Səɓəlari 6
6
1Antə MTHLAKU pəla aka Musa, “Kulini ga ata wutə su tə I ata hara aka kuthli. I ata vu ni dwali ka tsa zhar mjirna ka da təra. Kula nuhum, I ata kəthlər ka duni kəi vu ni dwali ka tsa kədləɓəla ɗa kazhar tsəɗiyirni.”
Hyel Ku Jaktə Kəga Musa
2Hyel ku jaktə gari aka Musa ka pəla,
“I an MTHLAKU.
3Aka Ibrahim, ka Ishaku, ka Yakub,
I ku ncantə kərna Hyel na ka duna ta shang.
Amma karapur thləmi MTHLAKU ni,
I aɗi hara tə da səndə wa.
4I ku hara alkawal ala ɗa tsuwa abbər I ata hamta ala ɗa tsəɗi Kanana, tsəɗi tə da ku ndzi mətəpi akwa. 5Kulini I ku nggatə nggyinggyir mjir Israila, mji tə mjir Masar namtə ɗa ka mafa. Tsuwa I ku ɗangtə alkawalərna. 6Antə kara pəla aka mjir Israila abbər, ‘I an MTHLAKU. Antə I ata fwaɓəla giri akwa bwani tə mjir Masar akwa hara ala giri, kəi msərantə giri akwa mafakur tə giri akwa harari ala ɗa. I ata pəli giri atar surndatayeri na ol'ola kəi thlamta shariya na mwavər ata kəra ɗa. 7I ata namtə giri ka giri ndzi mjirna, antə I ata ndzi Hyelər giri. Antə giri ata sənda abbər I an MTHLAKU na Hyelər giri na msərantə giri akwa mafakur akira mjir Masar. 8Antə I ata səntə giri akwa tsəɗi tə I kətə alkawal abbər I ata hamta aka Ibrahim, aka Ishaku ka aka Yakub. I ata na giri tsəɗi ni ka tsa ndzi ar giri ka mnya giri. I an MTHLAKU.’ ” 9Antə Musa ku pəla ndər ngəni aka mjir Israila, amma da aɗi psi thləm alari wa, kamnyar dza ɗa ku mti ka duna ata kəra mwavərkur mafakur tə da akwa.
10Aghəla nda antə MTHLAKU pəla aka Musa, 11“Mwari kara pəla aka kuthlir Masar abbər ka tsa zhar mjir Israila ka da ləɓəla kazhar tsəɗiyirni.”
12Amma Musa shinau aka MTHLAKU abbər, “Wula, təng tə mjir Israila aɗi psi thləm ali wa, apa madi tə kuthli an ata psi thləm ali ri, I natə mnyi ana pəlaɓəla su wa?”
13Antə MTHLAKU gari aka Musa ka Haruna, ka tsawa ala ɗa abbər, “Ngka giri adzə mjir Israila ka kuthlir Masar, ka giri pəla ala ɗa abbər I ku na giri laku, ka giri fwaɓəla mjir Israila kazhar tsəɗi Masar.”
Nggilanga Kutakəyir Musa Ka Haruna
14Nayeri ni an mji na ol'olər kutakəyayeri na akwa nyarmbwar Israila.
Maɗashilər Ruben na yarakəma Israila, da an
Hanok, ka Pallu, ka Hezron, ka Karmi.
Da an nyarmbwar Ruben.
15Maɗashilər Simeyon an
Yemuwel, ka Yamin, ka Ohad, ka Yakin, ka Zohar, ka Shawulu natə ngkwar Kanana an ya ni,
Da an nyarmbwar Simeyon.
16Nayeri ni an thləma maɗashilər Lawi ata ola ata ola. Da an Gershon, ka Kohath, ka Merari. Lawi ku hara məva aru pal ka makkumari ka murfa akwa ndzəndziyir mpikari.
17Maɗashilər Gershon an
Libni, ka Shimeyi na yangkura ɗa.
18Maɗashilər Kohath an,
Amram, ka Izhar, ka Hebron, ka Uzziyel. Antə Kohath ku hara məva aru pal ka makkumari ka makər akwa ndzəndziyir mpikari.
19Maɗashilər Merari an
Mahli, ka Mushi.
Da an nyarmbwar Lawi akwa zamanayeri arɗa. 20Amram ku kəl Yokebed na ngkwarma' baba'ni, antə tsa ku yaɓəla alari Haruna ka Musa. Amram ku hara məva aru pal ka makkumari ka murfa akwa ndzəndziyir mpikari.
21Maɗashilər Izhar an
Kora, ka Nefeg, ka Zikri.
22Maɗashilər Uzziyel an
Mishayel, ka Elzafan ka Sithri.
23Haruna ku kəl Elisheba na ngkwar Amminadab tsuwa ngkwarma' Nashon. Antə tsa ku yaɓəla alari Nadab, ka Abihu, ka Eleyazar, ka Ithlamar.
24Maɗashilər Kora an
Assir, ka Elkana, ka Abiyasaf.
Da an nyarmbwar Kora.
25Eleyazar na ɓzər Haruna ku kəl pal akwa nca maɗankwiyir Putiyel. Antə tsa ku yaɓəla alari Finehas.
Da an mji ol'ola na akwa nyarmbwar Lawi waskəi ka kutakəyirni.
26Nayeri ni an Haruna ka Musa natə MTHLAKU ku gari ka da abbər, “Ka giri fwaɓəla mjir Israila akwa Masar atar nyarmbwa ata nyarmbwa.” 27Da an mji na gari aka kuthlir Masar kamnyar ka tsa psi mjir Israila ka da ləɓəla kazhar Masar.
Zwarəngkər Ar Kəgar Musa
28Sakatə MTHLAKU gari aka Musa, 29akwa tsəɗi Masar tsa pəla, “I an MTHLAKU. Ka gə pəla aka kuthlir Masar shanga su tə I pəla ala ga.”
30Amma Musa pəla aka MTHLAKU abbər, “Ai mnyi ana mzhi pəlaɓəla su wa. Antə apa madi tə har kuthli ni ata sə psi thləm ali ri?”
Currently Selected:
Səɓəlari 6: KNB
Highlight
Copy
Compare
Share
Want to have your highlights saved across all your devices? Sign up or sign in
KAKAƊU NA ƁƊAKKARKARA © Typeset by the CAP Division of the Bible Society of Nigeria, 2014.
