Ɓi Rom 11
11
Kooh faɗɗi cuuɓiŋ ɗe
1Mi na meeksohe : Kooh faɗ faɗ cuuɓiŋ ɗe e ? Muk ! Mi ŋ haf fo ŋ ɓaah ŋ Israayel, ŋ puloh ŋ Ibrahiima, ŋ cuuɓiŋ Benyaamin. 2Kooh faɗɗi cuuɓiŋ ɗe, cuuɓi a inah maañ. Ɗu inhiɗ ini Fiis ci woo ŋ ineem, ŋ saari Ilyas ñaɗtukee ŋ Israayel ci ŋ fiki Kooh. 3A woosa ne : « Heɗi, ɓa apiɗ woosuuɗ ciŋ ɗa, ɓa pooksohiɗ seeƴkohaaci na seeƴkohse wuu fu ; mi, ŋ tas kiik ko kotii te ɓa ɗii waaɗ to ap.#1 Buur ci 19:10; 19:14 » 4Waaye Kooh lof ye nga ? A woo ɗe ne : « Ŋ ɗaakɗiɗ haf fo ƴaar junni-yasna-kanak (7000), ɓi moosɗi ƴekiɗ Ba'al#11:4 Ba'al : a ɓaahee ŋ kooh ci nikaaɗiici meeɗ ñaamku ŋ jamanoonaŋ Ilyas (1 Buur ci 18:16-40)..#1 Buur ci 19:18 » 5Te wa mand ɗaa woti-woti, raakiɗ ɓi tas ŋ Israayel ci, ɓi kooɗu taamboh ŋ baahohiŋ Kooh.
6Nik ne ɓa baahohu baahohu ɗah, in ci ɓa tum tahɗi ɓa kooɗu ; mbaa baahoh nikisɗi baahoh. 7Kon ɓo' min ye woo ? Ini Israayel ci waake, ɓa raakɗaa ; e ɓi kooɗu nga ɓa raaka, ɓinooɓi, keeñ ciŋ ɓa ndengɗu ndengɗu. 8Findi wa fiisohu an :
« Kooh neehɗiɗ ñaañiŋ ɓa
a hondohha has ciŋ ɓa hot,
a hondohha nof ciŋ ɓa kerah,
te wa ɗaa po woti.#Rohƴiɗi 29:3; Esayi 29:10 »
9Te Dawuuda woyiɗ ne :
« Ɓeeɗkoh kañam ciŋ ɓa
nikaat nga ɓa
mbipi amban ɓa,
wa nik mbaali ɓa longohan,
wa nik kafndohaani folan ɓa,
wa nik wirndiŋ ɓa !
10Has ciŋ ɓa ñuusaat tuɗ
po ɓa hotissuu,
njuuƴɗa leero-finhoociŋ ɓa,
ɓa taalndiɗ ɗaa !#Sabuur 69:23-24; Sabuur 35:8 »
Ɓi nikɗi Yawuut gerefe'uuɗ
11Kon mi na meeksohe : Andi kafnduki ɓa kafnduk, ɓa keen keen po ɓa minisɗi kuruk e ? Muk ! Waaye ɗali ɓa ɗal tahiɗ po ɓi nikɗi Yawuut eɗuuɗ muci, ne Israayel ci siis ɓa. 12Nik ne a ɗali ɓa ɗal weɗ tah Adina raak ini yakki wa raak ɗah, te nik ne keeniŋ ɓa weɗ on ɓi nikɗi Yawuut ini yakki ɓa raak ɗah, kon wa wooriɗ ne Yawuut ci jen muc ɗah, ini wa onohan hey uupe yak fuuf !
13Ɗu ɓi nikɗi Yawuut, mi na woye na ɗu : Ñam Apootariŋ ɗu, ŋ neɓuuɗ ŋ pangki Kooh eɗ to. 14Ŋ waaɗ ne findi wa min nikoh ɗah, ɓooɓiŋ cuuɓiŋ ngo siis ɗu ŋ kosi ɗu kos, po wa muciɗ ɓi ɓo' nga ɓa. 15Nik ne e ɓakɗi ɓa ɓakɗu tah Adina kerhiɗoh na Kooh ɗah, kon Kooh dokin ɓa ɗah, wa nikan ye ? Wa nikanɗi hultiŋ kaaniɗ ci e ?
16Nik ne mbuuruuci koc hooliɗ wuu Kooh ɗah, ini tas ŋ muni siiɓuuɗi jen hooliɗ wuu ce#Kind ci 15:19-21 ; te nik ne niiri hooliɗ wuu Kooh ɗah, naak ci na car ci namiɗ hool wuu ce. 17Waaye raakiɗ car ci nihsu ŋ kidgiŋ oliiwi, te fu yi nikee car oliiw ɓaɓiɗ, fu gerefe'uusa ŋ ɗisik ci car ceem nikee, fu raakiɗ ɓak ŋ niiri, na ñif miŋ oliiwi baahiɗi. 18Waaye kina yaksiɗuk ŋ car ceem. Fu tuma ɗah, kina alkoh ne a fu raan niiri haa, waaye a niiri raan ɗa.
19Ŋ inhiɗ ne fu woyan ne : « Ca car ceɗ nihsu, ne ŋ gerefe'u. » 20Ineem keeh, waaye e ñak kos tah ca nihsu, te fu, e kos tah ɗa tufuk. Kina yaksiɗuk ŋ ineem, waaye neƴƴoha ; 21laam nik ne e car ciŋ kidgi ceɗ Kooh nihis ɗah, amba ne a faɗan ɗa haa.
22Mbaa marka findi Kooh baahoh na findi a na muñɗoheeɗi in baahaaɗi. A na muñɗeeɗi ɓi keen ŋ bakaaɗ, a baahiɗ nga ɗa. Waaye fu joy gen gaƴuk ŋ baah kiŋ ɗe ; wa ɗal ineem ɗah, fu hey name nihsu. 23Te ɓeɗ, ɓa risɗi ŋ kosaaɗiikiŋ ɓa ɗah, ɓa hey name gerefe'u ; laam Kooh herñiɗ ne a gerefe'is ɓa ŋ ɗiska ɓa nike. 24Nik ne fu, fu yi cari nihsohu ŋ oliiwi ɓaɓ, wi fu mbaahkoh, a fu gerefe'u ŋ oliiw baahiɗ, wi nikɗi mbaahiŋ ɗa ɗah, ŋ woyisɗi ɓeɗ ɓi na hee gerefe'se ŋ oliiwi ɓa puloh.
Cuuɓ ci jen mucɗu ɗah, Israayel jen hey muce
25Ɓaah ciŋ ngo, ŋ waaɗɗi ne ɗu nik inhaaɗi ini ɗasɗukiɗii, po ɗu kee liiɓa ne ɗu inhiɗ, weɗ ne : Ɓak ngaŋ cuuɓiŋ Israayel risan ndeng keeñ, po cuuɓ ci cinooci jen rahas muci. 26Teemb ndeem, Israayel jen hey mucɗasse, findi wa fiisohu an :
« Mucɗohi kurkohan Siyong, a hay.
A nihis kaañ-Kooh ki nik ŋ cuuɓiŋ Yaŋhooɓa ;
27te ineem weɗ nikan
ambtiɗohiŋ ngo na ɓa,
mbaɗna ŋ nihsan bakaaɗ ciŋ ɓa.#Esayi 27:9; 59:20-21 »
28Ini ɓa sang teyɗuk Yegɗohiŋ Muci, tahiɗ po ɓa sangiɗ ciŋ Kooh, wa nikka muuɗiŋ ɗu, waaye poyi, ɓa ris cuuɓi Kooh kooɗ, te a waaɗiɗ ɓa, sagu ambtiɗohi a ambtiɗohee na caac caŋ ɓa. 29Laam Kooh baahoh ɓo' in wala a ɓeeɗuk ɓo' ɗah, inwaaso moosanɗi amb Kooh nga. 30Ɗu kerhiɗeeɗi Kooh ɗeɓgaan te ɗiski wa nik ɗu yirmuuɗ taamboh ŋ ini Yawuut ci kerhiɗɗi ɗe. 31Ɗiski wa nik wa mand ɗaa, kerhiɗaaɗiikiŋ ɓa ɓekiɗ yirmuukiŋ ɗu, ini Kooh waaɗ weɗ ne yirmuukiŋ ɗu ɓek yirmuukiŋ ɓa. 32Kooh taƴ ɓooɓi jen ŋ kerhiɗaaɗiikiŋ ɓa, ne a yirim ɓa jen.
33Cey !
Moɗkiŋ liiɓohaaɗiŋ Kooh
na ki'inhiŋ ɗe,
ca nooɗiɗ lool
te ca laaɓpa keeh-keeh !
In ci a kooɗuk tum
minɗi acsuku
te waas ciŋ ɗe minɗi inhu !
34« Ya ɓa inhe
liiɓiŋ Heɗi ?
Ya ɓa dengee ɗe ?#Esayi 40:13 »
35« Ya ɓa wotiɗ ɗe kombot,
po a joyya ɗe wa wirind ?#Ayooɓa 41:3 »
36In ci jen puloh nga ɗe,
in ci jen nikiɗ taamboh nga ɗe,
in ci jen wuu ce.
A yi yakɗaah po faw !
Amiin !
Currently Selected:
Ɓi Rom 11: YM
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc
