Emọsị 5

Ohomorihi ô hị́ Anisirẹrị ka e ro ịnẹ.

1Ẹnẹyịmavara, ô hị́ Anisirẹrị, dị ọ ka e batọ ahẹ ọnị ọnị aa sị zị ẹngụ yi wa. 2Isirẹrị sị mẹ anka ozwoorihi ana hyẹdụ, dị ẹ yị vana zụ kwẹẹtẹ avọọ nị. Dị aa hụrẹ ẹ ụvọ tụ ịzị ọ ya nị. Ẹ yị nyị ọza ana sị ọ kwẹẹtẹ 3Ẹnẹyịmavara ana vị Ohomorihi ka, Anisirẹrị ẹ tụ aza ẹnị akahị jịnẹ nọ ịrẹkụ, aza ẹnị ẹchẹhị kẹnẹ aa vọ vaa vẹ eehi nị. Ẹ tụ́ aza ẹnị ẹchẹhị jịnẹ, aza ẹẹwụ aa vọ vaa vẹ eehi nị. 4Ẹnẹyịmavara kà Anisirẹrị ẹ va ka ọnị vẹ dị ẹ zụ yara. 5Ọ kà asị ẹ nọ Ịbẹẹsẹba na mẹ ahẹkẹ. Asị e ne si ọnị Ịbẹtẹrị. Ịbẹtẹrị vị ene vee vu ẹtẹ. Asị ẹ nọ Igirigari agụvị ka aza ene hi Igirigari vị ana vaa za ọrịhị na ẹkụra ọsa. 6Ẹnẹyịmavara kà Isirẹrị ẹ varẹma ka ọnị vẹ. Agụvị avọọ ọnị vee hị́ wa hụrẹ ẹtẹ anka ịra mẹ rị ịsa avọọ nị. Ịbẹtẹrị ẹ yị vee re ọza ana vọrọ ka ọ dọ ọ tụ 7Ẹnịnị ẹ ree jesi ịzẹyịza, dị ẹ yaa mẹ̀ ẹvaya yị ọnịzẹyịza nịnị, dị ẹ kụ́ ọ ka wa ụhwẹ nị. 8#Ijov 9.9; 38.31Ẹnẹyịmavara ọnị ọ mẹ̀ ụzọmị nịnị nị. Ọnị ọ mẹ oserụhwẹ ọnịrị ụhwaazị nị, ọnị ọọ̄ vara etohozi eyọnị, dị ẹtohweyi vara ịrahụ nị. Ọnị o tụra enyi hụụnị oku vaa hịrẹ, dị ọ zwọ ọ orihi chi vẹ hi ẹtẹ nị. 9Ẹnẹyịmavara ọ nyị ụkata ana ahịka vee kẹnẹ dị ọ wụ̀ avaba ọnụkata va ha, dị ọ jị aha ụkata ẹnịnị eburu 10Anisirẹrị nịnị vi ana nyị ịhyẹrẹ aza ana sị ịzẹyịza mẹ̀ ọkarẹyị, dị ê sị ẹyị wụ̀ aza ana ka ịzẹyịza. 11Ẹnịnị vị anaa sị ụvọ hi onosiye za ẹtẹ, dị ẹ yaa ba wa uchuvọta dọ ẹkẹhị irehi, dị ẹ ne ẹkẹhị irehi na hịrẹ. Agụvị avọọ ẹnịnị ẹ yị vaa ra ịnị irehi ẹnị ẹ da. Ẹnịnị ẹ yị rẹ vị hú eche hụụnị ụbazị ịvayịnị ẹnị ẹ kụ́ ụrụkụ anị. 12Ẹnẹyịmavara kà ọnị ọ yẹ ebira odivi ọdẹngụ ọnị ẹ yaa mẹ̀. Ẹ yaa mẹ̀ ọnịzẹyịza rị, dị ẹ yaa dọ ochirerenu, dị ẹ yaa mẹ̀ ọkarẹyị irikiti yị onosiye nịnị nị. 13Aza ana yẹ ịrẹyị vị ana sị irenu ẹnịnị za agụvị ka ụmẹ odivi yọ nị. 14Ẹnẹyịmavara kà ẹnịnị ée si ka ẹnị ẹ ra, ẹ na za avọ hi ịnị ebira odivi di ẹ nyima ẹẹ mẹ̀ ebira ọyịza. Ẹnẹyịmavara, Ohomorihi Ochẹtẹẹngụ vaa jẹẹ pe wa anka ẹnịnị mẹ ka a. 15Ọ kà ẹnịnị ẹ nyị ịhyẹrẹ odivi, dị ẹ sì ịrẹyị ebira ọyịza dị ẹ mẹ ịzẹyịza ịnị ikootu ẹnịnị. Ẹnẹ yẹ ẹyịyara Ẹnẹyịmavara vaa vagu aza anaa vọ ẹtẹ. 16Ananyị yi Ẹnẹyịmavara ọ ka yị wa, ẹ vaa wụ́ owu ọnịrị ùnè ịnị avaba ụpatẹsị ọnịrị inorere ẹnịnị. Avaba ọgẹrẹva ẹnịnị ẹ sụ ùnè, dị ẹ dọ aza ene beri wa jị òrèrè 17Ẹ vaa wụ́ owu ịnị avaba ụbazị ịvayịnị ẹnịnị, agụvị ka Ẹnẹyịmavara ká ọnị vaa che ụbazị parahu dị ọnị o du ịsa ene hi ịnị anị va ha. 18Oogwoo ẹwụ nịnị ana va ụva ka ịhị Ẹnẹyịmavara aa va si zụ̀ ka ọnị ọhụna avaba Anẹhẹ nị. Sị u sị o hí ka ẹkụhị Ẹnẹyịmavara ọnọọ ọ vị nịnị? Wáá yẹ ka ẹkụhị ọnọọ vị ẹkụhị ayodu. A yi vi ẹkụhị ịrajẹ ọ vị. 19Ịhị ọnọọ vaa sị mẹẹ anka ọza òo zwe yi idu na gẹrẹ ọdụmị avọọ nị. Ô zwe na tẹ̀ ịnị eehi, dị ọ sị ụvọ tụra ugene, dị ẹ́wụ́ jị ọ ịrẹrụ nị. 20Ịzẹyịza, ẹkụhị Ẹnẹyịmavara ọnọọ vaa nyị ẹngụ anị. A yi nyị ọza ana vaa ha ịnị ẹnịnị. 21#Ayị 1.11-14Ẹnẹyịmavara kà eche ahẹkẹ ẹnịnị vi ana nyị ọnị ịhyẹrẹ. Ẹyị nyị ịsị ọnị a sị mẹ̀. 22Ọ kà ọnị ẹ yị vaa dọ ịsọvọ ọnị ẹ yaa mẹ̀ ọnị ẹ yị va kana eyi si ịsọvọ ẹngwọọrọ ẹnịnị 23Ọ kà a sị ahẹ ụya ẹnịnị kana kwooze ka ịrẹka kẹnẹ-kẹnẹ ọ vị ịnị ụtọ anị. Ọnị ẹ yị vee batọ aahẹ ẹnịnị, ọkangga ẹnịnị ọ daka hine huu ịsọnyịsọnyị. 24Ama dị Ẹnẹyịmavara kà ẹ̀ navọ aa sị ịzẹyịzaa mẹ̀ ọkarẹyị avaba aha. 25#Ụkọ 7.42,43Ẹnẹyịmavara kà ịrayị ẹbẹẹva ọnị Anisirẹrị mẹ ịnị ụnọmị ẹ yị nyị ịsọvọ ẹnyẹnyị ẹnẹ mẹ yị ọnị 26Ama Anisirẹrị nịnị vaa sị ori ẹyịva ọnị ẹ mẹ̀. Ọnya ịnị ẹnịnị Isakuti, ọnị ẹ yaa hị́ ohinọyị ẹnịnị. Dị ẹ rẹ hi ụta yị ori ọsa oni ẹ mẹ̀ vene ụzọmị ẹbẹẹba ana aā hị́ Ịkayịwanị nị; 27avọọ Ẹnẹyịmavara ana vị Ohomorihi ọga isoja vaa navọ ka aa za wa ọrịhị na aha ana para Ịdamasịkọsị huu.

Currently Selected:

Emọsị 5: EBTP

Highlight

Copy

Compare