Səɓəlari 4

Hyel Ku Hamta Dunar Hara Sur Ndata Aka Musa.

1Antə Musa shinau aka MTHLAKU abbər, “To amma ma da aɗi mbərsa ka iya wa, wala psi thləm ali wa. Ma da pəla gə na MTHLAKU aɗi ncantə kər nga ali jiri wa! Man su tə kəi hara ri?”

2Antə MTHLAKU pəla alari, “Man akwa tsiya gə nə ri?”

Antə tsa pəla, “Zwalər ɓəla.”

3Antə MTHLAKU pəla, “Psəmta ata di.”

Antə sakatə tsa psəmta zwal ni ata di, təng zwal ni shin ka pwapu. Antə Musa thlivər ka fəla ka hwi kazhari. 4Amma MTHLAKU pəla aka Musa, “Ha tsiya ga, kara kətə ni təbwar kurari.” Antə tsa ku ha tsiyari ka tamtə pwapu ni, antə pwapu ni ku jaktə shin ka zwalər ɓəla akwa tsiyari. 5Antə MTHLAKU pəla, “Ngəni an seɗa na ata vu ka mjir Israila ni mbərsa abbər MTHLAKU na Hyelər kəkayeri arɗa, watau na Hyelər Ibrahim, Hyelər Ishaku, ka Hyelər Yakub, ku ncantə kərni ala ga.”

6Antə MTHLAKU jaktə pəla aka Musa, “Hau tsiya ga akwa ləptər nga.” Antə tsa ku hau tsiyari akwa ləptərni. Sakatə tsa kəɓəla tsiyari ni təng tsiyari ku hartədzi ka shilkər kəsəm, ka ndzi mwapu shalaku apa mpur puwa. 7Antə MTHLAKU jaktə pəla alari, “Jaktə hau tsiya ga akwa ləptər nga.” Antə Musa ku jaktə hau tsiyari akwa ləptərni. Amma sakatə tsa kəɓəla tsiya ri, təng tsiyari jaktə ngka lapiya tsu apa bwadukwa dzari. 8Antə MTHLAKU pəla, “Ma da aɗi ata hamta jiri ala gə wa, wala mbərsa ka seɗa na ntangkəma ni wa, nuhum da ambərsa ka seɗa na suɗkur ni. 9Ma har da aɗi mbərsa ka surndatayeri na suɗə ni wa, wala da aɗi psi thləm ala gə wa, ka gə kətsə yimi akwa Thlyagha Nayil ka gə pumta ata di ul'ula. Antə yimi ni ata shin ka mamshi ata di na ul'ula ni.”

10Amma Musa pəla aka MTHLAKU, “Aiyi MTHLAKU, diya arna mnyi ana pəlaɓəla su mai. I aɗi ɗar ndzi masəkur gari wa, antə har ba kulini I aɗi masəku wa, wala kulini tə ga akwa gari ali ni. Kyanggyari kəgəɓu antə mnyi ana pəlaɓəla su taktar wa.”

11Antə MTHLAKU pəla alari, “Wan namtə mnya mdə nə ri? Wan hara tə mnya mdə ndzi dləɓdləɓari wala twangtwang ri? Wan hamta dunar wutə su aka mda, wala mdlyangkur ri? Aɗi I na MTHLAKU an hara wa ya? 12Antə kulini mwari, I ata dlar nga akwa su tə ga ata pəlari.”

13Amma Musa pəla, “Aiyi MTHLAKU, thlentə mdə damwa bu.”

14Antə ɗəffa MTHLAKU ku ɓzi ka duna ata kəra Musa kamnyar gariyirni ni, antə tsa pəla, “To daci, Haruna na mdər Lawi ni aɗi ɓzərma' ngə wa ya? I ku sənda abbər tsa asəndə gari ɓɗaku. Ndaga ni ma akwa si ka giri kəɓa. Antə ma tsa ku wutə nga, ɗəffari ata ndzi msəra alari. 15Ga ata mzhi gari alari, ka gə pəla alari su tə ka tsa pəla. I ata dlar giri japu akwa gari, kəi thlipta ala giri su tə ka giri hara. 16Haruna ata gari ata vəya ga aka mji. Tsa ata ndzi ala ga apa mnya ga, antə ar nga ga ata ndzi apa Hyel alari. 17Ka gə mbərsa abbər ga ku kətə zwal ngəni, ka mwari kəgari. Kamnyar ka tsa antə ga ata hara seɗayeri ar ndatə mdə ni.”

Musa Ku Ngka Ahar Masar

18Antə Musa ku ngka adzə kəsayirni Yethro, ka pəla alari, “I akwa bara abbər ma ahara ka gə ni laku kəi ngka adzə mjir yeru akwa Masar, nuhum I awutə ɗa tsu ka mpika.”

Antə Yethro pəla, “Mwari, tsuwa ka Hyel mwantə nga lapiya.”

19Akəma ta Musa amwari adzə Yethro ni, MTHLAKU ku kurtə pəla alari ahar Midiyan ni abbər, “Ka gə ngka ahar Masar, kamnyar shanga mji na akwa bara tsi ngə ni ku mti.” 20Antə Musa ku kətə mwalankiɗa kəga maɗashilərni, ka putə ɗa ata kwara, ka ngka ahar Masar ka zwal tə Hyel pəla ka tsa kətə ni akwa tsiyari.

21Tsuwa MTHLAKU jaktə pəla aka Musa abbər, “Ma sakatə ga ku ngka akwa Masar, ka gə wuta abbər ga ku mwari akəma kuthli Masar, ka haratə shanga surndatayeri tə I na gə dunar harari akəmari. Amma I ata vu ka tsa ndzi ka kər ɓəɓalkur, tə tsa aɗi ata hir ka mjirna ni təra wa. 22Ka gə pəla aka kuthli ni abbər, ‘MTHLAKU akwa pəla, Israila an yarakəmarna na ɓzər sal. 23Antə I akwa pəla ala gə ka gə zhar ɓzərna ka tsa təra, kamnyar ka tsa ra vəngkər səli ali. Amma təng tə ga ku nggəlari, I ata tsi ɓzər sal ar nga na yarakəma.’ ”

Ɗəffa Hyel Ku Ɓzi Adzə Musa Ata Lakur Masar

24Sakatə Musa ka mjir kutakəyirni akwa lakur ngka ahar Masar, antə MTHLAKU ku kəɓa ka tsa akwa vəi tə da fəli ata ka bara tsi ni. 25Amma Zippora na mwalankiɗa ku kətə pela handzəkəla ka thlamta zəmbuləma ɓzərni, ka tsəkwar səlari kəgari, ka pəla, “Jiri, atar mamshi ngəni pumtadzi kulini ga ku ndzi yangkuri abwar kəldzi.” 26Apani MTHLAKU ku zhar ni. Antə mwala ni pəla, “Ga an sala mwala natə mdə ku dlu ka tsi suɗa atar mamshir kaciya.”

Mdə Ku Thlentə Haruna Ka Da Kəɓa Ka Musa

27Antə MTHLAKU pəla aka Haruna abbər, “Mwari ra thlakəma Musa akwa mtaku.” Antə Haruna ku təra mwari ka kəɓa ka Musa akwa gar ar Hyel, ka thlawar ni ka hau tsi ka tsa. 28Antə Musa pəla aka Haruna shanga su tə MTHLAKU pəla ka tsa ra pəlari ahar Masar, ka shanga seɗayeri ar ndatə mda tə Hyel tsawa abbər ka tsa ra haratari. 29Antə Musa ka Haruna ku təra ka mwari ahar Masar ka tsaptə shanga mji ol'olər Israila. 30Antə Haruna pəla aka mji ol'olər Israila shanga suayeri tə MTHLAKU pəla aka Musa. Tsuwa Musa ku haratə seɗayeri ar ndatə mda ata nca ɗa. 31Antə mjir ol'ol ni ku hamta jiri. Tsuwa sakatə mji ni nggata abbər MTHLAKU ku wutə bwani tə da akwa, ka damitədzi ata kəra ɗa, antə da zuzuri ka vəngkər səli aka Hyel.

Currently Selected:

Səɓəlari 4: KNB

Highlight

Copy

Compare