2 Ịtọpa 20
20
Ijehosahwati ộ nyị ehuna Animowabi ọnịrị Anamọnị
1Ịrẹma ọnị Ijehosahwati vavọọ reè tenyi ẹtẹ, Animowabi ọnịrị Anamọnị ne beri Animewu ẹnyị gẹ ịrẹkụ tù ọ nị. 2Â nyị anọrụ ẹnyị ana va kà yị Ijehosahwati ka ọkọnị isoja hụrẹ Edomi hụrẹ akẹnẹ enyi aa vẹ ịrẹkụ anị. Aza ẹnẹ ẹ̀ sị ngụ Ihazazoni Ịtama ana na rẹẹ̀ hị́ Enigedi. 3Ịjị ọ maanị wụ́ ọ kẹnẹ, dị angwa hi ọ, dị ọ aduwa ka Ẹnẹyịmavara ọ sị oze zụ ẹnị nị. Dị ọ kà avaba Anijuda ẹ za awẹ, 4Ịzẹyịza dị avaba Anijuda nịnị hụrẹ ẹkụra irenyi-irenyi kụ́ ẹngụ gụ ka ẹnị aa pa ka Ẹnẹyịmavara ọ gụ ẹnị ụvọ nị. 5Ịjị aza sị gụ dị Ijehosahwati kwẹẹtẹ jẹẹ ịnị akakana ịragụ Anijuda ọnịrị Anijerusarẹmị ẹnẹ hị́ ịnị ohweje ọwọọwa Irehi Ohomorihi. 6Dị ọ kà, Tee! Ẹnẹyịmavara Ohomorihi ohiku ayị, aanịka ẹ yị vị ẹwa vị Ohomorihi ayị ana ya ẹbẹẹba? Ẹwụ aa mẹ ịjọva tụra avaba ẹhẹ ịrẹsụ nị. Avaba ụkata vị ana ya ịnị ụvọ awụ, ẹ yị nyị ọza ene zụ ziizi wu ụvọ. 7#Ayị 41.8; Ije 2.23Ọnị ọ vị Ohomorihi ẹnịnị ịjị aza anị Anisirẹrị ngụ ịnị ẹtẹ ọnọọ dị ộ dụ aza ene hi ịzọọ jịnẹ tụ́ ẹhẹ yị evere Abụrahamị ana vị ọta anị, dị ụ sị yị wa ka ọ vị ẹnịnị pooro zịna-zịna. 8Ẹnịnị ẹ̀ raà ra ịzọọ, dị ẹ dà irehi Ohomorihi ọnị ẹ sị sị ụbanyị Ẹnẹyịmavara. 9Àa nyị ẹngụkata ene tù wa: Ọ vị ịrẹkụ, ọ vị ụkụ, ọ vị ụngwẹ. Ụmẹ tụra ụmẹ ọnị ịrẹyị òo tù wa, nini ọ nọ ọvịdị irehi anị ịzị ẹ yaa mẹ̀ ahẹkẹ na dà ịpẹ yị Ẹnẹyịmavara, Ụ vaa wụ̀ yị, dị ụ dọ wa ha. 10#Ọda 2.4-19Re booro aanị, Anamọnị, ọnịrị Animowabi ne beri Anedomi nịnị mẹ kụ́ ịrẹkụ tu ẹnị. Avọọ ẹnịnị mẹ rẹẹ̀ vịdị mè jị ẹvẹnẹ-ẹvẹnẹ tụ́ oze ka asị ohiku ẹnịnị ana hụrẹ Ijipiti aa vẹ che ẹkụra ẹnịnị parahu nị. Ẹnịnị ê jesi kara wa dị ẹ navọ wa nị. 11Aanị ẹ mẹẹ si Anisirẹrị nịnị atọ nị. Ẹnịnị vị ana vaa dụ ẹnị jịnẹ hụụnị ẹtẹ ọnị Ohomorihi sị yị ẹnị. 12Ộ kà a Ohomorihi ọ sị ụya rị wa agụvị ka ẹ yị nyị ịsị ẹnị zụ mẹ̀ ọkọnị isoja ana va eyi ịrazị ka ẹnị aanị. Ẹnị ẹ yị yẹ ịsị ẹnị zụ mẹ̀, ama ẹnịnị ee zi Ohomorihi eyi ka ọ va gụ́ ẹnị ụvọ nị. 13Avaba anọrụ Anijuda ẹnịrị anẹẹ ẹnịnị neberi ezi ẹnịnị vị anaa jẹẹ ịnị irehi Ẹnẹyịmavara ịzọọ. 14Â nyị Anireevi ọnya aanị ana a hị́ Ijahaziyẹrị ana vị ozi Ịzakaraya hụrẹ abara Asa ịnị oze ịpa Imataniya, Ijẹyẹrị ọnịrị Ịbẹnaya. Ịnị akakana ọkọnị ộ ya dị ụhwẹ Ẹnẹyịmavara chi ka a vẹ nị. 15#Ọda 20.1-4Dị Ijahaziyẹrị kà a taarụ Ohinọyị ọnịrị avaba Anijuda ọnịrị Anijerusarẹmị nịnị! Ẹnẹyịmavara kà a asị a nyị ọza ọnị o du eyi, dị asị e hí angwa ọyị nọ ịrẹkụ ọkọnị isoja ẹnịnị. 16Ộ kà a nọ ịrẹkụ aza ẹnẹẹ ẹnịnị aa parahu Izizi. Ẹnịrị wa ẹ na gẹ ẹhwị ẹtẹ inozi ana na ngụ ụnọmị ana gụrị Ijeruwẹrị. 17#Kụra 14.13,14Ẹnẹyịmavara raa kà a ẹ yị vị ẹnị ẹ vaa kụ́ ịrẹkụ ọnọọ. Ẹ yịị vavọọ jẹẹ aha ẹnịnị ee zi. E vee re Ẹnẹyịmavara mẹ̀ vaa sị wa nyị ẹbẹẹba. Asị Anijuda ọnịrị Anijerusarẹmị nịnị kahi ịrẹma, asị e hí angwa. Ẹ nọ ịrẹkụ ka Ẹnẹyịmavara vaa jẹẹ wa ịrẹma. 18Ịjị Ijehosahwati maanị wụ́ enube kẹnẹ, dị ọnịrị aza anị vaku ẹtẹ, dị ẹ sị ịrẹsụ ka ẹtẹ, dị ẹ hẹkẹ Ẹnẹyịmavara nị. 19Anireevi nịnị hụrẹ abara Ikahati ọnịrị Ikora kwẹẹtẹ jẹẹ, dị ẹ sị ọngwẹ tụ́ ẹba aa ga Ẹnẹyịmavara ana vị Ohomorihi Anisirẹrị. 20Ẹnẹnẹ viri-viri eyinẹhẹ anị, dị aza kwẹẹtẹ nọ ịnị ụnọmị ana gụrị Itekowa nị. Ẹnịnị màa kwẹẹtẹ, dị Ijehosahwati ka ịrẹyị ẹnẹnị yị wa nị. Ọ kà a, ẹnị anọrụ Ijuda ọnịrị Ijerusarẹmị ẹ sị ayị ẹnịnị tụra Ẹnẹyịmavara Ohomorihi ẹnịnị, dị ẹẹ jẹẹ geri-geri. Ẹnịnị ẹ dọ ịrẹyị ọnị ọnịsẹ nịnị ka yị wa, ka ẹ vaa nyị ehuna. 21Ịrẹma ọnị Ijehosahwati reè beri aza ka ịrẹyị, dị ọ kà ẹnyị ịnị ọjahẹ ẹnịnị e chire awuru ẹnẹē sị mẹ̀ ahẹkẹ ẹkụhị eche, dị ẹẹ jị ahẹ tụ́ ọvịdị isoja nịnị. Ẹ́ẹ jị ahẹ ka, ga Ẹnẹyịmavara! Oyisì anị vị ana ya ịzọọ pooro zịna-zịna. 22Ẹnịnị màa jị ahẹ, dị Ẹnẹyịmavara mẹ̀ ka isoja ana ngụ tu wa ee hì angwa. 23Isoja Anamọnị ọnịrị Animowabi nịnị ẹ kụ́ ịrẹkụ ne tu Anedomi, dị ẹ vu wa ẹtẹ saka-saka, dị ẹnị-ẹnị vara eyi ka ẹngụ dị wụ́ ẹngụ ha nị. 24Ịjị isoja Anijuda nịnị da aja va tụ́ ịrẹsụ ogemigemi ịnị ụnọmị, di e kana eyi ụvẹtẹ, dị e re ka ọnịvị ẹnịnị e su va hi ẹtẹ vẹẹrẹ nị. Ẹ yị nyị ọza ịnị ẹnịnị. 25Dị Ijehosahwati ọnịrị isoja na na kụ́ ẹnya. Ẹnịnị ê re ụnọ ọrụrụ, ịsọyịrị, achị ọnịrị ịsa ana vọ ene zoza. Ẹnịnị ệ kụ́ ogu ẹkụhị ẹẹta, dị ẹnịnị ẹ yị zụ kụ́ ọ ta nị. 26Ịhyẹgwẹna anị, dị ẹ kụ́ ẹngụ gụ ịnị ịnoze Iberaka dị ẹ ga Ẹnẹyịmavara agụvị avaba ịsa ọ mẹ̀ yị wa nị; avọọ aa hị́ ịzọọ Iberaka ọnị iruvo anị vị ụga. 27Ịjị ẹ sị mẹ̀ ta, di Ijehosahwati kụ́ isoja anị varẹma vẹ Ijerusarẹmị ịnị ịrajẹ ka Ẹnẹyịmavara ọ raà sị wa nyị ẹbẹẹba ọnịvị ẹnịnị. 28Ịjị ệ sị ngụ ubooro, dị ẹ kụ́ aahẹ na ngụ irehi Ohomorihi, dị ịkakanchị ọnịrị ọpanyị aa sụ ịrẹyị nị. 29Anẹkụra ọzọza ana wụ́ ọ Ẹnẹyịmavara mẹmẹ hu ọnịvị Anisirẹrị nịnị divi-divi. 30Avọọ Ijehosahwati mẹ̀ ịjọva ịnị ẹngwọọrọ, dị Ohomorihi sere e ẹngụ ọmọọma.
Usu Ijehosahwati
(1 Ohi 22.41-50)
31Ijehosahwati vị ana rị ohinọyị Ijuda ọ mẹ vị ịrayị ohurẹẹwụ tụra ẹẹhị. Dị ọ mẹ̀ ohinọyị ịrayị ohurẹẹhị nị. Ịrẹha ọnyị anị ọ rị Azuba, ana vị ozi Isirihi. 32Anka ada anị Asa ana vịdị rị ohinọyị, ộ mẹ̀ ịsa ana vọrọ eyi Ẹnẹyịmavara. 33Avaba aha ịzị aa ya hẹkẹ ori vị ọnị ọ gara va ha. Ama aza ẹ yị sị ayị ọnyara hẹkẹ Ẹnẹyịmavara ana vị Ohomorihi ohiku ẹnịnị. 34Avaba ịsa ọsa oni Ijehosahwati mẹ̀ hụụnị ụmẹ ọnị ọ rị ohinọyị na ngụ ụmẹ ọdịrẹma anị vị ana a chẹrẹ tụ́ iwe ịtọpa Ijehu ozi Ihanani. Iwe ịtọpa ọnọọ vị iwe ọnya ịnị ịtọpa ohinọyị Anisirẹrị nịnị. 35Â nyị ụmẹ ọnyara ọnị Ijehosahwati ohinọyị Ijuda sị va ụvọ beri ohinọyị Ahaziya Isirẹrị ana mẹ̀ ịsa odivi-odivi ọrụrụ-ọrụrụ. 36Ẹnị ẹyịva ệ dà ẹpa tụ́ utenyi Ezayọnị-Ịgẹba 37Ama Eriyaza ozi Idodavahụ ana hụrẹ ẹkụra Imaresa ộ ka Ijehosahwati ọnọọ, ka ộ dọ beri Ahaziya Ẹnẹyịmavara vee du avaba ịsa oni ọ dà. Avaba ẹpa anị vị ana gara ha, dị ẹ yị zụ sị mẹ̀ ụkọrọ.
Currently Selected:
2 Ịtọpa 20: EBTP
Highlight
Copy
Compare
Share
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
