तोलिङ्सोमु 49
49
याबुबरे़ कुनुप्मा कुबाःन्छेःक्वाहाॽ
1खे़ब्याङ् याकुबरे़ कुस्साहाॽ उःत्तुसिआङ् मे़त्तुसि, “खिनिॽ कॽयो चुप्से़म्मे़ॽ, हे़क्क्याङ् ताःन्दि खिनिॽ थेधे के़दुमुम् खे़न् आङ्गाॽ मे़त्निङ्लो॥
2“याकुबरे़ कुस्सासे, चुप्से़म्मे़ॽआङ् खे़प्से़म्मे़ॽओ,
खिनिॽ पा इस्राइलरे़ पाःत्तुबा पाःन्निन् खे़प्से़म्मे़ॽओ॥
3“रुबे़न्ने, खे़ने़ॽ आङ्गाॽ तुम्बा आस्साने़रो,
आमुक्साम् नु आसाॽइरे़ तगिबा आस्साने़रो,
मिमिदिङ् नु मुक्साम्मो के़रे़क्नुःल्ले़ के़ये़ःक्पाने़रो॥
4च्वाःत् हे़क्तङ्बा खे़ने़ॽ के़ले़ःङ्बाआङ् के़वाॽबाने़रो,
के़मिङ्सो के़धाङ्सोरे़ के़न्दक्ने़ल्लो,
थेआङ्भे़ल्ले़ खे़ने़ॽ के़म्बारे़ कुइप्नाओ के़लासे़,
हे़क्क्याङ् खुने़ॽ कुमेःत्ते़न्नु के़इप्से़, हे़क्क्याङ् खे़न् आसुत्थो के़जोगुरो॥
5“सिमियोन नु ले़बिन् कुम्भुॽ कुन्साॽसिरो,
खे़ङ्हाॽरे़ खुन्छिॽ ताभेःन्ने हयङ्ते़न्धङ् के़जोःक्पारो,
6आङ्गाॽ खे़ङ्हाॽरे़ खुन्छिॽ चुम्लुङ्ङो मे़दाआन्लो,
आङ्गाॽ खे़ङ्हाॽनु वाॽमा मे़बोङ्ने़ल्लरो,
थेआङ्भे़ल्ले़ खे़ङ्हाॽरे़ खुन्छिॽ सिक् पोगे़ल्ले़
मनाहाॽ से़रे़त्छुसिआङ् वाॽरो,
खे़ङ्हाॽरे़ खुन्छिॽ सिराॽथाङ्धाङ् पित्हाॽरे़ खुन्छिॽ
लाङ्साॽइ हे़गे़छु पिरे़त्छुसिआङ् वाॽरो॥
7खे़ङ्हाॽरे़ खुन्छिॽ सिक्पोःक्मो साङ्ग्राःल्ले़ ते़त्तुसिररो,
थेआङ्भे़ल्ले़ खे़न् किप्मा के़घुबा चोक्लो,
खे़ङ्हाॽरे़ खुन्छिॽ साक्के़न् चम्मो,
थेआङ्भे़ल्ले़ खे़ङ्हाॽ सिक्तोःक्ना चोःक्सिरो॥
खे़ङ्हाॽ आङ्गाॽ याकुबरे़ओ से़सुङ्देसुसिङ्ॽ,
हे़क्क्याङ् इस्राइलओ खे़ङ्हाॽ फुत्छिङ्छ्याःङ् से़सुसिङ्ॽ॥
8“यहुदाए, के़म्भुॽ के़न्साॽसिरे़ खे़ने़ॽ के़नारा मे़भोसुरो,
के़हुक्किल्ले़ के़निङ्मिहाॽरे़ खुन्छिॽ सित्ला यॽरुरो,
खे़ने़ॽ के़म्बारे़ कुस्साहाॽ खे़ने़ॽ के़दगि साम्बोन् हबत् मे़बत्लो॥
9यहुदान् थे़रिङ्बे़ल्ले़ कुस्सारो, #खानिःत् २४:९; सुफो ५:५
आस्साए, खे़ने़ॽ सा के़नाःत्तुआङ् के़नुःक्खे़ के़दे़आङ् के़वाॽरो,
थे़रिङ्बे़न् हे़क्के खे़न् थिङ्सिङ्ङाङ् ने़रो,
थे़रिङ्मे़न् हे़क्के हाःत्ले़ खे़न् फोङ्मा कोःत्तुबे?
10यहुदाःल्ले़ कुहुक्कोलाम् हाङ्तक्काःत्तिन् मे़ले़त्ने़ल्लो,
कुन्दाङ्बे़न् मे़न्दाए थारिक् हाङ्जुम्मो ओगप् के़बोङ्बा
तक्काःत्तिन् कुलाङ्भिःप्मोलाम् मे़जत्ने़ल्लो॥
हे़क्क्याङ् मे़न्छाम् सुवाङ्हाॽ खुने़ॽ
मे़त्तुसिबा पाःन्निन् खे़म्मा के़दे़म्बा मे़बोङ्लो॥
11खे़ल्ले़ कुअदङ्ङिन् चे़ल्ले़क्सेल्ले़ कुबुङ्ङो नु
कुअदङ्साःत्तिन् नुबा परिक्ले़न्
चे़ल्ले़क्सेल्ले़ कुबोराक्को इघेःक्खुरो॥
खे़ल्ले़ कुजाङ्हाॽ चे़ल्ले़क्सेॽ थिओ,
खुने़ॽ चे़ल्ले़क्सेल्ले़ कुवाओ कुदेःत्हाॽ वाहप्तुरो॥
12खे़ल्ले़ कुमिक्किन् चे़ल्ले़क्सेॽ थिःन्नुःल्ले़आङ् हे़ःत्ताङ्बा,
हे़क्क्याङ् कुहाबोन् पित्नुनुःल्ले़आङ् फदाङ्बा पोङ्लो॥
13“जबुलुनरे़ कुयाङ्धोःक्मा ते़न् वरःङ्ङिल्ले़ कुयान् पोङ्लो,
वालाधाहाॽरे़ लागि खे़न् वालाधाखेःङ् पोङ्लो,
हे़क्क्याङ् खे़ल्ले़ कुइःन्दोन् सिदोन थारिक् पोङ्लो॥
14“इस्साकारे़न् ने़त्छि कक्हाॽरे़ कुलुम्मो
के़ने़बा के़धुम्बा अदङ्लो॥
15खुने़ॽ कुनाःम्सिङ्मा ते़न्निन् नुबा चोक्
हे़क्क्याङ् खुने़ॽ कुलाजेन् सिक्के़सम्बा चोक् के़लॽबान् निसुआङ्,
खे़ल्ले़ कक् कुमारे़ लागि कुभक्ताङ्ङिन् सोरो मे़त्तुरो,
हे़क्क्याङ् से़वारोबा याःम्बक् चोःक्मा ते़न्लो॥
16दाने़न् इस्राइलबा थाःक्हाॽओबा लत्छा पोङ्ङाङ्
खुने़ॽ कुमनाहाॽरे़ लागि खासे़न् चोगुरो॥
17दाने़न्ग लाम्मो के़ने़बा अस्सेःक्लो,
हे़क्क्याङ् चुःक्पा लाम्मो के़ने़बा कुनिङ् के़याक्पा अस्सेःक्लो,
खे़ल्ले़ अन्ने़ल्ले़ कुलाङ्गाक्थिःम्बे़न् अगुरो,
हे़क्क्याङ् अन् के़युक्पे़न् खे़ल्ले़ कुएगाङ् ले़प्साङ् ले़ङ्लो॥
18“यहवे दाङ्बे,
खे़ने़ॽ के़दाङ्गे़से़ःप्मान् हाङ्सुङ्ल युङ्ए़रो॥
19“गादे़न् लत्छा मना लुप्ले़ फप्माग मे़भत्तुॽ,
कर खे़ल्ले़ने खे़ङ्हाॽ नाःत्तुसिर फत्तुसिॽ॥
20“आसेरे़ल्ले़ फत्छुबा कुजान् नुबा पोङ्लो,
खे़ल्ले़ हाङ्हाॽरे़ खुनिॽ लागि चामा कुजा पिरुसिर॥
21“नप्तालिन् ले़प्मनाबा पे़ःङ्वाॽ मारो,
खे़ल्ले़ नुःब्नुबा पे़ःङ्वासाःत् थाप्तुसिरो॥
22“युसुफे़न् कुजाॽ इस्सेःङ्बा इवाःत्लो,
वबुन्दाक्किल्ले़ कुबेसाङ्बा कुजाॽ के़बप्पा कुइवाःत्लो,
खे़ल्ले़ कुबोराक्हाॽ लुङ्धाक् चङ् हे़ॽयो ताप्पेःक्लो॥
23तोङ् लि के़याङ्बाहाॽरे़ खे़न् साॽरिक् तुक्खे मे़जाःत्तुरो,
खे़न् तोःङ्ङिल्ले़ मे़आबु, हे़क्क्याङ् खे़न् मे़नाःत्तु॥
24हे़क्केसाङ् खे़ल्ले़ कुलिन् के़जाॽबाए चोगे़रो,
हे़क्क्याङ् कुहुक्हाॽ के़धुम्बाए पोःक्खे़रो,
याकुबरे़ मुक्साम्साबे़ल्ले़ कुहुक्किल्ले़ चोगुल्ले़,
इस्राइलबा याक्पेॽ, मे़ल्लुक् कम्बाल्ले़ चोगुल्ले़,
25इग्र खे़ने़ॽ के़भाॽबाङ् के़म्बारे़ कुनिङ्वाॽफुमाङ्, खुने़ॽ के़भाॽरो,
मुक्साम्दाङ्बा निङ्वाॽफुमाङ्, खुने़ॽ खे़ने़ॽ हाङ्वा मुॽइसाम् के़बिरो—
थो साङ्ग्राम्पेदाङ्बा हाङ्वा मुॽइसाम्हाॽ,
कुदिम्बे केःम्बा वबुन्हाॽओबा हाङ्वा मुॽइसाम्हाॽ,
हे़क्क्याङ् साप्पोःक्कोबा हाङ्वा मुॽइसाम्हाॽ॥
26के़म्बारे़ कुहाङ्वा मुॽइसाम्हाॽ उन्छेःन्बा थे़गु माङ्वाहाॽओबा हाङ्वा मुॽइसाम्हाॽनुःल्ले़आङ्
हे़क्क्याङ् सदादिङ् के़ने़बा कोःक्माहाॽओबा
हाङ्वा मुॽइसाम्हाॽनुःल्ले़आङ् मुक्साम्बा चोक्लो॥
खे़न् के़रे़क् मुॽइसाम्हाॽ युसुफरे़ कुधे़गेःक्को चुक्लरो,
कुम्भुॽ कुन्साॽहाॽओ लाम्लोबा के़बोङ्बा युसुफरे़ कुद्वाबो थाररो॥
27“बेन्जामिने़न्ग लत्छा सा के़नाःप्पा के़जाबा पराबारो,
तानाम् खे़ल्ले़ तारुबा सान् चरो,
हे़क्क्याङ् युःन्छिक् खे़ल्ले़ खुःत्तुबान् हासुरो॥”
28कङ्हाॽ के़रे़क् इस्राइलबा थिबोङ्ङाङ् ने़त्छि थाःक्सिरो॥ खुन्छिॽ पाःल्ले़ हाङ्वा मुॽइसाम् पिरुसिबा पाःन्हाॽ हाबा कल्लो॥ खुने़ॽ के़रे़क् लाॽरुसिबा हाङ्वा मुॽइसाम् पिरुसिरो॥
याकुबे़न् मासिङ्ॽ
29खे़ब्याङ् याकुबरे़ खे़ङ्हाॽ कन् इङ्जाङ्ङिन् पिरुसि, “आङ्गाॽग सिमा चोःक्काआङ् आमनाहाॽओ पेःक्मा इःत्ताङ्लो॥ हित्ति एप्रोने़ल्ले़ कुब्याङ्सिओबा फुक्कुओ आसुधे़बा आदाक्थे़बाहाॽनु याप्मि आलुप्ते़ॽओ॥ 30इग्र कनान लाजेॽबा मम्रेःल्ले़ कुबेसाङ्बा मक्पेलाबा प्याङ्सिओ के़ने़बा फुक्कुओ, खे़न् अब्राहाम्ले़ हित्ति एप्रोनलाम्बा प्याङ्सिःन्नुए इपुङ् चोःक्मारे़ लागि इङुआङ् वये़॥ #तोलिङ् २३:३-२० 31खे़प्मोए खे़ङ्हाॽरे़ अब्राहाम नु कुमेत् सारान् मे़लुप्तुसिआङ् ने़स्से़॥ हे़क्क्याङ् खे़प्मोए खे़ङ्हाॽरे़ इसहाक्के़न् नु रिबेकान्नाङ् मे़लुप्तुसिआङ् ने़स्से़॥ खे़प्मोए आङ्गाॽ लिआःन् लुप्तुङ्॥#तोलिङ् २५:९-१०, ३५:२९ 32खे़न् प्याङ्सिन् नु खे़प्मो के़ने़बा फुक्कुन् हित्तिहाॽलाम्बा इङ्मनाबारो॥”
33कुस्साहाॽ कन् इङ्जाङ्ङिन् पिरु सुरुसिआङ् याकुबरे़ कुलाङ्ङिन् ने़त्नाओ सन्छुआङ् कुसक्मा पे, हे़क्क्याङ् कुसुधे़बा कुदाक्थे़बाहाॽनु तङ्से़ पेरो॥ #सेःक्युक् ७:१५
Currently Selected:
तोलिङ्सोमु 49: LIF
Highlight
Share
Compare
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.
