तोलिङ्सोमु 50
50
1युसुफे़न् कुम्बारे़ कुसम्धाङ् साम्बोन् फन्छिङ्ङाङ् हाबे़, हे़क्क्याङ् खुने़ॽ चुप् मे़त्तु॥ 2खे़ब्याङ् युसुफरे़ खुने़ॽ कुसे़वा के़जोःक्पा सिदाॽसाम्बाहाॽ कुम्बारे़ कुधक्को कुनाम्गे़नुॽबा निःङ्गेॽ हुःप्पाङ्घुसि॥ खे़ल्ले़चोगुल्ले़ याकुबरे़ कुजेओ कुनाम्गे़नुॽबा निःङ्गेॽ मे़हुःत्तु॥ 3अक्खे चोःक्मारे़ लागि लिबोङ् ये़न् थारिक् चोःक्मा के़बोङ्बा वये़॥ खुने़ॽ कुलागि मिस्रिहाॽआङ् नुबोङ् ये़न् थारिक् मे़रिङ् मे़धक्ते़॥
4खुने़ॽ कुलागि मे़रिङ् थक्मा ये़म् चुरे़आङ् युसुफे़न् फारोल्ले़ कुसुहाङ्युक्पाहाॽनु अक्खेलॽरिक् हे़ना मये़, “खे़निॽ लुङ्मा आगे़दुक्तिने़फग्र कन् आबाःन्निन् फारोःल्लो तेॽरे़ आबिरे़ॽओ॥ 5आम्बारे़ अक्खे पाःत्तुर खुने़ॽनु माङ्हे़क्सिङ्मा पाङ्घाङ्, ‘आङ्गाॽ सिमा इःत्ताङ्ङाङ् वाॽआरो॥ कनान लाजेॽओ आङ्गाॽ आबाङे तयुङ्ङाङ् के़ने़बा आइपुङ्ङो आङ्गाॽ लुप्ताङ्ङे़ॽओ॥’ आङ्गाॽ पेःक्मा आभाःक्ते़ॽ हे़क्क्याङ् आम्बा खे़प्मो लुप्तुङ्धाङ् खे़ब्याङ् नुःङ्ङा फे़न्नारो॥” #तोलिङ् ४७:२९-३१
6फारोल्ले़ नोगप् पिरु, “खे़ने़ॽ माङ्हे़क्सिङ्मा के़बाङ्घे़बा इसिःक् पेगे़ॽआङ् के़म्बा लुप्ते़ॽ॥”
7खे़ल्ले़चोगुल्ले़ कुम्बा लुप्से़ युसुफे़न् पेगे़॥ खुने़ॽनु फारोल्ले़ के़रे़क् कुसुहाङ्गे़म्बाहाॽ, खुने़ॽ कुसुहाङ्युक्पाहाॽ हे़क्क्याङ् मिस्रबा के़रे़क् के़ये़क्पा यम्बा मनाहाॽ, 8हे़क्केलॽरिक्के युसुफरे़ के़रे़क् कुहिम्सयङ्हाॽ, खुने़ॽ कुम्भुॽ कुन्साॽसि हे़क्क्याङ् कुम्बारे़ कुहिम्सयङ् के़रे़क् मे़बे॥ खे़ङ्हाॽरे़ खुन्छिॽ अङे़ःक्वासाहाॽ, खे़ङ्हाॽरे़ खुन्छिॽ पित् मे़ःन्दाक् लुप्हाॽरक् गोसेन्नो मे़ले़रु मे़धसि॥ 9खुन्छिॽनु अन्लाधाहाॽ नु अन् के़युक्पाहाॽआङ् मे़बे॥ खे़न् चे सासे़ के़बेःक्पा लत्छा यम्बा मनालुप् मे़वये़॥
10खे़ङ्हाॽ यर्दन वहःङ्ङिल्ले़ कुयाओबा आतादरे़ कुघाःल्लाओ मे़गे़रे़ल्ले़, खे़ङ्हाॽ खुन्छिॽ निङ्वाॽ तुगे़आङ् यम्बा इक्लाओ मे़रिङ् मे़धक्ते़र मे़हाबे़॥ हे़क्क्याङ् खे़ॽयो युसुफे़न् कुम्बारे़ कुलागि नुसि ये़न् थारिक् मे़रिङ् थक्ते़॥ 11खे़न् लाजेॽओ के़युङ्बा कनानिहाॽरे़ आतादरे़ कुघाःल्लाओ मे़रिङ् मे़धक्ते़बा मे़निसुआङ् मे़बाःत्तु, “कङ्ग मिस्रिहाॽरे़ खुन्छिॽ यम्बा मे़रिङ्रछ॥” खे़ल्ले़चोगुल्ले़ यर्दने़ल्ले़ कुयाओबा खे़न् ते़न्निल्ले़ कुमिङ् हाबिल-मिस्रइम#५०:११ हाबिल-मिस्रइम—कन् मिङ्ङे़ल्ले़ कुबेन् हिब्रुओ “मिस्रबा मनाहाॽ मे़रिङ् मे़धक्पा” हे़क्के खे़म्दे़त्॥ मे़युक्खु॥
12अक्खेलॽरिक् याकुबरे़ मे़त्तुसिबा हे़क्केए कुस्साहाॽरे़ मे़जोगु॥ 13खुने़ॽ कुस्साहाॽरे़ खुने़ॽ कनान थारिक्के मे़देॽरु, हे़क्क्याङ् हित्ति ए़प्रोने़ल्लोलाम् अब्राहाम्मे़ल्ले़ इपुङ् चोःक्मा फाॽआङ् इङुबा फुक्कुन्, हे़क्क्याङ् मम्रेःल्ले़ कुबेसाङ्बा मक्पेलाबा प्याङ्सिओ के़ने़बा फुक्कुओ खुने़ॽ मे़लुप्तु॥ #सेःक्युक् ७:१६ 14कुम्बा लुप्तु सुरुआङ् कुम्भुॽसि हे़क्क्याङ् कुम्बा कुलुप्से़ के़बेःक्पा के़रे़क्नु सोरिक् युसुफे़न् मिस्र नुःक्खे़॥
युसुफरे़ कुम्भुॽ कुन्साहाॽ हाङ्हाङ् मे़त्तुसिॽ
15खुन्छिॽ पान् मासिङ्बा मे़निसुआङ् युसुफरे़ कुम्भुॽसि अक्खे मे़मे़त्छिङ्, “आल्ल युसुफरे़ आनिॽनु निङ्मि चोगुइरो हे़क्क्याङ् खुने़ॽ कुदक्ले़ङ्वाओ आनिॽ आजोगुम्बा ताप्फे़ःम्बा याःम्बक्किल्ले़ कुले़क्वा हुङुइरो॥” 16खे़ल्ले़चोगुल्ले़ खे़ङ्हाॽरे़ अक्खे मे़मे़त्तुआङ् इङ्घङ् मे़हाक्तु, “सिमानुःल्ले़ तगि के़म्बारे़ अक्खेदङ्बा इङ्जाङ् पिरिगे़आङ् वये़, 17‘खिनिॽ युसुफे़न् मे़त्ते़म्मे़ॽ, के़म्भुॽसिरे़ खे़ने़ॽओ मे़जोगुबा लायोन् नु ताप्फे़ःल्लिक् के़म्मे़त्ते़बान् ले़प्मि पिरे़से़ॽओ॥’ आल्ल पेलि फाक्कासिगे़रो, खे़ने़ॽ के़म्बारे़ कुनिङ्वाॽफुमाङ्ङिल्ले़ कुसे़वारोबाहाॽरे़ खुन्छिॽ लायोन् ले़प्मि आबिरे़ॽओ॥” खे़ङ्हाॽरे़ अक्खेदङ्बा खुन्छिॽ पाःन्निन् खे़प्सुआङ् युसुफे़न् हाबे़॥
18खुने़ॽ कुम्भुहाॽआङ् मे़भे़रे़आङ् खुने़ॽ कुदगि साम्बोन् मे़भन्छिङ्ल मे़मे़त्तु, “ओमे़त्ते़ॽ, आनिगे खे़ने़ॽ के़योःग्बासिगे़रो॥”
19कर युसुफरे़ खे़ङ्हाॽ मे़त्तुसि, “मे़गिसे़म्मिन्ने़ॽ, आङ्गाॽ निङ्वाॽफुमाङ्ङिन् युङ्बा ते़न्नो वाॽआबि? 20खिनिॽ आङ्गाॽ आदक्ले़ङ्वाओ ताप्फे़ःम्बा के़इत्तुम्माङ् के़वयि, कर निङ्वाॽफुमाङ्ङिल्ले़ हाबा खे़न् याःम्बक्कोलाम् नुबा चोःक्मा निङ्वाॽ चोगु, आइन् पोङ्ल पप्पा हे़क्केए यरिक् मनाहाॽ मे़हिङ्ङाङ् मे़वाॽर॥ 21खे़ल्ले़चोगुल्ले़ मे़गिसे़म्मिन्ने़ॽ, खिनिॽ नु खिनिॽ साहाॽ के़रे़क् आङ्गाॽ हिङ्निङ्ॽ॥” अक्खेलॽरिक् खुने़ॽ खे़ङ्हाॽ हाङ्हाङ् मे़त्तुसि हे़क्क्याङ् ले़मुसिरो॥
युसुफे़न् मासिङ्ॽ
22युसुफ नु खुने़ॽ कुम्बारे़ कुहिम्सयङ्हाॽ मिस्रओए मे़युङे़, हे़क्क्याङ् युसुफे़न् किप् थिक्काङ् थिबोङ् तङ्बे हिङे़॥ 23युसुफरे़ एफ्राइमे़ल्ले़ कुमुमे़न्छाॽ थारिक्काङ् निसु॥ मनस्सेरे़ कुस्सा माकिररे़ खारक् के़बोङ्बा कुस्साहाॽआङ् युसुफरे़ कुधुङ्बोओ मे़युक्खुसि॥
24खे़ब्याङ् युसुफरे़ कुम्भुॽसि मे़त्तुसि, “आङ्गाॽ आसिमा ये़म् के़रे़, कर से़क्खासाङ् निङ्वाॽफुमाङ्ङिल्ले़ के़भाॽरिरो, हे़क्क्याङ् खुने़ॽ कन् मिस्र लाजेॽलाम्बा आब्राहाम्, इसहाक हे़क्क्याङ् याकुबे़न्नु माङ्हुप् चोगुबा लाजेॽओ खिनिॽ के़देॽरिरो॥” 25हे़क्क्याङ् युसुफरे़ इस्राइलरे़ कुस्साहाॽ माङ्हे़क्सिङ्मा पाङ्घुसिआङ् मे़त्तुसि, “निङ्वाॽफुमाङ्ङिल्ले़ खिनिॽ ओगे़मे़त्तिरो, हे़क्क्याङ् खे़न् ये़म्मो आङ्गाॽ आये़प्पाहाॽ कॽयोलाम् खे़न् लाजेॽओ तेॽरे़म्मे़ॽओ॥” #ला १३:१९; यहो २४:३२; हिब्रु ११:२२
26अक्खेलॽरिक् युसुफे़न् किप् थिक्काङ् थिबोङ् तङ्बे के़रे़ल्ले़ मासिङ्॥ हे़क्क्याङ् खे़ङ्हाॽरे़ कुधक्को कुनाम्गे़नुॽबा निःङ्गेॽ मे़हुःत्तुआङ् चे सन्दोक्को मे़गेःत्तुआङ् मिस्रओए मे़ने़स्सुरो॥
Currently Selected:
तोलिङ्सोमु 50: LIF
Highlight
Share
Compare
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.
