तोलिङ्सोमु 48
48
याकुबरे़ एफ्राइम नु मनस्सेन् हाङ्वामुॽइ पिरुसि
1कुभा ये़म् एगाङ् “आदाङ्बारे़ के़म्बारे़ कुयाम् तुक्” फाॽआङ् कुभारे़ युसुफे़न् इङ्घङ् मे़हाक्तु॥ खे़ल्ले़चोगुल्ले़ ने़प्फु कुस्सा मनस्सेन् नु एफ्राइम्मे़न् याङ्सिङ्ङाङ् कुम्बारे़ॽओ खुने़ॽ पे॥ 2हे़क्क्याङ् “खे़ने़ॽ के़स्सा युसुफे़न् खे़ने़ॽ के़दुम्से़ फे़रे़आङ् वाॽ” लॽरिक् इङ्घङ् कुभारे़ याकुबे़न् मे़मे़त्तु॥ खे़ब्याङ् खुने़ॽ कुने़त्नाओ आबाङे पोगे़आङ् युङ्सिङ्॥
3याकुबरे़ युसुफे़न् मे़त्तु, “मुक्साम्दाङ्बा निङ्वाॽफुमाङ्ङिन् कनान लाजेॽबा लुजओ आङ्गाॽनु थाःन्छिङ्, हे़क्क्याङ् खुने़ॽ आङ्गाॽ मुॽइसाम् पिराङ् 4हे़क्क्याङ् मे़त्ताङ् #तोलिङ् २८:१३-१४ ‘ओमे़त्ते़ॽ, आङ्गाॽ खे़ने़ॽ के़बोन् के़धे़ॽर याःन्ने़, हे़क्क्याङ् यरिक् के़बोङ्ल चोःक्ने़॥ खे़ने़ॽलाम्बा आङ्गाॽ मे़न्छाम् सुवाङ्हाॽ लःत्तुङ्सिङ्, हे़क्क्याङ् खे़ने़ॽ के़एगाङ् खे़ने़ॽ के़मुॽइदाङ्साहाॽ कन् लाजेन् सदादिङ्ले़ लागि युक्मा पाङ्घुङ्सिङ्लो॥’”
5खे़ब्याङ् याकुबे़न् युसुफरो पेआङ् मे़त्तु, “आङ्गाॽ मिस्रओ युमा तगि मिस्रओ के़गत्तुसिबा के़स्साहाॽ आङ्गाॽइन्सिरो॥ रुबेन नु सिमियोने़न् हे़क्के एफ्राइम नु मनस्सेन् आङ्गाॽइन्सिएरो॥ 6खे़ङ्हाॽनुःल्ले़ एगाङ् के़बोङ्बा के़स्साहाॽ खे़ने़ॽइन् मे़बोङ्॥ खे़ङ्हाॽरे़ लाजेॽसिङ्बुङ् लक् मे़घोसुल्ले़ एफ्राइम नु मनस्सेलाम् मे़घोसुॽ॥ 7आङ्गाॽग पद्दन आरामलाम् एफ्रातओ के़प्मा आल्लसाङ् माःङ्घा वये़ल्ले़सा राहेल्ले़न् कनान लाजेॽओ मासिङ्, हे़क्क्याङ् आङ्गाॽ आनिङ्वाॽ साॽरिक् तुक्खे च्ये़र एफ्रात (बेथले़हे़म्माङ् मे़मे़त्तुॽ) पेःक्मा लाम्मोए खुने़ॽ लुप्तुङ्॥” #तोलिङ् ३५:१६-१९
8युसुफरे़ कुस्साहाॽ निसुसिआङ् याकुबरे़ पाःत्तु, “कङ्हाॽ हाःत्छिबे?”
9युसुफरे़ कुम्बा मे़त्तु, “निङ्वाॽफुमाङ्ङिल्ले़ आङ्गाॽ कॽयो पिराङ्बा कङ्हाॽ आस्सासिरो॥”
खे़ब्याङ् याकुबरे़ मे़त्तु, “खे़ङ्हाॽ कॽयो आङ्गाॽओ फे़त्ते़से़ॽ हे़क्क्याङ् आङ्गाॽ खे़ङ्हाॽ मुॽइसाम् पिरुङ्सिङ्ॽ॥”
10खे़न् ये़म्मो खदाक्मि तुम्से़बाल्ले़ चोगुल्ले़ याकुबरे़ कुमिक् मये़आङ् नुरिक् खामे़न्निमनाबा पोःक्खे़आङ् वये़॥ खे़ल्ले़चोगुल्ले़ युसुफरे़ खे़ङ्हाॽ कुम्बारे़ कुबेसाङ् तेॽरुसि हे़क्क्याङ् कुम्बारे़ खे़ङ्हाॽ चुप् मे़त्तुसिआङ् हे़प्प्रे़क् हे़प्तुसि॥
11याकुबरे़ युसुफे़न् मे़त्तु, “आङ्गाॽग खे़ने़ॽ के़नारा निसुङ् फाॽआङ् इःत्तुङ्बाए होःप्ते़, कर ओमे़त्ते़ॽ, खे़ने़ॽ के़स्साहाॽआङ् निङ्वाॽफुमाङ्ङिल्ले़ आङ्गाॽ ओमे़प्मा पिराङ्लो॥”
12खे़ब्याङ् युसुफरे़ खे़ङ्हाॽ याकुबरे़ कुधुङ्बोओलाम् चत्तुसि, हे़क्क्याङ् खुने़ॽ खाम्बाङ्ङो थारिक् साम्बोन् फन्छिङ्ङाङ् से़वा मे़त्तु॥ 13युसुफरे़ खे़न् ने़प्माङ् तेॽरुसिआङ् एफ्राइम्मे़न् आबाङे कुजुप्साङ् ले़प्माङ् हे़क्क्याङ् याकुबरे़ कुभे़न्छाङ् ले़प्माङ्, हे़क्क्याङ् मनस्सेन् आबाङे कुभे़न्छाङ् ले़प्माङ् हे़क्क्याङ् याकुबरे़ कुजुप्साङ् ले़प्माङ् चोगुसिआङ् याकुबरे़ कुबेसाङ् तारुसि॥ 14कर याकुबरे़ कुहुक्हाॽ सन्छुआङ् कुजुक्वा हुक्किन् फोःक्वाबा एफ्राइमरे़ कुधे़गेःक्को ने़स्सु, हे़क्क्याङ् मनस्सेन् तुम्बासाङ् खे़ल्ले़ कुधे़गेःक्को याकुबरे़ कुभे़न्छाङ् हुक्किन् ने़स्सु॥
15खे़ब्याङ् खुने़ॽ युसुफे़न्#४८:१५ याकुबरे़ इफ्राइम नु मनस्सेन् मुॽइसाम् पिरुसिल्ले़ खुने़ॽ से़क्खाःल्ले़ युसुफे़न् हाङ्वागे़न् मुॽइसाम् पिरुबारो॥ हाङ्वा मुॽइसाम् पिरुआङ् मे़त्तुरो,
“आम्बा अब्राहाम्मे़न् नु इसहाक्के़न्
आत्तिन् निङ्वाॽफुमाङ्ङिन्नु सोसोरिक् लाङ्घेगे़त्छि,
आत्तिन् निङ्वाॽफुमाङ्ङिल्ले़ आइन् थारिक्
आङ्गाॽ के़रे़क् आहिङ्मन्नो लाम्लोसाङ्ङाङ् वाॽ,
16के़रे़क् काःम्मालाम् याप्मि ताङ्गे़से़ःप्पा माङ्लाइङ्बाल्ले़
निङ्वाॽफुमाङ्ङिल्ले़ कन् अङे़ःक्वाहाॽ हाङ्वा मुॽइसाम् पिरुसिररो॥
कङ्हाॽओए आङ्गाॽ आमिङ्ङिन् वाॽररो,
हे़क्क्याङ् आङ्गाॽ आम्बा अब्राहाम नु
इसहाक्के़ल्ले़ खुन्छिॽ मिङ् सदादिङ् वाॽररो,
हे़क्क्याङ् इक्सादिङ् खाम्बेःक्मो कङ्हाॽ
निःत्मे़न्दे़त्ते थारिक् मे़बोःन्लरो॥”
17खुने़ॽ कुम्बारे़ कुजुप्साङ् हुक्किन् एफ्राइमरे़ कुधे़गेःक्को ने़स्सुबा निसुआङ् युसुफरे़ कुसिराॽ मे़धाङे़न्, हे़क्क्याङ् खुने़ॽ एफ्राइमरे़ कुधे़गेःक्कोलाम् मनस्सेरे़ कुधे़गेःक्को ने़मा फाॽआङ् कुम्बारे़ कुहुक्किन् चप्मारे़ लागि फोःक्खु॥ 18खुने़ॽ कुम्बा मे़त्तु, “आम्बौ, हे़क्के मेःन्, थेआङ्भे़ल्ले़ तुम्बे़ङ्ग कन्निरो॥ खे़ने़ॽ के़जुप्साङ् हुक्किन् कल्ले़ कुसम्धाङ् ने़स्से़ॽ॥”
19कर कुम्बारे़ मे़दे़न्दे़ल्ल मे़त्तु, “आङ्गाॽ निसुङ्, पाबुए आङ्गाॽ निसुङ्लो॥ कल्ले़न्नाङ् लत्छा यम्बा मे़न्छाम् कुसुवाङ् पोङ्लो॥ कर कल्ले़ कुन्साॽइङ्ग कन्नुःल्ले़आङ् यम्बा पोङ्लो, हे़क्क्याङ् खे़ल्ले़ कुमुॽइदाङ्साहाॽ मे़न्छाम् सुवाङ्हाॽरे़ लत्छा कुलुप् पोङ्लो॥” 20याकुबरे़ खे़न् ये़न्नो खे़ङ्हाॽ अक्खे मे़त्तुसिर हाङ्वा मुॽइसाम् पिरुसिरो, #हिब्रु ११:२१
“इस्राइलरे़ खे़न्छिॽ मिङ् लोःक्खुआङ्
कुमनाहाॽ अक्खेदङ्बा हाङ्वा मुॽइसाम् पिरुसिररो,
‘निङ्वाॽफुमाङ्ङिल्ले़ खे़निॽ एफ्राइम नु
मनस्से हे़क्के के़जोगिररो॥’”
अक्खेलॽरिक् याकुबे़ल्ले़ मनस्सेःन्नुःल्ले़ एफ्राइम्मे़न् तगि युक्खु॥
21खे़ब्याङ् याकुबरे़ युसुफे़न् मे़त्तु, “आल्ल आङ्गाॽ सिमा इःत्ताङ्ङाङ् वाॽआ, कर निङ्वाॽफुमाङ्ङिन् खिनिॽनु वाॽरो, हे़क्क्याङ् खिनिॽ पाधे़बाहाॽरे़ खुन्छिॽ लाजेॽओ याम्मो खिनिॽ के़देॽरिरो॥ 22खे़न्नुःल्ले़ वेॽग के़म्भुॽ के़न्साॽसिनुःल्ले़ खे़ने़ॽ यरिक् के़जोःक्पाल्ले़ चोगुल्ले़ आङ्गाॽ आबाङे आदाभे नु आदोःङ् आलिरे़ एमोरिहाॽरे़ खुन्छिॽ हुक्कोलाम् आङ्गाॽइन् चोगुङ्बा कोःक्मा थे़गुधिक् खे़ने़ॽ पिने़रो॥”
Currently Selected:
तोलिङ्सोमु 48: LIF
Highlight
Share
Compare
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.
