Ɓi Rom 12

Kipes ki asi

1Kon nak, ɗu ɓi ɓaah ciŋ ngo, ŋ yirmi Kooh yirim ɗu weem, mi yii ñaah ɗu, ɗu eɗ ɗe haf ɗu jen, ɗu nik findi seeƴkuuɗi na pese, wi hool wuu ce te a neɓuusa nga. Jaar wa nik ñaamki ɗu joy ɗe ñaamuk keeh-keeh. 2Kinaat taambiɗ ɓi adinaanii po ɗu mand na ɓa, faɗaat Kooh a on ɗu liiɓohaaɗ as ne wa ɓoƴsoh ɗu, ɗu min inhisoh waaɗ-waaɗiŋ ɗe. Waaɗ-waaɗiŋ ɗe weɗ baah, wa neɓpa ɗe te wa mitta.

3Ŋ ini ŋ baahohu, mi na woyee ɗu ne ali ɓo' nga ɗu kinaat deg haf ce ŋ ɗiski a reeɗi, waaye topɗaat haf ɗu ŋ ɗiski ɗu top, wa hend na kosi Kooh waɗ ɓo' nu nga ɗah. 4Laam findi faan nikoh yino, wa raakka cir laayiɗ te ca jen ca ɓaahɗi ini ca na haɓɗe, 5wa mand ɗaa nga ɓoo, ali ɓoo laayoh na, ɓoo faan yino ŋ niki ɓoo nik ŋ Kiristaani te ɓoo jen ambsukohha nikka cir ci.

6Waaye in ci ɓoo onu, caɗ ɗaloh, ca hun na baahohi ɓoo baahohu, yaa nu nga ɗah. Nik ne ɓoyi onuuɗ ne Kooh woyee taamboh nga ɗe ɗah, a woyaat ini hun na kosi ɓoo kos. 7Nik ne ɓo' onu ne a taambkoh ɓinooɓi ɗah, a taambkohaat ɓa. Ɓo' onu ne a jangiɗ ɓooɓi ɗah, a jangɗaat ɓa. 8Yi onu ne a ñaahoh, a ñaahohaat. Yi na onohe, onohaat te Kooh tah. Yi adgoh, a tokɗukaat nga. Yi na ɓaatɗohe ɓi nik ŋ miskiɗ, tumaata na sum.

9Waaɗohiŋ ɗu nikaat keeh. Sepeƴnukaat baahaaɗi, te ɗu ŋoɗ ngaŋ baahiɗ. 10Ŋ ini kaɗ ŋ waaɗoh, waaɗtiɗohaat findi ɓooɓi ɓaah yaay na baab. Ŋ ini kaɗ ŋ eɗoh cir, yaa nu nga ɗah uupsiɗkohaat eɗ cir morom ce. 11Ŋ ini kaɗ ŋ sawar, ali ɓo' kinaat tiriɓ. Ŋ ini kaɗ ŋ Fuuɗsi Hoolohngaani, yaa nu nga ɗah yoondɗukaat. Ŋ ini kaɗ ŋ Heɗi, ñaamkaat ɗe. 12Ŋ ini kaɗ ŋ ooluk in ci na haye, sumaat. Ŋ ini kaɗ ŋ miskiɗ ci, muñaat. Ŋ ini kaɗ ŋ kiim Kooh, genaat gen nga. 13Ŋ ini kaɗ ŋ etoh ciŋ ɓo'-Kooh ci, ɓaatɗohaat ɓa nga ca. Ŋ ini kaɗ ŋ daliɗ hanhe, ndengɗukaat nga.

14Kiimɗaat barke ɓi na tolfiɗee ɗu, barke'ɗaat te kinaat kiimiɗ ɓo' a alku. 15Hunaat ɗu sum na sumiɗ ci, fuɗaat na fuɗoh ci. 16Kerhiɗohaat ŋ harmban ɗu. Kinaat waak in yakak, waaye keeñ ciŋ ɗu hiiraat ɗu ŋ ɓooɓi heefuuɗ ci#12:16 "ɓooɓi heefuuɗ ci" : ini gerek woo ndii, wa namiɗ min tokis : "in ci heefuuɗ ci".. Kinaat amb ŋ haf ɗu ne ɗu inhiɗ in nu in. 17Kinaat tum miskiɗ yi tum ɗu miskiɗ. Liiɓaat ŋ tum in baahiɗ, ini ɓooɓi jen min teyɗuk. 18Wa min nik ɗah, pesaat ŋ jam na ɓooɓi jen, po ɗiska min-miniŋ ɗu top.

19Ɓaah ciŋ ngo ŋ keeñkoh, kinaat wirndukiɗ haf ɗu, faɗaat ayrukiŋ Kooh, wa tum ini wa joy tum. Fiis ci Hooliɗ ci woyiɗ ne Heɗi woo ne : « Ñam raak wirndiɗkoh, ñam na hee wirnduke tumohaaɗ ci moɗaaɗiici !#Rohƴiɗi 32:25 » 20Waaye ɓoo nak, Fiis ci nam woo ne : « Yi sang ɗa aɗuk ɗah, eɗaa ɗe a ñam ; a sifaɗuk ɗah, eɗaa ɗe a an. Fu tum ineem ɗah, fu na ɓekee ɗe kaci.#Gonaah ci 25:21-22 » 21Baahaaɗi kinaat ɗa min, minaa wa na baahiɗ.

Currently Selected:

Ɓi Rom 12: YM

Highlight

Copy

Compare