Ɓi Rom 13

Teyɗukiɗ kilifaaci tufkiɗu

1Yaa nu nga teyɗukɗaat kilifaaci tufkiɗu ; raakɗi yi na nike kilifa te wa pulohɗi ŋ Kooh, te ɓi nik kilifa nga ɗa, a Kooh tufkiɗ ɓa. 2Yaa nu sang teyɗukiɗ nguur ɗah, a sang teyɗuk ini Kooh tufkiɗ ; ɓi na tume ineem hey degse ŋ waas.

3Ɓi tufkiɗu neƴƴohaah haa nik ne fu na tume baahiɗ ɗah, waaye nik ne fu na tume baahaaɗi ɗah, ɓa neƴƴohaah. Fu waaɗiɗ sang neƴƴoh ɓi tufkiɗu e ? Tuma baahiɗ, fu raak corkiɗiŋ ɓa. 4Ɓa nik ŋ pangkiŋ Kooh wuu ini baah nga ɗa. Waaye fu tum baahaaɗi ɗah, neƴƴohaa ɓa, ɓa ganaayukɗi ŋ ɓarang ɓarang. Ɓa nik ŋ pangkiŋ Kooh ne ɓa degohee ŋ waas, ɓa na tiindɗe ayrukiŋ Kooh ngaŋ yi na tume baahaaɗi. 5Ineem weɗ tah, wa etohiɗ ne fu teyɗuk ɓa ; neƴƴoh ayruki dong kinaat tah, waaye wa namaat nik ne hel onohiɗ ne wa waas.

6Ineem weɗ nam tah po ɗu wirnde lempo. Laam, kilifaaci, ɓa na pangkiɗe Kooh te wirndiŋ lempooni, ɓa na faɗohee wa faɗoh nof. 7Eɗaat ɓa yaa nu nga ini ɗu joy ɗe eɗ ; eɗaat lempooni yi ɗu joya eɗ, ɗu eɗ juutiini yi ɗu joya eɗ, ɗu nup yi ɗu joy nup, ɗu eɗ cir yi ɗu joya eɗ.

Waaɗoh weɗ mitiɗ waas

8Kinaat raakɗoh ɓo' ali in, ɗal waaɗi ɗu joy waaɗtiɗoh ; yaa nu waaɗ morom ce ɗah, a mitɗiɗ ini waasi nakoh. 9Ŋ ineem nakoh ci findi "kina njaaloo," "kina ap ɓo' ", "kina rok", "kina waaɗiɗ haf fu iniŋ morom fu",#Pula 20:13-17 na cinooci jen, ca woyuuɗ ŋ rohƴiɗ an : « Waaɗa morom fu findi fu waaɗoh haf fu. »#Lewiici 19:18 10Waaɗoh na tumoheeɗi miskiɗ, kon waaɗoh weɗ mitiɗ waas.

Kooɗkiɗaat hayiŋ Kiristaani

11Ɗu inhiɗ jamanooni ɓoo nikoh : Wa reyiɗ ne ɗu yunuk, laam ina ɓoo camboh kos poyi, muci uup ɓoo nga reɓ. 12Weki usiɗ, Kooh mand na wiisiɗ. Ɓoo wolkaat in ci na haɓɗasse ŋ ñuusi, ɓoo ɓekuk in ci siñaari na hiñohohe. 13Ɓoo pesaat pes lakiɗ waas findi ɓi nik ŋ noh cong, wa hunuu na mbuumbaay na laar, wa hunuu na faankoh sangohuuɗ na cakaay, wa hunuu na lahtoh na siisoh. 14Waaye ɓekkaat mandohaaɗiŋ Heɗi Yeesu Kiristaa, te kinaat waak findi ɗu tumohan ne ɗu taambiɗ waaɗ-waaɗ ci baahaaɗiiciŋ faan ciŋ ɗu.

Currently Selected:

Ɓi Rom 13: YM

Highlight

Copy

Compare