2 Ịtọpa 11
11
Ẹtẹ ọnị Isemaya re
(1 Ohi 12.21-24)
1Ịjị ọnị Irehobowami ohinọyị na sị ngụ Ijerusarẹmị, dị ọ hị́ ọkọọka isoja ẹnị akawụ-akawụ oze ẹnarẹẹwụ (180,000) hụrẹ ịrẹsụ Ịbẹnjamịnị ọnịrị Ijuda. Ọ nyị isoja ẹnẹnị ka ẹ nọ ịrẹkụ aza ẹnẹẹ agụvị ọnị ọ zụ mẹ̀ ịjọva tụra wa ịrẹsụ nị. 2Ama Ẹnẹyịmavara ộ tụ́ ọnịsẹ Isemaya 3ka ọ kà yị Irehobowami ohinọyị Ijuda ana vị ozi Isoromọnị ọnịrị avaba Anisrẹrị nịnị ene hi Ijuda ọnịrị Ịbẹnjamịnị 4ka asị ẹ kụ́ ịrẹkụ ne tù Ansirẹrị anda ẹnịnị. Ọ kà ọzọza oo nọ eehi anị. Ẹnẹyịmavara kà ịsa ọnị ọnị si ọ mẹ̀ yị. Dị isoja ẹnẹẹ wụ́ chire Ẹnẹyịmavara, dị ẹ yị beri Ijerobowami zyaazị nị.
Irehobowami ộ jị ọvọ kara ẹkụra ene hi ịnị ẹtẹ anị.
5Irehobowami vị ana ya Ijerusarẹmị, dị ọ jị ọvọ kara ẹkụra ene hi ịnị ẹtẹ Ijuda ọnịrị Ịbẹnjamịnị. 6Ẹkụra ọnị ọ jị ọvọ kara ẹ vị, Ịbẹtịrẹhẹmị, Etami, Itekowa, 7Ịbẹtịzuri, Isoko, Adurami, 8Igati, Imaresa, Izihwi 9Adorayimi, Irakisi, Azeeka, 10Izora, Ayijaroni ọnịrị Ihebirọnị. 11Ọvọ ẹkụra ẹnẹẹ vị ana nyayịnẹ dà katẹngụ, dị ọ nyị ohi-ohi isoja ene sere ẹkụra ọzọza nị. Dị ọ kụ ịsọyịrị ọnịrị angwẹ orivi beri eche hi ịnị ẹkụra ẹnẹẹ nị. 12Avọọ ọ mẹ rẹ kụ́ ogonto ọnịrị ọha. Ịsị ẹ mẹ ka ộ za Ịbẹnjamịnị ọnịrị Ijuda ụvọ chire enyi.
Ohirẹsụ irehi Ohomorihi ọnịrị Anireevi nịnị ệ vẹ Ijuda.
13Avaba ohirẹsụ irehi Ohomorihi ọnịrị Anireevi nịnị ệ hụrẹ avaba ẹtẹ Isirẹrị vẹ eyi ụvẹtẹ Ijuda. 14Anireevi nịnị vị ana navọ ẹtẹ aarẹ ọnịrị ogu ẹnịnị dị ẹ vẹ Ijuda ọnịrị Ijerusarẹmị agụvị ka Ijerobowami ọnịrị ezi anị ana dọ ịrẹsụ ẹ̀ yị zẹ ka ẹnịnị ẹ mẹ̀ ụkọrọ anka ohirẹsụ irehi Ẹnẹyịmavara Ohomorihi. 15#1 Ohi 12.31Ijerobowami vị ana a nyị aza ana vị ọnụtụ ori yị ẹngụ ana mẹ̀ ụkọrọ ịnị irehi ori ịzị ẹ yaa hẹkẹ ori ọnịrị arịjẹnụ nịnị beri ịsa ọnị ẹ bẹ̀ ene vene ụnọ. 16Avaba Anisirẹrị nịnị ana sị ayị ọnya aa hẹkẹ Ẹnẹyịmavara ana vị Ohomorihi ẹnịnị ệ saasa Anireevi nịnị nọ Ijerusarẹmị agụvị dị ẹ̀ mẹ̀ ịsọvọ hi Ẹnẹyịmavara ana vị Ohomorihi ohiku ẹnịnị. 17Ịnị ụmẹ ọnọnị Irehobowami ana vị ohinọyị vị ana hama Idevidi ọnịrị Isoromọnị mẹ̀ ịjọva anị. Avọọ dị avaba ẹnị ana kụ̀rà na ịzọọ sị ụvọ pè e, dị ịjọva ẹtẹ Ijuda nyị ụkata huu avọọ nị.
Ovwoovu Irehobowami
18Irehobowami ộ nyị ọnẹẹ aanị ana a hị́ Imanarati ọnị ada anị vị Ijerimoti ozi Idevidi. Ọnyị anị Abiheri vị ozi Eriyabi ana vị aazị Ijeese. 19Ọnịrị ọva anị ệ ma ozi ọnọrụ-ọnọrụ ẹẹta. Ịrẹha ọnya ọ rị Ijeyusi, dị ọsa rị Isemariya, dị ọnọhụta rị Izahamị. 20Irehobowami ộ varẹma nyị ọnẹẹ ọsa ana a hị́ Imaaka ana vị ozi Abịsarọmị. Ezi ẹẹna ẹnị ma ẹ vị Abija, Atayi, Iziza ọnịrị Isheromiti nị. 21Avaba anẹẹ ọnị Irehobamii nyị vị ẹwụrịhịnta, dị onyeehi anị vị ẹbẹẹta nị. Ezi anị anọrụ vị ohurịhịnta, dị ezi anẹẹ anị vị ẹbẹẹta. Ịnị avaba ese anị ọnịrị onyeehi anị ẹnịnị, Imaaka ọ sị ịrẹyị huu nị. 22Ozi Imaaka ana a hị́ Abija o re eyi hụụnị ezi anị ana vọ nị, ọnị ọ nyị ka ọ̀ọ dọ ọnị ịrẹsụ ịhị ọnị òo su nị. 23Avaba ozi anọrụ anị vị ọnị ọ sị udi yị ọzọza tụ ịnị ẹkụra ene hi ịnị ẹtẹ Ijuda ọnịrị Ịbẹnjamịnị. Ộ nyayịnẹ mẹ̀ ogu hi ẹtẹ yị wa, di o si ọnẹẹ yị, ọzọza nị.
Currently Selected:
2 Ịtọpa 11: EBTP
Highlight
Copy
Compare
Share
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
