Odeyi 8

Ịsọọrụ ộ sị ụya rị Anịragụ Ohomorihi

1Ịsọọrụ yà ịzọọ, ộ sị ụvọ tụ́ ọọ ka à wụ Isitivini. Ịhị ọnọọ gẹdẹ-gẹdẹ, ê nyima aa sị ụyaa rị anịragụ Ohomorihi ene hi Ijerusarẹmị ẹtẹẹtẹrẹ. Avaba ọdọwụ nịnị vị ana gara hi avaba ẹkụra Ijudiya ọnịrị Ịsamarịya. Apositeri nịnị kẹnẹ ẹ vọ tụ́ Ijerusarẹmị nị. 2Dị aza ẹnyị ene sì ịrẹyị Ohomorihi va sị oku Isitivini, di e ne ne e nị, di e jị òrèrè anị ẹtẹẹtẹrẹ nị. 3#Ụkọ 22.4,5; 26.9-11Dị Ịsọọrụ oni ee sì ka oni ò vú ịragụ Ohomorihi ẹtẹ nị. Dị aa ngụ irehi-irehii zị, ịzị ọ̀ọ yà re ọdọwụ nịnị, àa vị ọnọrụ, àa vị ọnẹẹ, dị ọ za wa, dị ọ kụ́ wa ne hi ịnị ẹngwa.

Ihwiripi ọ na kà enube ọyịza Ísamariya

4Ọdọwụ nịnị ana gara hi, ệ nọ avaba aha, dị ẹyaa kà enube ọyịza nị. 5Ihwiripi ô chí nọ ẹkụra ọbanyị Ịsamarịya, dị ọ na kà enube ọyịza Ikirisiti yị anịzọọ nị. 6Dị aza ana wara gụ sị ayị ọnya sị ụtọ pe ịrẹyị oni Ihwiripi aa kà nị, di e re re ụkọrọ ohyozirenu ana aa mẹ nị. 7Ụhwẹ echu ê nowu zẹtẹ, dị ẹyaa jịnẹẹ hụụnị ẹngụ aza ọrụrụ-ọrụrụ nị. Ihwiripi ọ rẹ mẹ aza ọrụrụ-ọrụrụ ene sú ẹngụ, dị ẹnyị sú ahụ ụkụ ẹnịnị. 8Dị Anịsamarịya nịnị aa jẹ ẹtẹẹtẹrẹ nị.

9Ịnị ẹkụra ọnọọ â nyị ọnọrụ ọnya aanị, ana aā hị́ Ịsayịmọnị. Ọnịvọpa ọ vị nị. Aa mẹ̀ ụkọrọ ịvọpa ene hí Anịsamarịya nịnị irenu. Dị ọnị rẹ ka ọza ọkụmị-ọkụmị ọ́nị vị nị. 10Avaba anẹkụra ọnọọ saka-saka vị ana sị ụtọ pe e. Ẹ ka ọnị ọ vị Ụkata Ohomorihi ọnọọ ana aā hị́ “Ụkata Ọbanyị” nị. 11Ệ saasa a, agụvị ka o si kù ọnọọ hụrẹ aa sị ẹbẹẹ mẹ̀ ịsa ene hí wa irenu. 12Ama Íhwiripi ọnị mẹ̀ va kà enube ọyịza ịjọva Ohomorihi ọnịrị ịrẹha Ijeesu Ikirisiti yị wa, dị ẹnịnị dọ wụ́, â mẹ̀ ọyịhwọzenyi yị wa, anọrụ ọnịrị anẹẹ ẹnịnị. 13Ịsayịmọnị ọnị ọ rẹ dọ wụ́ bẹẹ. Ịjị a sị ọyịhwenyi mẹ yọ, dị ọ sị ẹngụ vaka Ihwiripi nị. O mè re ụkọrọ apọtẹrẹwa ọnịrị ohyozirenu ẹbanyị-ẹbanyị ana aa mẹ, ô hí oo irenu.

14Apositeri nịnị ene hi Ijerusarẹmị ệ wụ́ ka Anịsamarịya nịnị ẹ sị ịrẹyị Ohomorihi dọ, dị ẹ tụ́ Ipita ọnịrị Ịjọọnụ nọ ịdị ẹnịnị nị. 15Ịjị e tù ịzọọ, dị ẹ mẹ̀ aduwa yị wa, ka ẹ̀ dọ Ụhwẹ Ọnịnị nị. 16Ụmẹ ọnọọ, aà yị nyị ọdọwụ ẹnẹẹ ọnị Ụhwẹ Ọnịnị ká vẹ. Ọyịhwenyi ẹdọwụ kẹnẹ a mẹ yị wa ịnị ịrẹha Ijeesu Ananyị yị nị. 17Dị Ipita ọnịrị Ịjọọnụ sị ụvọ tụra wa, dị ẹ dọ Ụhwẹ Ọnịnị nị.

18Ịsayịmọnị ô re ka aza ẹnẹẹ ệ dọ Ụhwẹ Ọnịnị, ápositeri nịnị mẹ̀ sị ụvọ tụra wa. Dị ọ sị ẹkẹhị yị Ipita ọnịrị Ịjọọnụ 19dị ọ ka, “Ẹwụ nịnị ọ̀ rẹ sị ụkata ọnọnị yị ẹmị, dị ọza ọnị màa sị ụvọ tụra kẹnẹ, ọ̀ zụ dọ Ụhwẹ Ọnịnị!” 20Dị Ipita tụ́ ọọ ohi, dị ọ ka, “Ẹwụrị ẹkẹhị awụ ò vu ẹtẹ, agụvị ka wê ro o ka a nyẹngụ sị ẹkẹhị hị́ ẹyịza Ohomorihi. 21Wẹ yị nyị ụvọ tụ́ ịnị ụkọrọ ayị ọnọnị, agụvị ka wẹ yị nyị ayị ọnya ini eyi Ohomorihi. 22Ro ịnẹ varẹma hụụnị ariro odivi awụ ọnọnị, dụ wa mẹ̀ aduwa hi Ohomorihi ka ọ̀ọ zụ vagu wu ịnị ịrẹyị oni u ro aanị! 23Mâ yẹ ka ụhị ọyịkụ ọ sị ngụ ịnị ayị awụ ẹtẹẹtẹrẹ, ịvị ọ sị wụ sụ́ orupa.” 24Di Ịsayịmọnị kà a yị Ipita ọnịrị Ịjọọnụ dị ọ ka, “Aarịhịnị, mẹ̀ aduwa hi Ananyị yị yị mị, agụvị asị a nyị ene tù mi ịnị avaba ịsị ụ kà aanị!”

25Ịjị Ipita ọnịrị Ịjọọnụ sị ịrẹyị Ananyị yị kà ịzọọ, dị ẹ varẹma aa nọ Ijerusarẹmị nị. Ẹ màa na óze, dị ẹyaa kà enube ọyịza ịnị ẹkụra eweyi-eweyi ene hi Ịsamarịya nị.

Ihwiripi ọnịrị Anetiyopiya ọnya

26Anggẹẹrị Ohomorihi o ve tù Ihwiripi, dị ọ kà a yọ ka, “Kwẹẹtẹ, dị ụ wa nọ eyi ụvẹtẹ na zị oze ene chí hụrẹ Ijerusarẹmị na ngụ Igaza!” Ịnị ụnọmị ịzọọ vị nị. 27Dị Ihwiripi kwẹẹtẹ, dị aa na nị. Â nyị ọnọrụ Anetiyopiya ọnya aanị, osuretu ọ vị nị. Ọnị ọ vị ọga ana sị eyi pe ẹkẹhị Ohinọyị ọnẹẹ Anetiyopiya nị. Aā hị́ ọnẹẹ ohinọyị ọnọọ Ikandase. Ọnọrụ ọnọọ vị ana nọ Ijerusarẹmị na hẹkẹ Ohomorihi, 28dị ọ varẹma aa nọ eehi nị. Ọ mẹ̀ yaayịtẹ ịnị ịkẹkẹ aanị aa na, dị aa kà iwe Ayịsaya ana vị ọnịsẹ nị.

29Dị Ụhwẹ Ọnịnị kà a yị Ihwiripi ka ò tere pe ịkẹkẹ ọnọọ, dị ọnị rị ọọ ẹ̀ẹ na nị. 30Dị Ihwiripi zwe ne tù ọ nị, dị ọ wú ka aa kà iwe Ayịsaya ọnịsẹ nị. Dị Ihwiripi họ̀ ọ use ka, “Wáá yẹ ịsị ụ waa kà aanị?” 31Dị ọnọrụ ọnọọ ka, “M mẹmẹ zụ yẹ, ẹ̀ yị vị a sị iruvo anị zụ̀ mị.” Dị ọ ka Ihwiripi ọ̀ hịrẹ, dị ọnị rị ọ è dudu yaayịtẹ ịnị ịkẹkẹ ọnọọ nị. 32#Ayị 53.7,8Ịzị ọnọrụ ọnọọ aa kà ini Iwe Ohomorihi yị: “Vị ọ yà anka atẹmẹ ana a sị aa naa wụ avọọ nị. Vị ọ sị mẹẹ anka ozi atẹmẹ ene è yi mē nowu, àa yẹrẹ ẹyị anị avọọ nị, o yi tụ́ ohi ịrẹyị vụrụ-vụrụ. 33Â sị ụya rị ọọ, ọza ọ yị sị ịzẹyịza mẹ̀ ọkarẹyị anị. Ọza ọ yị zụ kà ịrẹyị anụmẹ anị, agụvị ka a sị ọọ dọ ụhwẹ hụụnị ẹhẹ.”

34Di osuretu ọnọọ kà a yị Ihwiripi dị ọ ka, “Kà a mị dị a re, ẹnẹ ọnịsẹ ọnọọ aa kà ịrẹyị anị? Ẹngụ anị wáá yọ, à vị ọza ẹnẹsa?” 35Dị Ihwiripi nyima aa kà ịrẹyị, dị ọ sị ịrẹyị anị hụrẹ ịzị ọnọrụ ọnọọ aa kà gẹdẹ-gẹdẹ ini Iwe Ohomorihi, dị ọ kà enube ọyịza Ijeesu yọ nị.

36Ẹ màa na óze, e ve tù aha ọnya aanị, ịzị enyi yà. Di osuretu ọnọọ ka, “Enyi yọ, sị a vọrọ ka ọ̀ za mị ka asị a mẹ̀ ọyịhwọzenyi mị?” 37[Dị Ihwiripi ka, “Wàa sị avaba ayị awụ dọ wụ́, a zụ mẹ̀ ọyịhwọzenyi wụ.” Dị ọnọrụ ọnọọ ka, “Mâ dọ wụ́ ka Ijeesu Ikirisiti ọ vị Ozi Ohomorihi nị.”] 38Di osuretu ọnọọ ka ịkẹkẹ ọ̀ọ jẹẹ nị. Dị ẹnị ẹyịva chí ngụ ịnịnẹ enyi, Ihwiripi ọnịrị osuretu ọnọọ; di Ihwiripi mẹ̀ ọyịhwọzenyi yọ nị. 39Ịjị ẹ sị jịnẹ hụụnị enyi vẹ, dị Ụhwẹ Ọnịnị sị Ihwiripi kwooze nị. Osuretu ọnọọ o yi kuku re e, ama dị aa jẹ ịrajẹẹ na nị. 40Di e vene re Ihwiripi ẹkụra ana aā hị́ Azotu nị. Ọ́ màa parahu, dị aa kà enube ọyịzaa yị aza ịnị avaba ẹkụra ẹnẹẹ pooro dị ọ va ngụ ẹkụra Isesariya nị.

Currently Selected:

Odeyi 8: EBTP

Highlight

Copy