Səɓəlari 5

Musa Ka Haruna Akəma Kuthlir Masar

1Aghəla nda antə Musa ka Haruna ku mwari akəma kuthli. Tə da pəla alari, “MTHLAKU na Hyelər Israila pəla, ‘Zhar mjirna ka da təra kamnyar ka da ra hara kucali ar vəngkər səli ali akwa mtaku.’ ”

2Amma kuthli ni pəla, “Wan MTHLAKU nə ri, natə har I ata kələngkər alari, ka zhar mjir Israila ka da təra ni? I asəndə MTHLAKU ni wa, nggədza ma shang I aɗi ata zhar mjir Israila ka da təra wa.”

3Antə Musa ka Haruna pəla, “Hyelər mjir Ibrani an ncantə kərni ala yeru. Antə yeru akwa kiɗə nga kara zhar yeru ka yeru mwa ar vir makər akwa mtaku kamnyar ka yeru ra hamta saɗaka aka MTHLAKU na Hyelər yeru. Ma apani wa tsa ata tsəgəi yeru ka asarayeri na ɗimi wala ka katsakar.”

4Amma kuthlir Masar pəla ala ɗa, “Musa ka Haruna, man kwamər giri ri, tə giri ata famta mji kazhar kəthlərər ɗa ni? Ngka giri shang akwa vəi kəthlərər giri!”

5Kuthli ni ləkəma ka pəla, “Giri akwa wul mjir tsəɗi ni akwa hara hang kulini, antə giri akwa bara ngkatə ɗa hara kəthlər!”

6Tsu vir nda antə kuthli hamta tsawa aka mjir Masar na helma ata kəra mafayeri ka mjir Israila na akwa wul kəthlər abbər, 7“Akəmazi giri aɗi ata jaktə hamta kusar ar dlər həi aka mjir tsa birku kəra wa, zhar giri ɗa ka da ra pakari ka kəra ɗa sur ɗa. 8Wala apani, ka giri pəla ka da səntə hangkur bulak tə mdə thlamta ala ɗa apa na hwatu, giri aɗiya kəmta wala duku wa. Kamnyar da hir harwakur. An su na hara tə da akwa tuwa abbər ka mdə zhar ɗa ka da ra hamta saɗaka aka Hyelər ɗa ni. 9Pu giri ɗa akwa kəthlər na mwavərari na ata ngkatə ɗa ta da apsi thləm aka gariyayeri ar thlandəra.”

10Antə helmayeri ka mji na ata kəra kəthlər ku ləɓəla ka pəla aka mjir Israila abbər, “Kuthli pəla tsa aɗi ata jaktə hamta ala giri kusar ar dlər həi kəra wa. 11Ka giri ra pakari akwa vəi tə giri ata mzhi wutari akwa. Amma ka giri sənda abbər mda aɗi ata kəmta ala giri hangkur bulak tə giri ata tsamtari wa.” 12Antə mji ku titiləmtadzi bamama akwa kuta Masar kamnyar tsaptə kusar ar dlər həi. 13Helmayeri ni ku dzəktə pəla ala ɗa abbər ka da wutə hangkur bulak ar vir pal tsu apatə da ana wuta akwa sakatə mda ana hamta ala ɗa kusar ar dlər həi. 14Tsuwa mda akwa dlaɓu mjir Israila natə helmayeri pungkər ata kəra kəthlər mafakur ni. Da akwa pəla ala ɗa, “Kamnyar mi tə naha ka ashina giri aɗi tsamta jalab hang apatə mda akwa barari akəla giri wa ri?”

Mjir Israila Na Ol'ola Ata Kəra Kəthlər Akwa Tuwa

15Mji ol'olər Israila na ata kəra kəthlər nda ku mwari adzə kuthli ka pəla alari, “Ka barkar nga! Kamnyar mi tə gə hara su ngəni aka mafayeri ar ngə ri? 16Mda aɗi na ala yeru kusar ar dlər həi mai, amma wala apani mda akwa dwalitə yeru ka yeru tsa bulak hang apa na hwatu! Wul laku tə mji dlaɓu yeru akwa bu kula suari aɗi. Tsuwa biku ni thlatə tsu adzə mjir nga.”

17Antə kuthli ni pəla ala ɗa, “Jiri giri harwa! Giri harwa kamta! An su na hara tə giri akwa pəla ka mdə na ala giri laku ka giri ra hamta saɗaka aka MTHLAKU ni. 18Ngka giri akwa vəi kəthlərər giri kulini! Jiri, mda aɗi ata na ala giri kusar ar dlər həi wa, amma dwali ka giri tsamta bulak hang tsu apatə giri ana hara hwatu.” 19Mji ol'olər Israila na ata kəra kəthlər mafakur ni ku nggaɓəla abbər da ku ləkwa makər sakatə mdə pəla ala ɗa abbər dwali ka da tsamta hangkur bulak tsu apa tə da ana tsa tədək viri.

20Sakatə da ku təra kazhar kuthli, antə da wutə Musa ka Haruna akwa səkə ɗa ka da kəɓa. 21Antə da pəla aka Musa ka Haruna abbər, “Ka MTHLAKU wul su tə giri hara ni, ka tsa ɗi giri. Kamnyar giri ku hara tə yeru ndzi mji na ɗimi ata nca kuthli kəga kwakunayeri arni. Su tə giri hara ni ndzi apa giri kətə katsakar akwa tsiya ɗa ka da tsi yeru.”

Musa Ku Hamta Tuwar Ni Aka MTHLAKU

22Antə Musa ku ngka adzə MTHLAKU ka damwa ka pəla, “MTHLAKU, kamnyar mi tə gə psəngkər sha aka mjir ngə ri? Kamnyar mi tə gə thlentə ra azi ri? 23Kamnyar tsu vir tə I mwari adzə kuthli ka gari alari akwa thləma ga, antə tsa baɗitə hamta bwani aka mjir nga. Tsuwa ga aɗi hara su wala raka kamnyar msərantə mjir ngə wa!”

Currently Selected:

Səɓəlari 5: KNB

Highlight

Copy

Compare