2 Ịtọpa 21
21
Ijehorami ộ vị ohinọyị Ijuda
(2 Ohi 8.17-24)
1Ijehosahwati mè su, di e ne ịzị eē ne ohinọyị nịnị tụ́ ịnị ẹkụra Idevidi, di ozi anị Ijehorami dọ ọ ịrẹsụ nị. 2Ijehorami ozi Ijehosahwati ọnọnị ộ nyị ẹyịnyara ịhịnọnyị. Ịrẹha ẹnịnị ẹ rị Azarịya, Ịjẹhiyẹrị, Ịzakaraya, Azariyahụ, Ịmayịkẹẹrị ọnịrị Isehwatiya. 3Ada ẹnịnị vị ana nyayịnẹ kụ́ ogu ẹnẹmẹhị yị wa, ộ sị igooru ọnịrị isiriva ne beri ẹnya ọkatarihi yị wa. Dị ộ sị ẹkụra ọnyọọnya yị ọzọza ka o si eyi pè e nị. Agụvị ka Ijehorami ọ́ vị ọzọkụ ẹnịnị nị, dị ọ sị ọ rị ohinọyị dọ ẹngụ anị ịrẹsụ nị. 4Ịjị ịjọva ẹkụra sị ngụ ọ ụvọ ẹtẹẹtẹrẹ, dị ọ wụ́ ẹyịnyara anị ẹnịrị ọdọvịdị Anisirẹrị ẹnyị ha nị. 5Ịrayị ohurẹẹwụ tụra ẹẹva ọ vị dị ọ rị ohinọyị, dị ộ mẹ̀ ẹ ịrayị ịhịnta Ijerusarẹmị nị. 6Ka ộ nyị ozi Ahabị, dị ọ saasa ebira odivi ọyẹ anị ọnịrị ohinọyị Anisirẹrị ana vọ ẹnẹ ẹ yị mẹ̀ ẹtẹẹtẹrẹ, ọ rị ịvị Ẹnẹyịmavara. 7#1 Ohi 11.36Ama Ẹnẹyịmavara ẹ yị sị ka ọnị o vu ovwoovu Idevidi ẹtẹ agụvị oto ọnị ọvịdị wo yọ. Ẹnẹyịmavara ộ kà a ka ụnaka Idevidi ẹ vaa rị ohinọyị vọ yị ẹngụ pooro nị. 8#Oyn 27.40Ịnị ụmẹ ohinọyị Ijehorami, Anedomi nịnị kụ́ hịrẹ Anijuda dị ẹ nyị ohinọyị ẹnịnị nị. 9Avọọ Ijehorami ọnịrị ọdọvịdị isoja nịnị kụ́ ịkẹkẹ ẹnịnị kụ́ ịrẹkụ ne tù wa nị. Isoja Anedomi mẹ kara wa hi, dị ahịka ịrahụ Ijehorami ọnịrị aza anị re oze zwe nị. 10Hụrẹ ụmẹ ọnọọ Anedomi si dọ ẹngụ nịnị hụrẹ ụvọ Anijuda nị. Ịnị ụmẹ ọnọọ ọnyọọnya Anẹkụra Iribina ẹnị rẹ sị jị hụụnị ụvọ Ijehorami. Ịsa ẹnẹnị maanị aa mẹ̀ agụvị ka Ijehorami ô yi Ẹnẹyịmavara ana vị Ohomorihi ohiku nịnị tịtẹ. 11Ộ da aha irenyi-irenyi ịzị aa hẹkẹ ori tụ́ aha ọrụrụ-ọrụrụ ana nẹba ịnị ẹtẹ Ijuda, dị ọ kụ́ Anijuda ọnịrị Anijerusarẹmị nịnị na rị ịvị Ẹnẹyịmavara. 12Ọnịsẹ Erija ộ sị iwe tụ́ hi Ijehorami ana a maanị chẹrẹ ịsa tụ́; Ẹnẹyịmavara ana vị Ohomorihi ohiku awụ Idevidi ộ jị ịvị yị wụ, agụvị ka wẹ yị saasa ada awụ ohinọyị Ijehosahwati, a vị ada awụ ọbanyị ohinọyị Asa. 13Ọ sị ka ọnọọ, dị ụ hama ohinọyị Anisirẹrị nịnị, dị ụ mẹ̀ ka Anijuda ọnịrị Anijerusarẹmị nịnị ẹẹ mẹ̀ akamawụ hị́ Ohomorihi anka Ahabị ọnịrị ohinọyị nịnị ana vana dọ ọ ịrẹsụ. Avọọ ụ mẹ rẹẹ̀ wụ̀ ẹyịnyara awụ ana vị ọza huna awụ nị. 14Avọọ Ẹnẹyịmavara mẹ vaa sị ụya rị aza anị ọnịrị ezi anị ne beri ese anị ẹtẹẹtẹrẹ. Ọnị rẹẹ̀ vee du ogu anị ha. 15Ụkụ ịnị uruvu anaā zị ọza ẹtẹẹtẹrẹ vaa za ọnị ụvọta, dị ụkụ anị ee divii hu avọọ eyinị-eyinị. 16Â nyị Ihwirisiti ẹnyị ọnịrị Anarabi nịnị ana ra gụrị ịzị Anisudani nịnị ra utenyi. Ẹnẹyịmavara kụ́ ọ hi wa ẹngụ ka ẹ nọ ịrẹkụ Ijehorami. 17Dị ẹnịnị ngụ tu Anijuda dị ẹ kụ̀ ẹnya irehi ohinọyị dị ẹ za avaba ezi ohinọyị ẹnịrị ese anị, dị ahịka Ahaziya ozi anị ana vị ozweyi kẹnẹ ọ ha nị. 18Ọ vavẹ ịrẹma avaba ẹnẹnị, Ẹnẹyịmavara sị ụkụ odivi tụ́ ohinọyị iruvu nị. 19Ẹhụ ịrayị ẹẹva avọọ ụkụ ọnọọ vavọọ va iruwa, dị ahịka o divi hu avọọ pooro di o su nị. Ẹ yị nyị aza anị ene hu ịra zị ẹngụ yọ anka a mẹ mẹ̀ ohinọyị nịnị ene vịdị su. 20Ijehorami vị ana rị ohinọyị ọ mẹ vị ịrayị ohurẹẹwụ tụra ẹẹva, dị ọ mẹ̀ ohinọyị ịrayị ịhịnta. Ẹ yị nyị ọza ana zị ẹngụ yọ o me su. Di e ne e ịnị ẹkụra Idevidi ama ẹ yị vị ịzị eē ne oku ohinọyị nịnị.
Currently Selected:
2 Ịtọpa 21: EBTP
Highlight
Copy
Compare
Share
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
