2 Ịtọpa 12
12
Anijipiti nịnị ệ kụ́ ịrẹkụ ne tu Ijuda
(1 Ohi 14.25-28)
1Irehobowami mẹ raà nyị ahụ hi ẹtẹ anka ohinọyị kẹnẹ ọnịrị aza va hụrẹ ụvọ ọda Ẹnẹyịmavara tịtẹ nị. 2Ịnị ịrayị ana tụ́ ọ ịrayị ọhụhị ọnị ọ́ rị, Ẹnẹyịmavara sị ụya akamawụ anị rị ọ nị. Ịnị ụmẹ ọnọọ Isisaki ana vị ohinọyị kụ́ ịrẹkụ ne tu Ijerusarẹmị. 3Ộ kụ́ isoja anaā tụra ịkẹkẹ ịrẹkụ akahị tụra ịrẹka, dị ẹnị anaā sịị umaata vị akawụ-akawụ oze ẹẹta, dị isoja rụrụ ọnị ọza ẹ yị yẹ za ịrịka ẹẹ saasa a hụrị Ijipiti nị. Isoja ẹnyị vị Aniribiya, dị ẹnyị vị Anisuki, dị ẹnyị vị Anikusi. 4Isisaki ộ rị avaba ẹkụra anaa jị ọvọ kara ene hi ẹtẹ Ijuda huuu na Ijerusarẹmị. 5Â nyị ọnịsẹ ọnyara aanị, ana a hị́ Isemaya, o ne tu Irehobowami ohinọyị Anijuda ọnịrị ọdọvịdị Anịjuda nịnị ana kụ́ ẹngụ gụ Ijerusarẹmị ka ẹnị ẹ zwe yị Isisaki. Isemaya ộ ka yị wa ka Ẹnẹyịmavara ọ tụ́ ọnị hi wa nị. Ẹnẹyịmavara kà agụvị ka ẹnịnị o yi ọnị tịtẹ, ọnị hụrẹ wa ụvọ yị Isisaki nị. 6Ịzẹyịza, dị ohinọyị ọnịrị ọdọvịdị ẹnẹẹ dọ irenu ka ẹnị ệ rị ịvị Ẹnẹyịmavara nị. Ịsa ana vọrọ ọnị Ẹnẹyịmavara aa mẹ̀ nị. 7Ịjị Ẹnẹyịmavara vavọọ re wa dị ọ kà yị Isemaya ka agụvị ka ẹnịnị ệ dọ irenu ịvị ẹnịnị ọnị ẹ yị vaa wụ́ wa. Ama ụmẹ ọnị Isisaki ọ̀ọ gẹ ịrẹkụ tu ẹnịnị, avụrị-avụrị ụ vaa sị ha nịnị nị. Ijerusarẹmị e yi vee re avaba ọyịkụ anị. 8Ama Isisaki vaa nyị ẹbẹẹba ẹnịnị agụvị dị ẹ kọsẹ ịsị ẹ vị irenyi ana ya ịnị ka ọza hẹkẹ ọnị a vị ka ọza hẹkẹ ọzarẹyịrẹsụ ana vị ọdọvịdị. 9#1 Ohi 10.16,17; 2 Ịtọ 9.15,16Ịzẹyịza dị Isisaki vẹ Ijerusarẹmị, dị ộ kụ́ ogu hụrẹ irehi Ohomorihi ọnịrị irehi ohinọyị. Ộ kụ́ avaba ịsavịsavị ne beri ogonto ọnị Isoromọnị ohinọyị sị igooru tụ́. 10Ama Irehobowami ộ varẹma sị enyusẹ tụ́ ọsa ọnị ọ sị yị ọdọvịdị oserẹtẹ nịnị ene sị eyi pe oze irehi ohinọyị. 11Ụmẹ tụra ụmẹ ọnị ohinọyị ọ̀ọ ngụ irehi Ohomorihi, dị oserẹtẹ nịnị sị ọ rị ụvọ, dị ẹ va sị ọ na tụ́ ịzị e yee sere. 12Ka Irehobowami ộ ka ẹngụ chi, dị Ẹnẹyịmavara ẹ̀ yị vavọọ du ayị hi ọ baaba nị. Agụvị avọọ ẹtẹ zoza ịnị ẹtẹ Ijuda.
Irehobowami mẹmẹ mẹ̀ ịjọva anị
(1 Ohi 14.21,29-31)
13Ijerusarẹmị Irehobowami ya mẹ̀ ịjọva anị, dị ọ nyị ụkata banyị hu avọọ. Ịrayị ẹbẹẹva tụra ọnya ọ vị dị ọ rị ohinọyị, dị ọ mẹ̀ ẹ ịrayị ẹwụrịhịmba nị. Ijerusarẹmị ọ vị ẹkụra ịzị Ẹnẹyịmavara nyị ịnị avaba ẹtẹ Anisirẹrị ka aa hẹkẹ ọnị ịzọọ nị. Inaama ana vị ọnyị Irehobowami vị anẹkụra Amọnị. 14Irehobowami ộ mẹ̀ ebira odivi, agụvị ka ẹ yị họ̀ ụsẹ ịsị ẹ vị oyisì Ẹnẹyịmavara. 15Avaba ịsa ọnị ọ mẹ̀ hụrẹ oyinyima na ngụ ọzẹtẹ, ọnịrị ịrẹyị ovwoovu anị vị ana chẹrẹ tụ́ ịnị iwe ịtọpa Isemaya ọnịsẹ ọnịrị Ido ana vị ọnịsẹ. Irehobowami ọnịrị Ijerobowami vị anaa kụ́ ịrẹkụ pooro. 16Irehobowami me su di e ne e ịzị eē ne ohinọyị nịnị tụ́ ịnị ẹkụra Idevidi. Ozi anị Abija ộ rị ohinọyị udi ada anị nị.
Currently Selected:
2 Ịtọpa 12: EBTP
Highlight
Copy
Compare
Share
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
