaa sị ịrẹkụ vu ovwoovu Ijerobowami ana vi ohinọyị Anisirẹrị ẹtẹ nị.

Emọsị ọnịrị Amazaya

10Â nyị ohirẹsụ irehi Ohomorihi ọnya aanị ana ya Ịbẹtẹrị ọnị ịrẹha anị rị Amaziya. Dị ọ na ka yi Ijerobowami ohinọyị ka Emọsị aa ka ịrẹyị ana vaa kụ́ ẹngụkata tu ọ. Ọ kà Emọsị ee si ka ọnị ọ kụ ohinọyị ọnịrị Anisirẹrị ịrẹsụ nya ẹngụ nị. 11Dị ọ ka Emọsị aa ka a ka a vaa wù Ijerobowami ana vị ohinọyị, di aa za aza anị ọrịhị nọ ịnị ẹtẹ Anikinami. 12Dị Amaziya ka, Emọsị ọ sị etore anị nọ ẹtẹ Ijuda dị ọ sịị rị ịsa ịzọọ. 13Dị ọ ka asị Emọsị vana ka ẹtẹ ọnị oo re ịnị ẹkụra Ịbẹtẹrị. Ịbẹtẹrị ọ vị ohyẹtẹ irehi Ohomorihi Anisirẹrị nịnị nị. Ịzọọ Ijerobowami ya nị. 14Dị Emọsị tụ́ ohi ka, ọnị ẹ yị vị ọnụtụ Ẹnẹyịmavara, dị ọnị ọ rẹ hụrẹ ịpa ọnọọ vẹ nị. Dị ọ ka, ọnị vị ọgẹrẹva ana pa ịsụpa. 15Ẹnẹyịmavara ộ sị ọnị hụrẹ ịrẹma atẹmẹ ọnịrị ẹvụ anị, dị ọ tụ́ ọnị hi Anisirẹrị nịnị nị. 16Amaziya mẹmẹ vaa ya ịzẹnị ka asị ọnị ka ụtụ ọnị aa tụ́ ọnị hị́ Anisirẹrị. 17Dị Emọsị ka ẹnịnị wụ́ ịsị Ẹnẹyịmavara kà booro aanị, Ẹnẹyịmavara kà ịrẹkụ aa vaa rị ezi anọrụ ọnịrị anẹẹ ẹnịnị. A vaa za wa ọrịhị nọ ẹkụra anikinami. Ịzọọ anọrụ ẹnịnị vee su hi nị. Dị ose ẹnịnị vara ọsẹrẹka hi ịnị ẹkụra. Dị anẹkụra ọsa vaa dọ ẹtẹ ẹnịnị dị ẹ ga hi ẹngụ ụvọ.

Currently Selected:

Emọsị 7: EBTP

Highlight

Copy

Compare