Ni xi akakoo̱ 5
5
Chꞌo̱ xo̱jo̱n xi kjitꞌa eén ko̱jo cho̱tsa̱nga̱a̱
1Kó kamábe an nga tsja kixi̱ xi botixómaá, tsꞌényaꞌa ngo chꞌo̱ xo̱jo̱n xi kamáꞌindó nga jó ngoboaá, kó yito seyo̱ tjíꞌniúní kui chꞌo̱ xo̱jo̱o̱n. 2Kó kamábe an ngo ndítsjie xi tjiín ngaꞌniú xi ꞌniú askjandáyà nga bi̱ katsó nga asíyá:
–ꞌYání xi ka̱makon nga skjíndókjáyá kui chꞌo̱ xo̱jo̱o̱n ko̱jo nga ka̱maa̱ skjíndiyá kui seyo̱ xi tjíꞌniúní.
3Ta̱nga ti̱nde ndiꞌakꞌajmii̱, ti̱nde tꞌanangii̱, ti̱nde ngindie tꞌanangii̱ jmíjín ngo xi kamaá iskjíndokjáyà kui chꞌo̱ xo̱jo̱o̱n, ti̱nde kamájín askotsijee̱n. 4Kó an achichí askjandá an, ngatꞌa̱ ta̱ꞌyajín xi kasako xi kamákón nga iskjíndokjáyà kui chꞌo̱ xo̱jo̱o̱n, ti̱nde kamájín askotsijee̱n. 5Ta̱nga ngo kui xota̱ xi xchaá xi bi̱ katsóna:
–Ngiti̱ cheꞌéjín ngase, ngatꞌa̱ jè katsꞌén xi kꞌuijñásón nínga botixómá Ndabii̱, kui xi ꞌmií xandi̱je̱ xi chji̱a̱ni Jundáa̱, ta̱kuítsí tjiín xá nga ka̱maa̱ skjíndókjáyá ko̱jo nga ka̱maa̱ skjíndiyá nga yito seyoo̱ kui chꞌo̱ xo̱jo̱o̱n.
6Kósꞌe̱, ngamasiee̱n nínga tikón xi botixómaá, ko̱jo nga nijón kui xi síndoo̱, ko̱jo ngamasiee̱n xota̱ xi xchaá, kamábe an ngo cho̱tsa̱nga̱ xi sikónkixi̱, xikoó tsi je kiniꞌánkꞌién, kó yito ndi̱ja̱, ko̱jo yito ndyi̱ko̱n kisꞌiee̱, kó kuí boá xi nga yito A̱si̱énni̱xtjii̱n Néná xí kanangiya ngayeje tꞌanangii̱. 7Kui cho̱tsa̱nga̱a̱ kijí, kó iskjíbé kui chꞌo̱ xo̱jo̱n xi tjiyátsjàni tsja kixi̱i̱ kui xi botixómaá. 8Kó ngije iskjíbé kui chꞌo̱ xo̱jo̱o̱n, nga nijón kui xi síndoo̱, ko̱jo nga kan nijón kui xota̱ xi xchaá, asiéntikoó kje̱n cho̱tsa̱nga̱a̱, kó ngayejee̱ nga ndyi̱yaꞌa ngo arpa̱, kó ndyi̱yaꞌa chi̱tsen xí to̱nsinié xi tjiín nisije̱n xi niꞌánkjién nga niꞌándikón Néná, kó kuí boá xi bokó nga xota̱ na̱xi̱ńdá tsjiee̱ Néná, ndyi̱chji̱a̱a̱ Néná. 9Kó ndyi̱sie ngo só tja̱tsi̱e̱ xi bi̱ tsoó:
Jí xí tsoboaá nga chjábé jí kui chꞌo̱ xo̱jo̱o̱n
ko̱jo nga chjándiyè ji seyoo̱,
ngatꞌa̱ jí boá xi kiniꞌánkꞌieén,
kó nga katjon jíi̱n kaꞌnaxiéꞌé
nga tsi̱ꞌe̱ Néná kamá ngayeje tji̱e̱e̱ xota̱,
én, ko̱jo nangi, ko̱jo na̱xi̱ńdá,
10kó kuí xotaa̱ xi kiniꞌín ji re xi tsi̱ꞌe̱ Néná,
kiniꞌín ji chináꞌmi xi tsi̱ꞌe̱ Néná,
kó kuí boá xi ko̱tíxoma ngayeje tꞌanangii̱.
11Sꞌe̱ askotsijen an, kó tsintꞌièe̱ nda̱a̱ kjín ndítsjie xi síndo nga ngo foaꞌatjiyajoo̱n kui xi botixómaá, ko̱jo xi síndoo̱, ko̱jo xota̱ xi xchaá, achichí kjín miyo̱n kamá, 12kó ꞌniú tsíchji̱a̱ nga bi̱ katsó:
¡Kui cho̱tsa̱nga̱ xi je kiniꞌánkꞌieén,
kuí boá xi tsoboaá nga si̱ꞌankꞌasꞌiee̱n ngaꞌniú
nga ko̱tíxoma, ko̱jo kjo̱a̱cho̱n,
ko̱jo kjo̱a̱kjínkón, ko̱jo ngaꞌniú, ko̱jo kjo̱a̱yandikón,
ko̱jo kjo̱a̱je, ko̱jo kjo̱a̱niꞌántsjà!
13Kó ti̱ tsintꞌie an nga ngayeje ni xi katsꞌénda Néná ndiꞌakꞌajmi jàn, ko̱jo tꞌanangii̱, ko̱jo ngindie tꞌanangii̱, ko̱jo ngi̱jii̱n ndáchíkoón, nga bi̱ katsó:
¡Kui xi botixómaá, ko̱jo cho̱tsa̱nga̱a̱,
kui ngateꞌeé kjo̱a̱niꞌántsjaà, ko̱jo kjo̱a̱yandikón,
ko̱jo kjo̱a̱je, ko̱jo ngaꞌniú tsi̱ꞌe̱ nga kui ko̱tíxoma ngatsjéni̱xtjii̱n!
14Nga nijón kui xi síndoo̱, bi̱ katsó:
–¡Bo̱a̱ kjiꞌi! Kó nga kan nijón xota̱ xi xchaá asiéntikoó, kó katsꞌéndikón kui xi tikón ngatsjéni̱xtjii̱n.
Currently Selected:
Ni xi akakoo̱ 5: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
