2 Ịtọpa 10
10
Anisirẹrị nịnị ene hi eyi ẹbẹẹba ệ da ẹngụ nịnị
(1 Ohi 12.1-20)
1Â nyị ọnọrụ ọnyara aanị ana hị́ Irehobowami. Ộ nọ Ịsẹkẹmị ịzị avaba Aneyi ẹbẹẹba Isirẹrị kụ́ ẹngụ gụ ka ẹnị ẹ̀ sị ọ rị ohinọyị. 2Â nyị ọnọrụ ọsa ana aa hị́ Ijerobowami ana vị Inebati. Ộ vịdị zwe na tẹ̀ Ijipiti agụvị Isoromọnị nị. Ọ mẹ wụ́ ịrẹyị ọnọọ, dị ọ vavẹ eehi nị. 3Ịrẹsụ-ịrẹsụ ene hi eyi ẹbẹẹba Isirẹrị ệ tụ́ hị́ ọ, dị ọnịrị wa ne tu Irehobowami nị. Ẹ kà yị Irehobowami ka, 4ada anị vị ana vịdị kune ẹnya ọrata yị ẹnị, ọ̀ọ hẹrẹ ẹnya yị ẹnị, dị ẹhẹ rọ ẹnị ẹngụ, avaba ẹnịnị vaa wụ́ chire e. 5Dị Irehobowami tụ́ wa ohi ka ẹnịnị ẹ sị ẹkụhị ẹẹta tịtẹ yi ọnị dị ọnị o ro tụ́ ọ, dị ẹ̀ vavẹ. Ịzẹyịza, dị ẹ na nị. 6Irehobowami ohinọyị ộ hị́ azọkụ ana vịdị vị anajuwe ada anị Isoromọnị gụ, dị ọ họ̀ wa ka sị ẹ vị ohi ọnị ọnị ọ̀ọ sị yị aza ẹnẹẹ. 7Dị azọkụ ẹnẹẹ ka yị Irehobowami ka ọ̀ọ vayị ẹnịnị, dị ọ sị ohi ana vaa rọ wa ẹngụ yị wa nị, ẹnịnị vị anaā vaa sị ịrẹsụ yọ pooro. 8Ama irehobomi ô si eyi wụ́ ịrẹyị azọkụ ẹnẹẹ, di o ne tu ezwọọmụha ana vị eyi ọpa anị. Dị ahịka ẹnị ẹ kụkụ vị anajuwe anị nị. 9Dị Irehobowami họ̀ wa ka ịsị ọnị ọ́ọ́ mẹ? Ịsị ọnị ọọ ka yị aza ana ka ọnị ọ hẹrẹ ẹnya yị ẹnị aanị kẹ? 10Dị ezwọọmụha ẹnẹẹ sị ohi yọ ka ọ kà yị wa ka, igege oweyi anị ọ bụrụ hụụnị ọtẹ ada anị nị. 11Ẹ kà Irehobowami ọ kà a yị wa ka, ọnị vị ana vaa nyị tụ́ ịnị ẹnya orata ọnị ada anị kune yị wa. Inori ada anị sị tụ́ wa nị, ama ịjapa umaata ọnị vee sii tụ́ wa nị. 12Ịjị ẹkụhị ẹẹta ọnị Irehobowami jị wa sị tù, dị Ijerobowami ọnịrị avaba aza ve tù ọ nị. 13Irehobowami ô si eyi wụ́ ịrẹyị ọnị azọkụ kà, dị aa kà chire aza ẹnẹẹ, 14anka ezwọọmụha mẹ sị ajuwe yọ. Ộ kà a ada anị vị ana kune ẹnya ọrata kẹnẹ tụra wa, ama ọnị vị ana vaa nyị tụ́ ọ. Inori ada anị sị tụ wa nị, ama ịjapa umaata ọnị vee si tụ́ wa nị. 15Irehobowami ohinọyị ô si eyi wụ̀ ịrẹyị aza anị. Ebira ọnị ộ mẹ̀ aanị vị ana sị ịrẹyị ọnị Ẹnẹyịmavara Ohomorihi kà sẹ. Ộ vịdị tụ́ ọnịsẹ Ahija ana vị Anisiro hi Ijerobowami ozi Inebati. 16#2 Ịsa 20.1Ịjị aza re ka ohinọyị ọ yị vaa wụ́ ịrẹyị ẹnịnị, dị ẹ nowu, dị ẹ kà Anisirẹrị ọzọza ó na eehi anị. Ẹ yị nyị ịsị Idevidi ọnịrị ovwoovu anị aa mẹ̀ yị ẹnị. Dị ẹ̀ ka Irehobowami ọnị o re sì eyi aneehi anị. Avọọ dị Anisirẹrị ọzọza aa nọ eehi anị nị, 17dị ahịka aza ana ra ẹtẹ Ijuda kẹnẹ Irehobowami aa mẹ̀ ịjọva tụra wa ịrẹsụ nị. 18Ịrẹma anị, Irehobowami vaa tụ́ Ihadoramị ana vị ọga ọrịhị nịnị hi Anisirẹrị, dị ẹ sị ịrẹta-ịrẹta wụ̀ ọ nị. Ịjị Irehobowami vavọọ re ịsa ana mẹ̀, di o zwe na ngụ ịkẹkẹ ịrẹkụ ana sị ọ na ngụ Ijerusarẹmị nị. 19Hụrẹ ịhị ọnọọ aza ene hi eyi ẹbẹẹba Isirẹrị ẹ ị dọ yị Anovwoovu Idevidi ka ọ vị ohinọyị tụra ẹnị ịrẹsụ nị.
Currently Selected:
2 Ịtọpa 10: EBTP
Highlight
Copy
Compare
Share
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
