Odeyi 7

Ịrẹyị oni Isitivini kà

1Dị ohirẹsụ ọbanyị irehi Ohomorihi họ̀ Isitivini ka, “Avọọ wáá yọ?” 2#Oyn 12.1Dị Isitivini ka, “Ẹwụ nịnị anda ayị ọnịrị ada ayị nịnị, batọ ịrẹyị amị nịnị! Ohomorihi onigirima ộ sị ẹngụ zụ̀ Abụrahamị ada ayị, ịnị ụmẹ ọnọọ sị yà Imesopotamiya, dị ọ va na ra Ị́haraanị. 3Dị Ohomorihi kà a yọ ka ọ̀ hụụ ịdị anda ẹnịnị ọnịrị ẹkụra anị, dị ọ̀ nọ ịzị ọnị vaa sị zụ̀ ọọ. 4#Oyn 11.31; Oyn 12.4Dị Abụrahamị hụrẹ ẹtẹ Ikaridi, dị ọ na ra Ị́haraanị nị. Áda Abụrahamị mè wusu, dị Ohomorihi sị Abụrahamị ka ọ̀ va yà ịnị ẹtẹ ọnị ụ yà nịnị booro aanị nị. 5#Oyn 12.7; 13.15; 15.18; 17.8Ohomorihi ọ yị sị aha ọnyọọnyịị yọ ka ọ̀ vị áanị, ọ̀ọ hyakụ vị ahụ ọnya kẹnẹ. Ama Ohomorihi ka ẹ yị zụ nyị ka ayị vị avaba ẹtẹ ọnọọ ọnị vaa sịị yị Abụrahamị, ọnịrị ka ezi anị ịrẹma-ịrẹma ẹ vaa nyị nị. Ịnị ụmẹ oni Ohomorihi maanị sị kà, Abụrahamị ọọ̀ yị ma ozi, 6#Oyn 15.13,14Ohomorihi ọ rẹ kà a yọ ka ezi anị vaa ra ịnị ẹkụra ọzọga, dị ẹẹ vị ọrịhị, dị a sị ụya rị wa mẹ ịrayị akava (400). 7#Kụra 3.12Ama Ohomorihi ka ọnị vaa mẹ̀ ọkarẹyị yị aza ana za wa ọrịhị. Dị Ohomorihi rẹ ka ịrẹma ọnọọ, ẹ vaa hụụ ịzọọ, dị ẹ va hẹkẹ ọnị ịzẹnị. 8#Oyn 17.10-14; Oyn 21.2-4; Oyn 25.26; Oyn 29.31—35.18Dị Ohomorihi ka Abụrahamị ọ̀ jị aza anị ụvẹvẹnẹ, ana jẹẹ yị apọtẹrẹwa oto ọnọọ nị. Dị Abụrahamị ma Ayiziiki, dị ọ jị ọọ ụvẹvẹnẹ, ịhị ẹ tụ́ ọọ ẹkụhị ịhịnta ọnị ọ ma a nị. Ayiziiki ộ ma Ijekọvụ, dị Ijekọvụ ọnị ma ezi ẹwụrẹva ana vị ada ayị nị.

9 # Oyn 37.11; Oyn 37.28; Oyn 39.2,21 “Ada ayị nịnị ê pe Ijosẹẹhụ kụ̀ ụhị, dị ẹ ná a ọrịhị nọ Ijipiti nị. Ama Ohomorihi ộ yà beri ọ, 10#Oyn 41.39-41dị ọ dọ ọ tụ́ hụụnị avaba ụyọrị anị nị. Ohomorihi ộ sị ịrẹyọyẹ yị Ijosẹẹhụ, ộ mẹ̀ ka Ihwarawo, ọnị ọ vị ka ohinọyị Anijipiti ò sì ịrẹyị anị. Dị Ihwarawo sị Ijosẹẹhụ mẹ ọga Anijipiti ọnịrị avaba irehi anị nị. 11#Oyn 42.1,2Ịrayị ọnya dị ụngwẹ vavẹ ịnị avaba ẹtẹ Ijipiti ọnịrị Ikanaani nị, ana ahịka aza ệ rị ụya ẹtẹẹtẹrẹ. Ada ayị nịnị e yi re ịsa rị. 12Ịjị Ijekọvụ wụ́ ka â nyị ịsọyịrị ịnị ẹtẹ Ijipiti, dị ọ vịdị tụ́ ada ayị nịnị na nị. 13#Oyn 45.1; Oyn 45.16Ẹ́ mẹ̀ vana na ụpẹ ọhụva, dị Ijosẹẹhụ sị ẹngụ anị zụ̀ ẹnẹbẹnị anị nị, dị Ihwarawo ọnị rẹ va yẹ anda Ijosẹẹhụ nịnị nị. 14#Oyn 45.9,10,17,18; Oyn 46.27Ijosẹẹhụ ộ tụ́ hị́ Ijekọvụ ada anị ka avaba ẹnịnị è ve tù ọnị. Avaba anda ẹnịnị vị ẹtarẹwụ tụra ẹẹhị (75). 15#Oyn 46.1-7; Oyn 49.33Dị Ijekọvụ nọ Ijipiti nị. Ịzọọ ọnịrị ada ayị nịnị yà sú nị. 16#Oyn 23.3-16; 33.19; 50.7-13; Ijos 24.32Dị a kụ́ oku ẹnịnị ne ne Ịsẹkẹmị ini ikuta ana Abụrahamị vịdị sị ẹkẹhị hị́ hụụnị ụvọ ezi Ihamori nị.

17 # Kụra 1.7,8 “Ộ da kù, ụmẹ maa gụrị ẹtẹ oni Ohomorihi aà vaa sị mẹ oto oni o wo yị Abụrahamị, dị anda ayị ene hi Ijipiti sị rụrụ hu avọọ nị. 18Dị ohinọyị ọsa rẹ sị rị nị. Ohinọyị ọnọọ ọ yị yẹ Ijosẹẹhụ. 19#Kụra 1.10,11; Kụra 1.22Ohinọyị ọnọọ ô vene ohiku ayị nịnị, dị ọ chamayị yị wa nị. Dị ọ ka ada ayị nịnị ẹ̀ kụ́ ezi eweyi ẹnịnị hi ẹhẹ, agụvị di è sú nị. 20#Kụra 2.2Ụmẹ ọnọnị a sị ma Imosiisi nị. A mẹ̀ ma Imosiisi, ô zé Ohomorihi eyi. Â pá a mẹ ụhwẹ ẹẹta ini eehi ịdị ada anị. 21#Kụra 2.3-10Dị ẹ sị ọ tụ̀ ẹhẹ, di ozi ọnẹẹ Ihwarawo na sị ọ, dị ọ sị mẹ ozi anị, dị aa pá a nị. 22Imosiisi ộ kọ avaba ịrẹyọyẹ Anijipiti. Ịrẹyị anị ọnịrị ịsa ana aa mẹ, vị ana nyị ụkata.

23 # Kụra 2.11-15 “Ímosiisi mẹ̀ sị mẹ ịrayị ẹbẹẹva, ộ vẹ ịnị ayị anị ka oni ee nee hee aza anị ana vị Anisirẹrị nịnị. 24Di o re, Anijipiti ọnya màa sị ụyaa rị anda ẹnịnị ọnya nị. Dị ọ na ka ọnị ọ̀ na dọ ọ tụ́ nị. Dị ọ za Anijipiti ọnọọ, dị ọ wụ̀ ọ sí atọ ụyọrị ọnọọ nị. 25Ô ro ka aza anị vaa yẹ ka ọnị Ohomorihi vaa sịị dọ waa tụ́ nị, ama ẹnịnị ẹ yị yẹ. 26Eyinẹhẹ anị, o re ne tù ka Anisirẹrị ẹẹva aa zyaazị. Dị ọ ka oni ee nee ji wa nị. Dị ọ ka: ‘Ẹwụ nịnị ẹyịnyara amị, ẹyịnyara ụ vị nịnị nị, sị ẹ vẹ dị ụ waa chamayịị yị ẹngụ nịnị?’ 27Di ene sì ịrẹyị aanị tụ́ ọ ụvọ kwooze, dị ọ ka ẹnẹ sị ọọ mẹ ohinọyị ọnịrị ọmọkarẹyị ẹnịnị? 28Ọ kà vị ọ́ọ́ raa vaa wụ̀ ọnị, anka ọ mẹ̀ wụ Anijipiti ẹẹrị nị? 29#Kụra 18.3,4Ịjị Imosiisi maanị wụ́, di o si zwe hụrẹ Ijipiti, dị ọ na vị ọzọga tụ́ ẹkụra Imidiyani nị. Ộ ma ozi ọnọrụ ẹẹva ịzọọ.

30 # Kụra 3.1-10 “Ị́rayị ẹbẹẹva mẹ̀ sị mẹ kwooze, dị anggẹẹrị Ohomorihi sị ẹngụ zụ̀ Imosiisi ịnị ụnọmị ịnị ataba Ịsịnayị ini oze ịra ana aa rị ịnị ọchị ọnya aanị. 31Ịjị Imosiisi re e, ô hí oo irenu, di o tere pe e ka oni ò re e ẹtẹẹrẹ nị. Dị ọ wụ́ ka Ohomorihi Ananyị yị ộ kà ịrẹyị ka: 32‘Ẹma vị Ohomorihi ohiku awụ nị, Ohomorihi Abụrahamị, Ohomorihi Ayiziiki ọnịrị Ohomorihi Ijekọvụ.’ Dị Imosiisi aa bànyị, ángwa mèe hí ọọ nị. Ọ yị nyayịnẹ kụ̀rà eyi tụ́ ẹba. 33Dị Ohomorihi kà a yọ ka ọ̀ ngwa adava anị, ka ịzọọ jẹẹ avọọ, vị aha ọnịnị. 34Dị Ohomorihi ka oni ô re ụya odivi ana aza anị aa rị ịnị ẹtẹ Ijipiti. Ọ kà ọnị ộ wụ́ owu ẹnẹ ẹyaa na, dị ọnị vẹ ka ọnị ọ̀ va dọ wa há nị. Dị ọ ka Imosiisi ọ̀ vẹ ka ọnị aa tụ́ ọọ nọ Ijipiti nị.

35 # Kụra 2.14 “Imosiisi ọnọnị Ánisirẹrị nịnị yi nị, ẹ mẹ̀ kà a ka ẹnẹ sị ọọ mẹ ohinọyị ọnịrị ọmọkarẹyị ẹnịnị? Ọnị Óhomorihi va sị mẹ ohinọyị ẹnịnị ọnịrị ọza ana dọ wa tụ́ ini oze anggẹẹrị ana sị ẹngụ zụ̀ ọọ ịnị ọchị ọnọọ nị. 36#Kụra 7.3; Kụra 14.21; Ịrị 14.33Imosiisi ộ kụ́ Anisirẹrị nịnị hụrẹ ẹtẹ Ijipiti. Ộ mẹ̀ ụkọrọ ohyozirenu ọnịrị apọtẹrẹwa ịnị ẹtẹ Ijipiti ọnịrị ini Irehu Ovivi ọnịrị pooro mẹ ịrayị ẹbẹẹva ịnị ụnọmị. 37#Ọda 18.15,18Imosiisi ọnọọ ộ kà a yị Anisirẹrị ka Ohomorihi vaa tụ́ ọnịsẹ ọnyaa hi wa anka ọ mẹ̀ tụ́ ọnị. Dị ọ ka anda awụ nịnị ọ vaa vị nị. 38#Kụra 19.1—20.17; Ọda 5.1-33Ọnị ọnịrị Anisirẹrị nịnị yà ịnị ụnọmị, áda ayị nịnị mẹ̀ va gụ ịzọọ nị. Anggẹẹrị ọnọọ ộ kà ịrẹyịị yọ ị́rẹsụ ataba Ịsịnayị, dị ọ tụ́ ọọ hi ada ayị nịnị nị. Imosiisi ộ sị enube Ohomorihi ana aa mẹ ka ọza ọ̀ yàra pooro zịna-zịna va yị.

39“Ada ayị nịnị ẹ yị zẹẹ ka ẹnị ẹ̀ wụ́ ịrẹyị anị, dị ẹ tụ́ ọọ ụvọ hụụ ịdị ẹnịnị, dị ẹ raà sị ayị ẹnịnị varẹma nọ Ijipiti nị. 40#Kụra 32.1Ệ kà a yị Eerọnị ka ọ̀ mẹ ori yị ẹnị, dị ọ̀ kụkụụ dọ ọvịdị ẹnịnị. Ẹ ka ẹnị ẹ yị yẹ ịsị ẹ mẹ Imosiisi ọnọọ ana kụ́ ẹnị hụrẹ Ijipiti aa vẹ. 41#Kụra 32.2-6Ịjọnọọ dị ẹ mẹ ori ọnya anka ozi imaaru avọọ, dị ẹyaa mẹ ịsọvọọ hi ọọ, dị ẹyaa rị eche ịsị ẹ rẹ sị ụvọ ẹnịnị mẹ nị. 42#Emọ 5.25-27Ohomorihi ộ vaa ịrẹma ẹnịnị, dị ọ navọ wa ka ẹẹ hẹkẹ ụzọmị ẹbẹẹba, anka a mẹ̀ chẹrẹ ẹ tụ́ ini iwe ọnịsẹ nịnị ka.” Ẹwụ nịnị Anisirẹrị, ẹ yị vị ẹmị ụ waa wụ̀ uyee mẹ ịsọvọọ hi nịnị hụrẹ ịrayị ẹbẹẹva ịnị ụnọmị. 43Ajẹngụ ori ana aā hị́ Imoroki ọnịrị uyi ụzọmị, ori ana aā hị́ Irehwani ụ waa zaa zịị zị nịnị nị. Ẹwụ nịnị ọ sị ụvọta awụ mẹ̀ ori ẹnẹẹ ọnị ụ waa hẹkẹ nị. Agụvị avọọ mị vaa dụ wụ nịnịị nọ ịrẹma Ịbabịrọnị.

44 # Kụra 25.9,40 “Áda ayị nịnị mẹ̀ yà ịnị ụnọmị, ệ nyị ajẹngụ ịzị Ohomorihiī yàa kà ịrẹyịị yị wa. Â mẹẹ anka Óhomorihi mè juwe yị Imosiisi ka ọ̀ mẹ̀ ẹ. 45#Ijos 3.14-17Ịrẹma ọnọọ, ada ayị ệ rẹ vana dọ ajẹngụ ọnọọ hụụnị ụvọ ohiku ẹnịnị. Dị ẹ za a, ẹ màa saasa Ijosuwa nị. Dị ẹ na dọ ẹtẹ hụụnị ụvọ aza irenyi-irenyi oni Ohomorihi sị dụ jịnẹ yị wa nị. Dị ajẹngụ ọnọọ yà ịzọọ pooro ne tù ụmẹ Idevidi nị. 46#2 Ịsa 7.1-16; 1 Ịtọ 17.1-14Ịrẹyị Idevidi ô zé Ohomorihi eyi, di Idevidi ka ọnị aa dà irehii yị Ohomorihi Ijekọvụ nị. 47#1 Ohi 6.1-38; 2 Ịtọ 3.1-17Ama Isoromọnị ọ vana dà irehi ọnọọ yọ nị. 48Ama Ohomorihi ọgọdọgọdọ ọnị ụvọ ọza è yi mè tù ọ mā ra ini irehi ana aza dà; anka ọ́nịsẹ ọnya mẹ̀ kà a ka 49#Ayị 66.1,2Ohomorihi ka, ‘ẹbẹẹba vị aga ohinọyị anị, ẹhẹ vị ịzị aā kụ́ ahụụ hi, ọ ka ye re ẹngụ irehi ọnị ụ vaa dàa yị ọnị; ịzị ụ ka ọnị ọ̀ yà tụ́ ụhwọ́?’ 50Ọ kà aanị ka ayị vị ọnị ụvọta ọ mẹ avaba ịsa ẹnẹnị?”

51 # Ayị 63.10 Di Isitivini ka, “Ẹwụ nịnị anayọkatẹngụ, ana nyị ayị anarịmadọwụ, dị ụ wẹ̀ yị mā wụ́ ịrẹyị Ohomorihi nịnị. Ẹwụrị ohiku awụ nịnị vị ọnya, vị ẹwụ nịnịị̄ rẹẹ kụ̀ụ hịrẹ Ụhwẹ Ọnịnị nị. 52Áá nyị ọnịsẹ oni ohiku awụ nịnị ọ̀ yị sị ụya rị da? Ẹ raà wụ̀ aza ana vịdị va kà a tịtẹ ka Ọnịzẹyịza ọnọọ aa vẹ. Ọza ọnọọ u si chire aza ụvọ, dị ụ wụ̀ ọ nịnị nị. 53Ẹwụ nịnị anggẹẹrị sị ọda Ohomorihi va yị nị, ama wẹ yị saasa ọda ọnọọ nịnị.”

Ê tụ́ Isitivini ịrẹta

54Ịjị anikootu maanị wụ́ ịrẹyị ẹnẹnị, ayị ẹnẹnị ọ sị tụ̀, dị ẹyaa rị anyịị hi ọọ nị. 55Ụhwẹ Ọnịnị ọ raà dọ avaba ayị Isitivini, di ee re ẹbẹẹba gegege, di o re igirima Ohomorihi nị. Di o re re ka Ijeesu jẹẹ éyi ụvọrị Ohomorihi nị. 56Dị Isitivini ka, “Re! Mee re, íhinẹbaa mẹ̀ na hi ẹtẹ, di Ozi ọza onigirima jẹẹ éyi ụvọrị Ohomorihi nị!” 57Dị anikootu nịnị sị ụvọ ẹnịnị kú ụtọ, di e nowu zẹtẹ nị. Di e dudu zwe ne tù ọ, 58dị ẹ sị ọọ nọ ịrẹma ẹkụra, dị ẹyaa kụ̀ ọọ ịrẹta nị. Di onivenu nịnị kụ́ ịta ẹnịnị yị ozwọọmụha ọnya aanị ana aā hị́ Ịsọọrụ ka ò sị eyi pe e nị. 59E mèe yii tụ́ Isitivini ịrẹta, dị Isitivini aa mẹ̀ aduwa dị ọ ka, “Ijeesu Ananyị yị, dọ ụhwẹ amị!” 60Di o ku ẹtẹ, di o nowu tụ́ ẹba dị ọ ka, “Ananyị yị, asị ụ sị ịvị ịrẹyị ọnọnị tụ́ wa ọrọkọ!” Ịjị ọ maanị sị ọọ kà, di o sú nị.

Currently Selected:

Odeyi 7: EBTP

Highlight

Copy