Odeyi 9

Ị́sọọrụ mẹmẹ vara Ezirẹma Ikirisiti

(Ụkọ 22.3-16; 26.9-18)

1Ịnị ụmẹ ọnọọ, Ịsọọrụ ee yii chire ezirẹma Ananyị yị angwa. Dị aa mẹ kaakara ka ọnị ọ̀ wụ̀ wa nị. Dị ọ nọ ịdị ohirẹsụ ọbanyị irehi Ohomorihi, 2ka ọ̀ sị iwe yị ọnị, dị ọnị ọ̀ sị na yị irehi ahẹkẹ Aniju nịnị ene hi Ịdamasịkọsị nị. Ọ kà oni òo re ọza ana aa saasa oze Ikirisiti ịzọọ, dị ọnị ọ tụ́ wa orupa vẹ Ijerusarẹmị, ẹ̀ẹ vị ọnọrụ, ẹ̀ẹ daka vị anẹẹ.

3Ọ màa na, aa gụrị Ịdamasịkọsị kẹnẹ, dị ẹtẹ vene hweyi kara a hụrẹ ẹbẹẹba vẹ nị. 4Dị ọ hyẹdụ nya ẹtẹ, dị ọ wụ́ ọngwẹ ana kà a yọ ka, “Ịsọọrụ, Ịsọọrụ, sị ẹ vẹ dị ụ waa sị ụyaa rị mị?” 5Dị Ịsọọrụ ka, “Ẹwụ ẹnẹ ọ vị, Ananyị yị?” Dị Ananyị yị ka, “Ẹma vị Ijeesu ọnị ụ waa sị ụyaa rị nị. 6Kwẹẹtẹ, dị ụ wa nọ ịnị ẹkụra ọsọọ; a vaa kà a wụ ịsị a vọrọ ka wa mẹ.” 7Dị aza ọnị ọnịrịị zị aa na, jẹẹ kẹnẹ, dị ẹ̀ yị zụ kà ịrẹyị nị. Ệ wụ́ ọngwẹ ọnọọ, ama e yi re ọza. 8Dị Ịsọọrụ kwẹẹtẹ hụụnị eteesu nị. Ô há eyi anị, ama o yi zụ re ẹtẹ. Dị ẹ sị ụvọ gẹ ẹ, dị ẹ sị ọọ na ngụ Ịdamasịkọsị nị. 9Ộ mẹ ẹkụhị ẹẹta, Ịsọọrụ o yi re ẹtẹ, ọ yị rị, o yi hú. 10Â nyị ozirẹma ọnya ana yà Ịdamasịkọsị. Ịrẹha anị ọ rị Ananịya nị. Ô re ẹtẹ, dị Ohomorihi hị́ ọ ka, “Ananịya!” Dị ọ ka, “Ẹmị yị, Ananyị yị.” 11Dị Ananyị yị kà a yọ ka, “Kwẹẹtẹ dị ụ wa nọ oze ana aā hị́ ‘Oze Ọvọrọ’, dị ụ wa nọ ini eehi Ijudasi, di u we họ̀ use ọnọrụ ọnya ana hụrẹ Ịtasọsị vẹ ana aā hị́ Ịsọọrụ. Re, aa mẹ̀ aduwa booro aanị. 12Ô re ẹtẹ ka ọnọrụ ọnya ana aā hị́ Ananịya ọ va sị ụvọ tụra ọnị ka eyi anị ọ̀ zụ há.” 13Dị Ananịya ka, “Ananyị yị, aza ọrụrụ-ọrụrụ aa kà ịrẹyị ọnọrụ ọnọnị, nọ! A ka ộ mẹ̀ ịsa odivi hi aza awụ ene hi Ijerusarẹmị ẹtẹẹtẹrẹ. 14Vị ọ hyakụ dọ iwe ọda hụụnị ụvọ ohirẹsụ ẹbanyị irehi Ohomorihi ka ọnị ọ̀ vẹ Ịdamasịkọsị, dị ọnị ọ̀ va sụ́ avaba aza ana àa hị́ ịrẹha awụ orupa nị.” 15Dị Ananyị yị kà a yọ ka, “Na! Agụvị ka ma sị ọọ nyị ka ọọ mẹ ụkọrọọ mị, dị ọ̀ na kà ịrẹyị amị yị Anigiriki ọnịrị ohinọyị nịnị ne beri Anisirẹrị nịnị. 16Ẹmị ụvọta vaa sịị zụ̀ ọọ ụya ọnị ọ vaa rị agụvị amị.”

17Dị Ananịya na, dị ọ ngụ irehi ọnị Ịsọọrụ yà, dị ọ sị ụvọ tụra a nị. Dị ọ ka, “Ịsọọrụ ẹnẹbẹnị ayị, Ananyị yị ọ tụ́ mị hi wu nọ. Ijeesu ọnị ụvọta m maa kà nị, ana sị ẹngụ zụ̀ wụ óze, ụ màa vẹ ịzẹnị. O ka ma vẹ, di eyi awụ ọ̀ varẹma há, dị Ụhwẹ Ọnịnị ọ̀ rẹ dọ avaba ayị awụ!” 18Obooboro ọnọọ, dị ịsa ẹnyị aanị anka iguha ivovo avọọ hụrẹ hụụnị eyi Ịsọọrụ, di o kuku ee re ẹtẹ nị. Dị ọ kwẹẹtẹ jẹẹ, dị a mẹ̀ ọyịhwọzenyi yọ nị. 19Ịjị ọ sị ịsa rị, dị ọ rẹ sị ụkata nyị nị.

Ịsọọrụ ộ kà ịrẹyị Ohomorihi Ị́damasịkọsị

Ịsọọrụ ộ yà ịdị ezirẹma nịnị Ị́damasịkọsị mẹ ẹkụhị chee. 20Dị ọ wụsẹ nọ ini irehi Ohomorihi Aniju, dị aa kà a nị ka Ijeesu vị Ozi Ohomorihi. 21Avaba aza ana wụ́ ọ vị ọnị o hí irenu. Dị ẹ ka, “Aanịka ẹ yị vị ọza ana yà Ijerusarẹmị ana aa wụ̀ ọza ana àa hị́ ịrẹha ọnọnị yị? Aanịka ẹ yị vị ọ vẹ ịzẹnị ka ọnị ọ̀ va sụ́ wa orupa, dị ọnị ọ̀ kụ́ wa nọ ịdị ohirẹsụ ẹbanyị irehi Ohomorihi?” 22Ịrẹyị ọnị Ịsọọrụ aa kà, aa nyị ụkataa hu avọọ. Ọ màa sịị zụ̀ ka Ijeesu ọ vị Ọdọzaha nị, Aniju nịnị ana ra Ị́damasịkọsị e yi zụ tụ́ ọ ohi.

23 # 2 Ịkọ 11.32,33 Ịjị ọ sị mẹ ẹkụhị chee para hu, dị Aniju nịnị gẹ eyi ka ẹnị ẹ̀ wụ ọ nị. 24Ama a sị ọọ kà yị Ịsọọrụ ịsị eyee sì ka ẹnị ẹ̀ mẹ. Dị Aniju nịnị kuku ee sere oze ana hụụnị ẹkụra na jịnẹ ọọdụ ọnịrị ịrahụ, agụvị è re oze wụ ọọ nị. 25Ama ịnị ịrahụ ẹkụhị ọnya, dị aza ịrẹma Ịsọọrụ sị ọọ tụ́ ini uji, dị ẹ zị oze ịnị ọvọ ana kara ẹkụra chí ọ hi ẹtẹ nị.

Ịsọọrụ ộ nọ Ijerusarẹmị

26Ịsọọrụ ộ nọ Ijerusarẹmị, di ee sì ka ọnị ọ̀ sị ẹngụ vaka ezirẹma nịnị nị. Ẹnịnị ẹ yị dọ wụ́ ka Ịsọọrụ ọnị ọ rẹ sị vara ozirẹma Ijeesu, di eyee hí angwa anị nị. 27Dị Ịbanabasị va sị ọọ ká odeyi nịnị na nị. Dị ọ kà a yị wa, Ị́sọọrụ meme re Ananyị yị óze, dị ọ kà ịrẹyịị yọ nị. Dị ọ rẹ kà a yị wa, Ị́sọọrụ mẹmẹ sị ọtụtụrụma kà ịrẹyị Ijeesu Ị́damasịkọsị nị. 28Dị Ịsọọrụ yà pe wa, dị aa ngụ Ijerusarẹmị zị, 29dị aa sị ọtụtụrụma kà ịrẹyị ịnị ịrẹha Ijeesu Ananyị yị nị. O re beri Aniju nịnị ana aa kà ẹkụra Anigirikii nyị ahankata. Ama dị ẹnịnị ee sì ka ẹnị ẹ̀ wụ ọọ nị. 30Ịjị ọdọwụ nịnị ana vọ sị yẹ, dị ẹ sị Ịsọọrụ chí na ngụ Isesariya, dị ẹ ka ọ̀ọ nọ Ịtasọsị nị.

31Dị avaba anịragụ Ohomorihi ene hi Ijudiya ọnịrị Igariri ne beri Ịsamarịya nyị ẹngwọọrọ yị ụmẹ chee nị. Ẹnịnị aa vịra, ệ nyị angwahi Ohomorihi, Ụhwẹ Ọnịnị aa mẹ ọgụvọọ yị wa, dị ẹyaa rụrụụ hu avọọ nị.

Ipita ộ nọ Irida ọnịrị Ịjọpa

32Ipita vị ana aa ngụ ọọ zịịzị. Ẹkụhị ọnya, di o ne hee aza Ohomorihi ana ra Írida nị. 33Ịzọọ, ô ne tù ọnọrụ ọnya aanị ana aā hị́ Eniyasi. Oswẹngụ ọ vị nị, ọ yị zụ kwẹẹtẹ hụrẹ aha ọyịsụ̀ anị hụrị ịrayị ịhịnta. 34Dị Ipita kà a yọ ka, “Eniyasi, Ijeesu Ikirisiti ọ sị wụ mẹ ụkụ booro aanị. Kwẹẹtẹ we tenyi ẹngụ awụ!” Obooboro, dị Eniyasi kwẹẹtẹ nị. 35Avaba aza ana ra hi Irida ọnịrị Ịsarọnị ê re e, dị ẹ và ká Ananyị yị vẹ nị.

36Â nyị ọnẹẹ ọnya aanị ana yà Ịjọpa, ozirẹma ọ vị nị. Aā hị́ ọọ Itabita. Iruvo ịrẹha anị ọ vị Ịdọkaasị ịnị ẹkụra Anigiriki, ọnọọ vị ka “akọnọ”. Ọọ̄ mẹ ọyịza ẹtẹẹtẹrẹ, dị aa gụ onosiye nịnị ụvọ. 37Ụmẹ ọnọọ, ẹngụ ộ zị ọọ, di o sú nị. Dị ẹ hụ oku anị enyi, dị ẹ sị ọọ tụ́ ịnị aku ịnị ọtụrọsa nị. 38Ịjọpa o yi noze rịrị Irida. Ézirẹma nịnị mẹ̀ wụ́ ka Ipita yà Irida, dị ẹ tụ́ aza ẹnị ẹẹva na hị́ ọọ nị. Dị ẹ ka, “Aarịhịnị, wụsẹ jintu ve tù yi!” 39Dị Ipita kwẹẹtẹ, dị aa dị waa na nị. Ịjị o tù ịzọọ, dị a sị ọọ nọ ịnị aku ịnị ọtụrọsa ọnọọ nị. Dị avaba osoku nịnị ene hi ịzọọ wara kara Ipita, dị ẹyaa jị òrèrè, dị ẹyaa sị awuru ọnịrị ọtịnịnẹ ọnị Ịdọkaasị mẹ, ọ mẹ̀ yà ẹhẹ, zụ̀ Ipita nị. 40Dị Ipita ka avaba ẹnịnị ẹ̀ jịnẹ hi ẹhẹ, di o ku ẹtẹ, dị aa mẹ̀ aduwa nị. Di o và eyi kà oku ọnọọ, dị ọ ka, “Itabita, kwẹẹtẹ!” Dị Itabita há eyi anị nị. O mè re Ipita, dị ọ kwẹẹtẹ yaayịtẹ nị. 41Dị Ipita sị ụvọ gẹ ẹ, dị ọ sị ọọ kwẹẹtẹ nị. Dị ọ hị́ ọdọwụ ẹnẹẹ beri osoku ẹnẹẹ, dị ọ sị ọọ yị wa ireyi-ireyi nị. 42Ịrẹyị ọnọnị ộ ngụ ịrẹyị ngụ Ịjọpa zịịzị, dị aza ọrụrụ-ọrụrụ sị ayị tụra Ananyị yị nị. 43Dị Ipita yà Ịjọpa mẹ ẹkụhị kù chee ị́dị ọnịtụmpaha ana aā hị́ Ịsayịmọnị nị.

Currently Selected:

Odeyi 9: EBTP

Highlight

Copy